SIKAIMOS 9
Sar shai aven barikane le famili?
1. Sostar si bari prama te ansurinpe le manush ando zakono katar o them kai train?
O Jehova si o Del barikano, lestar aven but lashe viesti ai kamel te aven sa le famili barikane (1 Timote 1:11, La Biblia. Traducción del Nuevo Mundo [NWT]). Vo kerdias te ansurinpe o mursh ai e zhuvli. Kana von ansurinpe ando zakono katar o them kai train, shai aven len iek familia barikani ai shai bariaren mishto penge shaven. Le kristianuria trobun te ansurinpe sar tradel o them. Chito Luk 2:1, 4, 5.
Kana iek mursh ai iek zhuvli ansurinpe, de kotsara angle o Del kamel te aven le dui kidine. Vo mangel te avel chachimasa o rhom peska rhomniasa ai e rhomni peske rhomesa (Zhiduvuria 13:4). Ka o Jehova nai leske drago, vurhitsil, kana le ansurime mekenpe (Malaquías 2:16). Vo mekel te mekenpe ai te ansurinpe pale avre manushesa, ferdi te avela ke iek anda lende kerdias kurvia. Chito Mate 19:3-6, 9.
2. Sar trobun te ningerenpe o rhom ai e rhomni?
O Jehova kerdias le murshes ai la zhuvlia te azhutinpe iek avres kana si ansurime (Génesis 2:18). O rhom si o shero la familiako, vo trobul te sikavel la familia pa o Del ai te anel sa so trobul khere. O rhom trobul te sikavel ke kamel peska rhomnia, trobul te del pestar te shai lel sama latar. Le ansurime trobun te kamenpe ai te respetinpe. Ai sar le dui si bezejale, trobun te sikion te iertinpe iek avres te shai aven barikane. Chito Efisiana 4:31, 32; 5:22-25, 33; 1 Petri 3:7.
3. Trobun te mekenpe le ansurime te avela ke nai barikane?
Te avela ke le ansurime si len bedi, le dui trobun te thon sa pengi zor te sikaven peske kamlimos (1 Korintiana 13:4, 5). E Vorba le Devleski chi phenel ke le ansurime trobun te mekenpe te lasharen penge bedi. Chito 1 Korintiana 7:10-13.
4. So kamel o Del le shavenge?
O Jehova kamel te aven barikane le shave, pala godia sikavel len sar te aven gadia kana si terne. O Del vi kamel te len o mishtimos anda so zhanen ai so traisarde penge dada (Kolosiana 3:20). Ai vi mangel te aven barikane kana keren buki leske ai leske Shaveske. Chito Efisiana 6:1, 2; Mate 19:13-15; 21:15, 16.
5. Sar azhutin le dada te aven le shave barikane?
Le dada trobun te keren sa so si ande lenge vast te den ka penge shave jabe, kher ai so te den pe peste (1 Timote 5:8). Numa godo chi aresel. Trobun te sikaven len te prinzharen le Devles ai te kamen les (Deuteronomio 6:4-7). Kana le dada kamen le Devles, le shave sikion ilesa te keren sar lende. Te sikiona le shave katar e Vorba le Devleski, shai alosaren iek lasho drom te phiren ando traio. Chito Efisiana 6:4; 2 Timote 3:15.
Kana le shave keren prame mishto, trobul len te ashunen suaturia shukar katar penge dada. Le dada trobun te sikaven ai univar trobun te vorton penge shaven, godo si te ningerel len te zhal lenge mishto (Proverbios 22:15). Kana le dada vorton le shaven gadia, chi trobun te keren godo defial phares. Chito Kolosiana 3:21.
Le marturia le Jehovaske dine but publikasionuria te azhutin le daden ai le shaven. Gadala publikasionuria mothon so phenel e Biblia. Chito 2 Timote 3:16.
