Ισί ο Ντεβέλ Παντού Κάθε Στιγμή;
Σο βακερέλα η Αγία Γραφή
Ο Ντεβέλ μπορίνελα τι ντικχέλ σαρέ ο πράγματα ντα τι κερέλ σο-ντα μανγκέλα κάι-ντα τραμπίνελα. (Παροιμίες 15:3· Εβραίους 4:13) Όμως, η Γραφή να βακερέλα ότι ο Ντεβέλ ισί παντού κάθε στιγμή—δηλαδή ότι ισί παντού, σαρέ κο πράγματα. Οκιά μπάνταρ, σικαβέλα ότι ισί πρόσωπος ντα ότι μπεσέλα εκχέ συγκεκριμέ τθανέστε.
Σαρ ισί ο Ντεβέλ: Ο Ντεβέλ ισί πνεύμας. (Ιωάννης 4:24) Ο τζενέ ναστί ντικχένα-λες. (Ιωάννης 1:18) Φαντασίες ι Ντεβλέσκε σο ισί κι Γραφή σικαβένα-λες κάθε φαρ τι αβέλ εκχέ συγκεκριμέ τθανέστε. Ποτές να σικαβένα-λες τι αβέλ παντού.—Ησαΐας 6:1, 2· Αποκάλυψη 4:2, 3, 8.
Ο τθαν σο μπεσέλα ο Ντεβέλ: Η Γραφή βακερέλα ότι ο Ντεβέλ τθερέλα “εκ τθαν σο μπεσέλα κο ουρανός”. (1 Βασιλέων 8:30) Ανταβά μανγκέλα τι βακερέλ ότι ο Ντεβέλ να μπεσέλα κι πφουβ ή κο σύμπαν, αλλά κο ουρανός. Η Γραφή βακερέλα ότι εκ φαρ άγγελοι αβιλέ ανγκλάλ κο Ιεχωβά. a Ανταβά σικαβέλα ότι ο Ντεβέλ μπεσέλα εκχέ συγκεκριμέ τθανέστε.—Ιώβ 1:6.
Άμα ο Ντεβέλ νανέ παντού κάθε στιγμή, αβέλα-πες τι πφαμπόλ μάνγκε προσωπικά;
Βα. Ο Ντεβέλ πφαμπόλα μπουτ ι κάθε τζενέσκε. Παρόλο σο τζουβντιόλα κο ουρανός, ο Ντεβέλ ντικχέλα ι τζενέν κι πφουβ σο μανγκένα μπαγιά τι κερέν λέσκο γκι, ντα κερέλα πράγματα λένγκε. (1 Βασιλέων 8:39· 2 Χρονικών 16:9) Σκεφτίνεν σαρ σικαβέλα ο Ιεχωβά πο ενδιαφέρον ι πιστέ τζενένγκε:
Κάνα κεράσα προσευχή: Ο Ιεχωβά μπορίνελα τι ασουνέλ αμαρί προσευχή οντιά στιγμή σο κεράσα-λα.—2 Χρονικών 18:31.
Κάνα ισινάμ μπουτ στεναχωριμέ: «Ο Ιεχωβά ισί πασέ οντουλέντε σο τθερένα πφανγκό γκι· σώνελα οντουλέν σο ισί μπουτ στεναχωριμέ».—Ψαλμός 34:18.
Κάνα μανγκάσα συμβουλή: Ο Ιεχωβά “κα βοηθίνελ-αμέν τι αγαβάς σαρ ισί ο πράγματα ντα κα σικλιαρέλ-αμέν” αντράλ πι λαφίσταρ, κατά Αγία Γραφή.—Ψαλμός 32:8.
Λάθος πράγματα σο πακιάνα μερικά τζενέ οπράλ ανταλέστε
Λάθος πράγμας σο πακιάνα: Ο Ντεβέλ ισί παντού κι δημιουργία.
Αλήθεια: Ο Ντεβέλ να μπεσέλα ούτε κι πφουβ ούτε κάπου γιαβερτθέ κο σύμπαν. (1 Βασιλέων 8:27) Ισί μπαγιά ότι ο τσεργανιά ντα ο γιαβερά πράγματα σο λατσσαρντάς “σικαβένα ι Ντεβλέσκι δόξα”. (Ψαλμός 19:1) Όμως, ο Ντεβέλ να μπεσέλα αντρέ κο πράγματα σο λατσσαρντάς ακριβώς σαρ εκ ζωγράφος-ντα να μπεσέλα αντρέ κο πίνακας σο κερντάς. Εκ πίνακας όμως μπορίνελα τι βακερέλ αμένγκε μπουτ πράγματα οντουλέσκε σο κερντάς-λες. Αντικάς, ο πράγματα σο ντικχάσα ντονταλάι αμένταρ βακερένα αμένγκε μπουτ πράγματα για το ιδιότητες ι Ντεβλέσκε «σο ναστί ντικχάσα-λεν», σαρ ισί λέσκι ζορ, λέσκι σοφία ντα λέσκο μανγκιπέ.—Ρωμαίους 1:20.
Λάθος πράγμας σο πακιάνα: Αφού ο Ντεβέλ τζανέλα σαρέ ο πράγματα ντα ισί ο πο ζουρανό, ανταβά μανγκέλα τι βακερέλ ότι ισί παντού κάθε στιγμή.
Αλήθεια: Ο άγιος πνεύμας ι Ντεβλέσκο ισί ι Ντεβλέσκι ζορ. Αντράλ πι άγιε πνευμάσταρ, ο Ντεβέλ μπορίνελα τι αγαβέλ ντα τι κερέλ σο-ντα μανγκέλα, κάι-ντα μανγκέλα ντα κάνα μανγκέλα, χωρίς τι αβέλ Βοβ οτθέ.—Ψαλμός 139:7.
Λάθος πράγμας σο πακιάνα: Ο εδάφιος Ψαλμός 139:8 σικλιαρέλα ότι ο Ντεβέλ ισί παντού κάθε στιγμή επειδή βακερέλα: «Άμα κα νικλιάβας κο ουρανός, κα αβέας οτθέ, ντα άμα κα μπουγαράβας μο κρεβάτι κο Μεζάρι, πάλι κα αβέας οτθέ».
Αλήθεια: Ανταβά εδάφιος να σικαβέλα ο τθαν σο μπεσέλα ο Ντεβέλ. Χρησιμοποιήνελα εκ σουκάρ εικόνα για τι σικλιαρέλ-αμέν ότι καέκ τθαν νανέ αζόμ ντουρ ι Ντεβλέσκε ώστε μα τι μπορίνελ τι κερέλ πράγματα αμένγκε.
a Ιεχωβά ισί ο ναβ ι Ντεβλέσκο σαρ βακέρντιβελα κι Αγία Γραφή.
Μπέκιμ τι Μπεϊντίνεν Επίσης
Η ΓΡΑΦΗ ΑΠΑΝΤΙΝΕΛΑ ΑΜΑΡΕ ΕΡΩΤΗΣΙΕΝΤΕ
Σο Ισί ο Άγιος Πνεύμας;
Υπαρχίντιβενα λόγοι σο η Αγία Γραφή βακερέλα ότι ο Άγιος Πνεύμας ισί σαρ «ο βαστά» ι Ντεβλέσκε.
ΣΙΚΛΙΟΝ ΑΜΕΝΓΚΕ
Μανγκέν τι Αβέλ Τουμένγκε εκ Μάρτυρας ι Ιεχωβάσκο
Συζητίνεν εκ θέμας κατά Γραφή ι Ιεχωβάσκε Μαρτυρέντζαρ ή σικλιόν κατά Γραφή χωρίς τι ποκινέν.