Arakhadilem ando Paddington (Londres, Inglaterra), beshenas but manush kotse. Me beshavas murha dasa ai murhe trin pheantsa kai sas mai bare mandar. Chi dikhasas but murhe dades, vo zhalas ai avelas le shonentsa ke sas leske drago o pimos.

Kana simas tsinorhi, murhi dei sikadias man te rhugiu kana zhavas te sobau. Mande sas man iek Biblia kai numa sas la le salmuria ai gindivas sar shai avel e muzika te gilabau len. Iek data kana chitosardem iek libro, chitosardem vareso kai ashilo ande murhi gogi, phenelas: “Si te avel e vriama kai chi mai avena giesa angle”. Godola suaturia chi mekenas man te sobau, gindivas man andel giesa mai angle, me phenavas mange: “O traio nashtil te avel numa kako. So kerau katse?”. Me chi kamavas te merau!

Kamavas te zhanau mai pa kakala prame, pala godia kamlem te dau duma le mulentsa ai gelem kal trushula murhe amigonentsa. Vi kidavas man lentsa te dikhau videuria darane, makar darasas kana kerasas sa godo, sas drago amenge.

Numa sas man 10 borsh kana gata murho traio chi zhalas po drom o lasho. Astardem te piau tsigeri ai nashtivas te mekau len. Polme astardem te piau marihuana. Kal 11 borsh zumadem o pimos, makar chi plachalas man sas mange drago so aliaravas kana makiuvavas. Plachalas man zurales e muzika ai butivar zhalas te khelau, pala godia de riate chorial zhavastar mandar kheral ai diminiatsi amboldavas ai khonik chi dikhelas man. Po kolaver gies chi ashelas man zor te zhau ande escuela. Ai kana zhavas, vi kotse piavas.

O borsh kai getolaspe e escuela chi gelo mange mishto. Murhi dei chi zhanelas sa so me keravas, kana zhanglias aliardiaspe dukhadi ai joliaili mantsa. Jaliam amen ai gelemtar kheral. Sar phiravas iekhe manushesa terno me gelem te beshau lesa. Vo busholas Tony, sas rastafari, chorelas, bikinelas draba chorhe ai sas leske drago te marelpe. Kal 16 borsh azhukeravas ka murho pervo shau.

Beshavas ande iek kher kai delas e amperetsia kal zhuvlia kai trobunas te bariaren korkorho penge glaten. Kotse prinzhardem kal marturia le Jehovaske. Dui anda lende avenas te den duma uni zhuvliantsa. Iek gies simas lentsa ai kamavas te sikavau ke so mothonas nas vorta, ke sas athade. Numa von dine man suato la Bibliasa ka suako prama kai pushavas lendar. Sas vushoro te aliarau lenge ke denas duma pachasa. Plachaias man e dragostia kai sikade, pala godia astardem te estudiu e Biblia lentsa.

Fuga arakhlem vareso pa e Biblia kai parhudias murho traio. De tsinorhara sas mange dar te merau, numa sikilem so phendias o Jesus pa kana zhuvindina le mule (Iovano 5:28, 29). Ai vi sikilem ke o Del lel sama mandar (1 Petri 5:7). Le suaturia katar o Jeremias 29:11 aresle ka murho ilo, kotse phenel: “Me zhanau pra mishto le ginduria ke si man tumenge —phenel o Jehova—. Kamau te avel tumen pacha na chorhumos, kamau te dau tumen vareso lasho te azhukeren ai shukar giesa mai angle”. Astardem te pakiau ke shai avel man iek traio kai chi mai getolpe ando Paraiso pe Phuv (Psalmo 37:29, E Nevi Viasta ai o Psalmo).

Le marturia le Jehovaske sikade mange chacho kamlimos. E pervo data kai gele kai kidenpe, dikhlem ke kotse sas defial shukar, savorhe sas dragostosuria! (Iovano 13:34, 35). Chi kerde mantsa gadia ande aver khangeria. Le marturia le Jehovaske chi phende khanchi pa murho traio, dine man anda pengi vriama, line sama mandar ai azhutisarde man. Aliaravas man ande iek bari familia.

So mai estudiva e Biblia, aliaravas ke trobuvas te parhuvau murho traio te traiu sar si vorta angla le iakha le Devleske. Nas vushoro mange te mekau le tsigeri, parhudem le gilia kai ashunavas ke dem po gor ke uni anda lende kerenas te kamau te piau marihuana. Chi mai gelem te khelau, te na piau. Ai rodem neve amiguria te azhutin man te kerau so si vorta (Proverbios 13:20).

Anda godia vriama vi o Tony astardias te estudil e Biblia le marturentsa le Jehovaske. Kana dikhelas ke denas les suato la Bibliasa pa le dieli kai pushelas, astarelas te del po gor ke so sikiolas sas o chachimos. Parhudias pesko traio, durilo katar peske amiguria kai plachalas len te marenpe, meklias o chorimos ai e marihuana. Vi aliardiam ke te luvudis ka o Jehova sar vo mangel ai te bariol mishto amaro shau, trobusas te ansuris amen. Alosardiam te keras godo ando borsh 1982.

Serau mange ke rodavas ande La Atalaya ai Despertad! * pa manush kai parhude prame ande pengo traio ke vi me kamavas te kerau. So chitovas pa lende delas man e zor te mai parhudiuau ai te na peravau le vast. Mangavas but katar o Jehova te na chiol mandar. O Tony ai me boldiliam sar marturia le Jehovaske ando julio katar 1982.

Te kerdiuau amiga katar o Jehova, skepisardias murho traio. O Tony ai me dikhliam sar o Jehova ninkerdias amen andel vriemi phare. Sikiliam te pakias ande leste kana si amen bedi ai aliardiam sar las sama katar amari familia (Salmo 55:22).

Sas iek bari veselia te azhutis ka amaro shau, ai ka amari shei te aven amiguria le Jehovaske. Ai akana aliarau man sa iek fialo, sim barikani te dikhau sar murhe nepotsi prinzharen le Devles.

Chi mai darau katar e martia ai so si te avel mai angle. O Tony ai me, si amen iek shukar buki, zhas suako kurko ka but riga kai kidenpe le marturia le Jehovaske te das zor le phralen. Ai zhas lentsa te sikavas kal manush ke te aven len pakiamos ando Jesus shai train o traio kai chi mai getol.