SIKAIMOS 01

Sar shai azhutil tu e Biblia?

THO

But anda amende pushas amen pa o traio, o kino, e martia ai pa so si te avel mai angle. Ai shai avela ke gies giesestar jal amen e briga pala le prame kai trobul amen te trais ai te avel amari familia barikani. But manush dine po gor ke shai arakhen so pushenpe ande Biblia ai ke lake lashe suaturia azhutin len te zhal lenge mishto. Gindis ke e Biblia shai azhutil varekas kai prinzhares?

1. Pa save prame kai pushas amen del suato e Biblia?

E Biblia del suato pa prame kai shai pushas amen sar kakala: sar avilo o traio? sostar sam katse? sostar kinuin le manush lashe? so si kana meras? sostar mundardion le manush te avela ke savorhe mangen e pacha? Ande Biblia shai arakhes kakala suaturia, ai but manush kai arakhle len barikane le pala godo.

2. Sar azhutil amen e Biblia te avel amen iek lasho traio?

E Biblia del amen lashe suaturia te trais mishto. Sikavel kal famili sar te aven chachimasa barikane ai mothol amenge so shai keras te na jal amen but e briga ai te keras e buki pachasa. Kana mai sikiosa so si katse, mai si te aliares so phenel e Biblia pa gadala suaturia ai mai but. Si te des po gor ke “sa e Swunto Vorba”, sa so mothol e Biblia, azhutil amen te trais vorta (2 Timote 3:16).

E Biblia si o libro mai baro amenge ai kacha publikasion shai azhutil tu te mai aliares la. Pala godia si bari prama te chitos ande Biblia sa le texturia kai si ande suako sikaimos ai dikhta sar maladiol so chitos ai so sikios.

TE MAI SIKIOS

Aida dikhas sar e Biblia azhutisardias avren manushen, so shai keras te plachal amen te chitos la ai savo mishtimos las kana varekon azhutil amen te mai aliaras la.

3. E Biblia ningerel amen

E Biblia si sar iek vediara kai azhutil amen te dikhas o drom kai phiras. Shai usis la te alosaras mishto so te keras ai te zhanas so si te avel mai angle.

Chiton Salmo 119:105 ai den duma pa:

So gindilas pa e Biblia o manush kai ramosardias kako salmo?
So gindis tu pa e Biblia?

4. E Biblia del suato pa so pushas amen

Iek zhuvli dias po gor ke ande Biblia sas le suaturia kai pushliape but vriama. Dikhen o VIDEO ai den duma pa:

VIDEO: Si tu vareso lasho te azhukeres! (1:49)

So pushelaspe e zhuvli katar o video?
Sar azhutisardias la te estudil e Biblia?

E Biblia sikavel ke si mishto te pushas amen prame. Chiton Mateo 7:7 (La Biblia. Traducción del Nuevo Mundo [NWT]) ai den duma pa:

Gindis ke e Biblia shai del suato pa so pushes tu? Ai so pushes tu?

5. Shai plachal tu te chitos e Biblia

Bute manushen plachal len te chiton e Biblia ai len lako mishtimos. Dikhen o VIDEO ai den duma pa:

VIDEO: Kana chiton e Biblia (2:05)

Kal terne anda o video, plachal len te chiton? So phenen von?
Sostar plachal len te chiton e Biblia?

So sikavel e Biblia del amen pacha ai vareso lasho te azhukeras. Chiton Romanos 15:4 [NWT] ai den duma pa:

Sas te plachal tu te zhanes mai pa sar e Biblia del amen pacha ai vareso lasho te azhukeras?

6. Shai aliaras mai mishto e Biblia kana varekon azhutil amen

But manush kai chiton e Biblia dine po gor ke si mai vushoro te aliaren la kana varekon azhutil len. Chiton Hechos 8:26-31 [NWT] ai den duma pa:

So shai azhutil amen te aliaras e Biblia? (Dikhen le verseturia 30 ai 31).

O manush anda e Etiopia trobusardias te azhutil les varekon te aliarel le Ramomata. Agies si mai vushoro bute manushenge te sikion e Biblia iekhe manushesa kai azhutil len.

UNI MANUSH PHENEN: “Kana estudiu e Biblia, jasarau murhi vriama”.