Καζόμ πο μπουτ σικλιάσα ο ιδιότητες εκχέ τζενέσκε, αζόμ πο λατσσές τζανάσα-λες, ντα αντικάς αμαρί φιλία λέσαρ αβέλα πο ζουρανί. Κάτι ασακό αβέλα-πες ι Ιεχωβάσαρ-ντα, καζόμ πο μπουτ σικλιάσα λέσκε ιδιότητες αζόμ πο λατσσές τζανάσα λέσκο χαρακτήρας ντα αντικάς αμαρί φιλία λέσαρ αβέλα πο ζουρανί. Σαρέ κατά σουκάρ ιδιότητες σο τθερέλα ο Ντεβέλ, ισί σταρ σο ξεχωρίνενα: λέσκι ζορ, λέσκι σοφία, λέσκι δικαιοσύνη ντα λέσκι αγάπη.

«Ο πο μπαρό ισινάν Ιεχωβά! Τούι κερντάν ο ουρανός ντα ι πφουβ τι μπαρέ ζοριάσαρ».​—ΙΕΡΕΜΙΑΣ 32:17.

Μπορίνασα τι ντικχάς αποδείξεις ι Ντεβλέσκε ζοριάκε αντράλ κατά δημιουργία. Για παράδειγμας, κάνα μπεσένα αβρί κο κχαμ κο νιλάι, σο νιωθίνενα; Ο τατιπέ ι κχαμέσκο. Κι πραγματικότητα, νιωθίνενα οντουλά σο κερντάς η ζορ ι Ιεχωβάσκι. Καζόμ ζουρανό ισί ο κχαμ; Βακερένα ότι κο πυρήνας λέσκο η θερμοκρασία μπέκιμ τι ερεσέλ 15.000.000 βαθμούς Κελσίου. Κάθε δευτερόλεπτος, η ζορ ι κχαμέσκι μοιάζελα ι ζοριάσαρ σο τθερένα χιλιάδες βόμβες.

Όμως ο κχαμ ισί χουρντό ανγκλάλ κο μπουτ τρισεκατομμύρια τσεργανιά κο σύμπαν. Ο επιστήμονες βακερένα ότι εκ κατά πο μπαρέ τσεργανιά, ο UY Ασπίδος, μπέκιμ τι αβέλ 1.700 φαρ πο μπαρό κατά κχαμ. Άμα κα τζάλας οτθέ σο ισί ο κχαμ, κα ιτσσαρέλας ι πφουβ ντα κα ερεσέλας πο ντουρ κατά τροχιά σο τθερέλα ο πλανήτης Δίας. Μπέκιμ ανταβά βοηθίνελα-αμέν τι αγαβάς πο λατσσές οντουβά σο βακερντάς ο Ιερεμίας ότι ο Ιεχωβά Ντεβέλ κερντάς ο ουρανός ντα ι πφουβ πι μπαρέ ζοριάσαρ.

Σαρ βοηθίντιβασα αμέν κατά ζορ ι Ντεβλέσκι; Για τι τζουβντιάς τθεράσα ανάγκη οντουλά σο κερντάς ο Ντεβέλ, για παράδειγμας ο κχαμ ντα σαρέ ο σουκάρ πράγματα ι πφουβιάκε. Εκτός ανταλένταρ, ο Ντεβέλ χρησιμοποιήνελα πι ζορ για τι βοηθίνελ ι τζενέν ντα ι κάθε εκχές προσωπικά. Σαρ; Κο πρώτος αιώνας, ο Ντεβέλ ντινάς ζορ κο Ιησούς για τι κερέλ αληθινά θαύματα. Σαρ διαβάνασα: «Ο κορορέ ακανά ντικχένα ντα ο μπανγκέ πφιρένα, ο λεπροί αβένα λατσσές ντα ο κασουκέ ασουνένα, ο μουλέ ιστίνα ντα κο τσορορέ μουτθάντιβενα ο λατσσέ αμπέρια». (Ματθαίος 11:5) Κερέλα κάτι ο Ντεβέλ αμένγκε αντιβές; Η Γραφή βακερέλα: «Ντέλα ζορ οντουλέστε σο ισί κχινό». Ντα συνεχίνελα: «Οντουλά σο τθερένα ελπίδα κο Ιεχωβά κα αρακχέν πάλι πουμαρί ζορ». (Ησαΐας 40:29, 31) Ο Ντεβέλ μπορίνελα τι ντελ-αμέν ι «ζορ σο ισί πο μπαρί αμαρέ ζοριάταρ» για τι βοηθίνελ-αμέν τι νακχαβάς ή τι νταϊντίνας ο δυσκολίες ντα ο δοκιμασίες σο αβένα αμαρέ ζωγιάτε. (2 Κορινθίους 4:7) Ανταβά να κερέλα-τουμέν τι μανγκέν πο μπουτ εκχέ ασακέ Ντεβλές, σο χρησιμοποιήνελα με αζόμ μπουτ αγάπη σαρί πι ζορ για τι βοηθίνελ σαριλέν αμέν;

«Καζόμ μπουτ ισί οντουλά σο κερντάν, Ιεχωβά! Σαρέ με σοφία κερντάν-λεν».​—ΨΑΛΜΟΣ 104:24.

Καζόμ πο μπουτ σικλιάσα οντουλένγκε σο κερντάς ο Ντεβέλ αζόμ πο μπουτ σαστίνασα κατά σοφία σο τθερέλα. Επίσης υπαρχίντιβελα εκ έρευνα, σο βακέρντιβελα βιομιμητική ή βιομιμητισμός, σο λάταρ ο επιστήμονες ντικχένα λατσσές ι δημιουργία ι Ιεχωβάσκι για τι λεν ο σχέδια σο ισί κι φύση ντα τι κερέν πο λατσσέ ο σχέδια σο κερένα βον—κατά πο απλός αυτοκόλλητος μέχρι ο σχέδιος εκχέ αεροπλανόσκο.

Η σοφία ι Ντεβλέσκι σικάντιβελα ατζέ πο μπουτ κο τρόπος σο ισί κερντό ι τζενέσκο σώμας. Σκεφτίνεν, για παράδειγμας, σαρ μπαριόλα εκ μαξίμι αντρέ κο περ. Κι αρχή ισί εκ γονιμοποιημέ κύτταρος, σο τθερέλα σαρέ ο γενετικές οδηγίες σο χρειαζίντιβελα. Ανταβά κύτταρος χωρίντιβελα κορκορό μπουτέ γιαβερέ κυτταρόντε σο ισί ίδια. Αλλά ντιπ κο σωστός σαάτι, ανταλά κύτταρα αβένα διαφορετικά ντα αντικάς λατσσάρντιβενα εκατοντάδες ξεχωριστά κύτταρα, σαρ ισί ο κύτταρα κο ρατ, κο νεύρες ντα κο κόκαλα. Αζομάν κερντιόνα ο όργανα ι τζενέσκε ντα αρχίνενα τι κχελέν. Σάντε αντρέ εννιά μασικέντε ανταβά πρώτος κύτταρος αβέλα εκ σαστό μαξίμι σο ισί κερντό από δισεκατομμύρια κύτταρα. Η σοφία σο ντικχίντιβελα κο τρόπος σο ισί κερντό ι τζενέσκο σώμας, τσσίντελα μπουτέ τζενέν τι συμφωνίνεν ι λαφίντζαρ σο γραφιντάς εκ τζενό κι Γραφή: «Ο μπουτ σουκάρ τρόπος σο ισινόμ κερντό κερέλα-μαν τι σικαβάβ μπαρό σεβασμός τούκε ντα τι δοξάναβ-τουτ».​—Ψαλμός 139:14.

Σαρ βοηθίντιβασα αμέν κατά σοφία ι Ντεβλέσκι; Οντουβά σο κερντάς-αμέν τζανέλα σο χρειαζίντιβασα για τι αβάς ευτυχισμέ. Επειδή τζανέλα ντα αγαβέλα μπουτ λατσσές σαρέ ο πράγματα, ντέλα-αμέν σοφές συμβουλές αντράλ πι λαφίσταρ κατά Αγία Γραφή. Για παράδειγμας, η Γραφή βακερέλα αμένγκε:«Τι συγχωρίνεν ο εκ ι γιαβερές αντράλ τουμαρέ γκίσταρ». (Κολοσσαείς 3:13) Ισί γκοντιαβέρ ανταγιά συμβουλή; Βα. Ο γιατροί αρακχλέ ότι κάνα εκ τζενό συγχωρίνελα, τθερέλα πο λατσσό σοϊπέ ντα να βαντίντιβελα λέσκι πίεση. Επίσης τθερέλα πο χάνικ πιθανότητες τι κερέλ κατάθλιψη ντα γιαβερά προβλήματα υγείας. Ο Ντεβέλ ισί σαρ εκ γκοντιαβέρ, λατσσό αμάλ σο πφαμπόλα αμένγκε ντα σο να τσσιναβέλα ιτς τι ντελ-αμέν σωστές συμβουλές σο κερένα αμένγκε λατσσιπέ. (2 Τιμόθεο 3:16, 17) Κα μανγκένας τι τθερέν εκχέ ασακέ αμαλές;

«Ο Ιεχωβά μανγκέλα ι δικαιοσύνη».​—ΨΑΛΜΟΣ 37:28.

Ο Ντεβέλ κερέλα πάντα ο σωστός. Μάλιστα, «να νακχέλα κατά γκοντί ότι ο αληθινός ντα μπουτ ζουρανό Ντεβέλ κερέλα πφιρνιπέ ντα αδικία!» (Ιώβ 34:10) Κρίνελα δίκαια, σαρ βακερντάς ο ψαλμωδός για τον Ιεχωβά: «Κα κρίνες ι λαόν δίκαια». (Ψαλμός 67:4) Επειδή «ο Ιεχωβά ντικχέλα αντρέ κο γκι» να χουχάντιβελα κατά τζενό σο γκεραβέλα σο τζενό ισί, αλλά πάντα αγαβέλα ι αλήθεια ντα κρίνελα σωστά. (1 Σαμουήλ 16:7) Ατζέ, ο Ιεχωβά ντικχέλα ι αδικία ντα ο πφιρνιπέ σο υπαρχίντιβελα κι πφουβ, οτθάρ ντινάς πο λάφι ότι ατζεχάνικ «ο πφιρνέ να κα υπαρχίντιβεν κι πφουβ».​—Παροιμίες 2:22.

Όμως, ο Ντεβέλ νανέ εκ κριτής σο να πφαμπόλα καεκχέσκε ντα μανγκέλα σάντε τι τιμωρίνελ. Σικαβέλα έλεος κάνα χρειαζίντιβελα. Η Γραφή βακερέλα: «Ο Ιεχωβά συγχωρίνελα ντα τζιτζίνελα» ατζέ-ντα ι πφιρνένγκε άμα μετανιώνενα μπαγιά. Ανταβά νανέ αληθινή δικαιοσύνη;​—Ψαλμός 103:8· 2 Πέτρου 3:9.

Σαρ λάσα αμέν λατσσιπέ κατά δικαιοσύνη ι Ντεβλέσκι; Ο απόστολος Πέτρος βακερντάς: «Ο Ντεβέλ να ξεχωρίνελα ι τζενέν, αλλά σαρέ κο τθεμά δεχτίνελα οντουλέν σο νταρένα λέσταρ ντα κερένα ο σωστός». (Πράξεις 10:34, 35). Ντικχάσα λατσσιπέ κατά δικαιοσύνη ι Ντεβλέσκι επειδή βοβ ποτές να ξεχωρίνελα ι τζενέν. Μπορίνασα τι τζας πασέ λέστε ντα τι ντας-λες λατρεία καλέ τθεμέσταρ-ντα τι αβάς, σο-ντα τσσιπ τι κεράς, σο-ντα μόρφωση τι τθεράς ντα καζόμ χουλανέ ή τσορορέ-ντα τι αβάς.

Επειδή ο Ντεβέλ μανγκέλα τι τζανάς λέσκι δικαιοσύνη ντα τι λας λατσσιπέ λάταρ, ντινάς-αμέν ι συνείδηση. Η Γραφή βακερέλα ότι η συνείδηση ισί νόμος “γραμμέ αμαρέ γκιέντε”. Επίσης βακερέλα ότι “κερέλα αμέντζαρ λάφι” άμα τθεράσα λατσσί ή μπέτι συμπεριφορά. (Ρωμαίους 2:15) Σαρ ντικχάσα λατσσιπέ κατά συνείδηση; Άμα σικλιαράσα-λα σωστά, μπορίνελα τι βοηθίνελ-αμέν τι ατσσάς ντουρ κατά μπέτι ντα άδικες πράξεις σο μπέκιμ τι κερέν αμένγκε ζιάνι. Ντα άμα κερντάμ καέκ λάθος μπορίνελα αμαρί συνείδηση τι κερέλ-αμέν τι μετανιώνας ντα τι τσσιναβάς τι κεράς πάλι ανταβά λάθος. Μπαγιά, κάνα αγαβάσα ι μπαρί σοφία ι Ντεβλέσκι, ανταβά ταρτίνελα-αμέν πασέ λέστε ντα κερέλα αμένγκε λατσσιπέ!

«Ο Ντεβέλ ισί αγάπη».​—1 ΙΩΑΝ. 4:8.

Ο Ντεβέλ τθερέλα ζορ, σοφία ντα δικαιοσύνη, αλλά η Γραφή να βακερέλα ότι ο Ντεβέλ ισί ζορ, σοφία ή δικαιοσύνη. Βακερέλα ότι ισί αγάπη. Σόσκε; Ισί μπαγιά ότι κατά ζορ σο τθερέλα ο Ντεβέλ μπορίνελα τι κερέλ σαρέ ο πράγματα ντα η δικαιοσύνη ντα η σοφία οδηγίνενα ο τρόπος σο κερέλα ο πράγματα. Αλλά η αγάπη ι Ιεχωβάσκι τσσίντελα-λες τι κερέλ σο-ντα κερέλα. Η αγάπη επηρεάνελα σαρέ οντουλά σο κερέλα Βοβ.

Παρόλο σο κατά Ιεχωβά να λειπίνελας τίποτα, η αγάπη λέσκι τσσιντιντάς-λες τι κερέλ ι τζενέν κι πφουβ ντα ο πλάσματα κο ουρανός για τι μπορίνεν τι απολαμβάνεν λέσκι αγάπη ντα λέσκι φροντίδα. Χωρίς τι τθερέλ συμφέρον, λατσσαρντάς ι πφουβ τροπόσαρ σο κα αβέλας ο πο λατσσό για τι μπεσέν ο τζενέ. Ντα συνεχίνελα τι σικαβέλ αγάπη σαρέ ι τζενένγκε καζόμ «κερέλα τι νικιόλ ο κχαμ εμ ι γκεραλένγκε εμ ι λατσσένγκε ντα ντέλα ο μπρισίμ εμ κο δίκαιοι εμ κο άδικοι».—Ματθαίος 5:45.

Επίσης, «ο Ιεχωβά σικαβέλα μπουτ αγάπη ντα συγχωρίνελα». (Ιακώβου 5:11) Σικαβέλα μπουτ αγάπη σαρέ οντουλένγκε σο κερένα μπαγιά βήματα για τι σικλιόν-λες ντα για τι τζαν πασέ λέστε. Ο Ντεβέλ ντικχέλα ι κάθε εκχέ τζενές λένταρ ξεχωριστά. Βα, «βοβ πφαμπόλα τουμένγκε».—1 Πέτρου 5:7.

Σο λατσσιπέ ντικχάσα κατά αγάπη ι Ντεβλέσκι; Αβέλα αμαρό γκι σο ντικχάσα καζόμ σουκάρ ισί ο κχαμ κάνα περέλα. Μπεϊντίνασα μπουτ τι ασουνάς εκχέ μαξιμίς τι ασάλ. Η αγάπη εκχέ τζενέσκι αμαρέ φαμιλιάταρ ισί αμένγκε μπουτ πολύτιμη. Ανταλά πράγματα νανέ απαραίτητα για τι τζουβντιάς, αλλά πφερένα αμαρί ζωή.

Επίσης ντικχάσα λατσσιπέ εκχέ γιαβερέ-ντα τροπόσαρ σο σικαβέλα αγάπη ο Ντεβέλ: κατά προσευχή. Η Γραφή βακερέλα αμένγκε: «Μα ανησυχίνεν καέκ πραγμάσκε, αλλά σο-ντα τι αβέλ-πες, για τι βακερέν ι Ντεβλέσκε οντουλά σο μανγκένα λέσταρ, κερέν προσευχή, μολίνεν-λες ντα βακερέν λέσκε ευχαριστώ». Σαρ εκ λατσσό ντατ, αντικάς ο Ντεβέλ-ντα μανγκέλα τι μανγκάς λέσκι βοήθεια ατζέ-ντα ι πραγματένγκε σο απασχολίνενα-αμέν ντα ναστί βακεράσα-λεν γιαβερτθέ. Ντα βοβ, επειδή μανγκέλα-αμέν μπουτ, ντέλα πο λάφι ότι κα ντελ-αμέν ι «ειρήνη ι Ντεβλέσκι σο ισί πο οπρέ σαρέ οντουλένταρ σο αγαβένα».—Φιλιππησίους 4:6, 7.

Βοηθιντάς-τουμέν σο ντικχλέν ο πο σημαντικές ιδιότητες ι Ντεβλέσκε—ι ζορ, ι σοφία, ι δικαιοσύνη ντα ι αγάπη—τι αγαβέν ο χαρακτήρας σο τθερέλα ο Ντεβέλ; Για τι μπαριόλ τουμαρί εκτίμηση ι Ντεβλέσκε, βακεράσα τουμένγκε τι σικλιόν σο τθερέλα κερντό μέχρι ακανά ο Ντεβέλ ντα σο κα κερέλ κο μέλλον τουμαρέ λατσσιμάσκε.