Ο Πρώτος Γράμμας σο Μπουτσσάντιλο κο Κορίνθιοι 7:1-40
7 Ακανά κα κεράβ λάφι ι πραγματένγκε σο πουτσλέν. Ισί πο λατσσές εκχέ μουρσέσκε μα τι παντρίνελ ντα μα τι σοβέλ τζουβλιάσαρ.*
2 Αλλά επειδή αβέλα-πες αζόμ λουμνιπέ* κο ντουνιάς, ο κάθε μουρς τι τθερέλ πιρέ ρομνιά ντα η κάθε τζουβέλ τι τθερέλ πιρέ ρομές.
3 Ο μουρς τι ντελ πι ρομνιάτε οντουβά σο πρέπει τι ντελ-λα, ντα η τζουβέλ τι κερέλ ο ίδιος πι ρομέσκε.
4 Να κερέλα κουμάντος η τζουβέλ πο σώμας, αλλά λάκο ρομ. Αντικάς ο ρομ-ντα να κερέλα κουμάντος βοβ πο σώμας, αλλά λέσκι ρομνί.
5 Μα στερίνεν ο εκ κατά γιαβέρ οντουβά σο πρέπει, εκτός άμα ο ντούι-ντα συμφωνιντέν τι κερέν-λες ανταβά εκ βακίτι, για τι ντεν τουμαρέ σαατίσταρ κι προσευχή. Σοράν πρέπει τι αβέν πάλι γιεκ για μα τι τσσουβέλ-τουμέν ο Μπενγκ κο πειρασμός επειδή ναστί ατσσικιαρένα-τουμέν.
6 Οντουβά σο βακερντόμ τουμένγκε μπορίνενα τι κερέν-λες άμα μανγκένα, αλλά νανέ νόμος.
7 Κα μανγκάβας τι αβέν σαρέ ο τζενέ σαρ ισινόμ με. Αλλά ο κάθε εκ τθερέλα πιρό χάρισμας κατά Ντεβέλ. Ο κάθε εκ αμένταρ υπηρετίνελα-λες διαφορετικέ τροπόσαρ.
8 Βακεράβα οντουλένγκε σο νανέ παντριμέ ντα κο χήρες ότι ισί πο λατσσές τι ατσσόν σαρ ισινόμ με.
9 Αλλά άμα να ατσσικιαρένα-πες, τι παντρίνεν, σόσκε πο λατσσές ισί τι παντρίνελ εκ τζενό παρά τι κερέλ-λες κουμάντος οντουβά σο μανγκέλα λέσκο γκι.
10 Οντουλέντε σο ισί παντριμέ ντάβα οδηγίες, όχι με αλλά ο Κύριος, ότι η τζουβέλ δεν πρέπει τι χωρίνελ πι ρομέσταρ.
11 Άμα όμως χωρισάλι λέσταρ, μα τι παντρίνελ γιαβερέσαρ. Ντα άμα να μανγκέλα τι ατσσόλ κορκορί, τι αρακχέλ-λεν πάλι πι ρομέσαρ. Ντα ο μουρς δεν πρέπει τι μουκχέλ πι ρομνιά.
12 Όμως κο γιαβερά βακεράβα με, όχι ο Κύριος: Άμα εκ πφραλ τθερέλα ρομνιά σο να πακιάλα αμαρέ Κυριόστε, ντα βόι μανγκέλα τι μπεσέλ λέσαρ, μα τι μουκχέλ-λα.
13 Ντα άμα εκ τζουβέλ τθερέλα ρομές σο να πακιάλα αμαρέ Κυριόστε, ντα βοβ μανγκέλα τι μπεσέλ λάσαρ, μα τι μουκχέλ πι ρομές.
14 Επειδή ο ρομ σο να πακιάλα αμαρέ Κυριόστε αγιάντιβελα χάρη πι ρομνιάταρ, ντα η ρομνί σο να πακιάλα αμαρέ Κυριόστε αγιάντιβελα χάρη πι ρομέσταρ σο ισί Χριστιανός. Άμα να ισινέ αντικάς, τουμαρέ τσσαβέ κα αβένας μαγαριμέ, αλλά ακανά ισί άγια.
15 Αλλά άμα οντουβά σο να πακιάλα αμαρέ Κυριόστε κα τραμπίνελ τι νασέλ,* τι νασέλ. Ο πφραλ ή η πφεν νανέ υποχρεωμέ τι ατσσόλ λέσαρ ή λάσαρ κάνα αβέλα-πες κάτι ασακό. Ο Ντεβέλ ντινάς-τουμέν ειρήνη.
16 Κάι τζανένα, τζουβλιάλεν, άμα να κα σώνεν τουμαρέ ρομέν; Ή κάι τζανένα, μουρσάλεν, άμα να κα σώνεν τουμαρέ ρομνίν;
17 Αλλά ο κάθε εκ τι συνεχίνελ τι τζουβντιόλ αντικάς σαρ ισινέ κάνα ο Ιεχωβά* Ντεβέλ ντινάς-λες βίκος τι αβέλ πιστός. Ανταβά βακεράβα-λες σαρέ κο κχανγκιριά.
18 Κερντάας καέκ τζενό περιτομή ντα αβιλό πιστός; Ισί λατσσό λέσκε τι συνεχίνελ τι τζουβντιόλ αντικάς. Ισί καέκ τζενό σο να κερντάας περιτομή ντα αβιλό πιστός; Ισί λατσσό λέσκε τι συνεχίνελ τι τζουβντιόλ αντικάς.
19 Να τθερέλα καέκ σημασία άμα εκ τζενό κερντάς ή να κερντάς περιτομή. Οντουβά σο τθερέλα σημασία ισί τι ντελ καν κο εντολές κι Ντεβλέσκε.
20 Ο κάθε εκ τι ατσσόλ αντικάς σαρ ισινέ κάνα αβιλό πιστός.
21 Άμα ισινάνας δούλος κάνα αβιλάν πιστός, μα τι χαλ-τουτ ανάγκη ανταλέσκε. Αλλά άμα μπορίνεσα τι ελευθερώντιβες, μα χάσαρ ι ευκαιρία.
22 Κον ισινέ δούλος κάνα ο Κύριος ντινάς-λες βίκος τι αβέλ πιστός ισί ελεύθερος υπηρέτης ι Κυριόσκο. Ντα κον ισινέ ελεύθερος κάνα ο Κύριος ντινάς-λες βίκος τι αβέλ πιστός ισί δούλος ι Χριστόσκο.
23 Ο Ντεβέλ ποκιντάς μπουτ για τι κινέλ-τουμέν. Μα τι αβέν δούλοι τζενένγκε.
24 Πφραλάλεν, ο κάθε εκ τι ατσσόλ αντικάς σαρ ισινέ κάνα ο Ντεβέλ ντινάς-λες βίκος τι αβέλ πιστός.
25 Οντουλένγκε σο νανέ παντριμέ* να τθεράβα καέκ εντολή κατά Κύριος. Αλλά βακεράβα μι γνώμη σαρ πιστός τζενό σο τζιτζισάλο* λέσκε ο Κύριος.
26 Οτθάρ, πακιάβα ότι ο πο λατσσό ισί τι ατσσόλ εκ τζενό σαρ ισί, αφού τζουβντιάσα δύσκολε ντιβεσέντε.
27 Τθερέσα ρομνιά; Μα σκέφτινε τι μουκχές-λα. Να τθερέσα ρομνιά; Μα ρόντε ρομνιάκε.
28 Αλλά ατζέ-ντα άμα κα παντρίνες, να αμαρτίνεσα. Ντα άμα εκ τζενό σο νανέ παντριμέ* κα παντρίνελ, να αμαρτίνελα. Όμως, οντουλά σο παντρίνενα κα τθερέν προβλήματα πουμαρέ ζωγιάτε.* Αλλά με προσπαθίναβα τι γλιτώναβ-τουμέν ασακέ προβληματένταρ.
29 Βακεράβα ακαβά-ντα, πφραλάλεν: Ο βακίτι σο ατσσιλό ισί χάνικ. Από ακανά, οντουλά σο τθερένα ρομνιά τι αβέν σαρ μα τι τθερένα,
30 οντουλά σο ροβένα τι αβέν σαρ οντουλά σο να ροβένα, οντουλά σο χαιρίνενα τι αβέν σαρ οντουλά σο να χαιρίνενα, οντουλά σο κινένα τι αβέν σαρ οντουλά σο να τθερένα τίποτα
31 ντα οντουλά σο χρησιμοποιήνενα ο πράγματα ι ντουνιάσκε τι αβέν σαρ οντουλά σο να χρησιμοποιήνενα-λεν αζόμ μπουτ, σόσκε ανταβά ντουνιάς* αλλάνελα.
32 Να μανγκάβα τι αγχώνεν. Οντουβά σο νανέ παντριμέ αγχώνελα ι Κυριόσκε πραγματένγκε, σαρ τι κερέλ ο γκι ι Κυριόσκο.
33 Αλλά οντουβά σο ισί παντριμέ αγχώνελα ι ντουνιάσκε πραγματένγκε, σαρ τι κερέλ ο γκι πι ρομνιάκο,
34 ντα λέσκι γκοντί νανέ εκχέ πραγμάστε. Αντικάς η τζουβέλ-ντα σο νανέ παντριμέ ή σο να παντρισάλι ποτές αγχώνελα ι Κυριόσκε πραγματένγκε, για τι αβέλ άγια εμ πι σωμάστε εμ πι γκοντιάτε.* Όμως, η παντριμέ τζουβέλ αγχώνελα ι ντουνιάσκε πραγματένγκε, σαρ τι κερέλ ο γκι πι ρομέσκο.
35 Ανταβά να βακεράβα-λες για τι τσσουβάβ τουμένγκε όρια, αλλά τουμαρέ λατσσιμάσκε. Μανγκάβα τι κερέν οντουβά σο ισί σωστός για τι υπηρετίνεν συνέχεια ι Κυριός χωρίς τι τσσιναβέλ-τουμέν τίποτα.
36 Αλλά άμα εκ τζενό σο νανέ παντριμέ πακιάλα ότι ναστί ατσσικιαρέλα-πες ντα νακχαντάς ι ηλικία σο κερένας-λες κουμάντος ο σεξουαλικές επιθυμίες, πρέπει τι αβέλ-πες ακαβά: Τι κερέλ οντουβά σο μανγκέλα, να αμαρτίνελα. Τι παντρίνελ.
37 Αλλά άμα εκ τζενό ισί ντιπ σίγουρος πι γκίστε ότι να τθερέλα ανάγκη τι παντρίνελ ντα κερέλα κουμάντος οντουλά σο μανγκέλα ντα αποφασιντάς αντρέ πι γκίστε μα τι παντρίνελ, λατσσές κα κερέλ.
38 Άρα, κον παντρίνελα κερέλα λατσσές, αλλά κον να παντρίνελα κα κερέλ ατζέ πο λατσσές.
39 Η τζουβέλ ισί ενωμέ πι ρομέσαρ καζόμ βοβ ισί τζουβντό. Άμα όμως λάκο ρομ κα σοβέλ ο σοϊπέ ι μεριμάσκο, μπορίνελα τι παντρίνελ κάσαρ μανγκέλα, αλλά σάντε άμα οντουβά τζενό ισί μαθητής ι Κυριόσκο.
40 Όμως, ισί πο ευτυχισμέ άμα κα ατσσόλ αντικάς σαρ ισί. Πακιάβα ότι με-ντα τθεράβα ο πνεύμας ι Ντεβλέσκο.
Υποσημειώσεις
^ Κι Πουρανί Μπαλαμανί βακέρντιβελας «εκχέ μουρσέσκε μα τι αγγίνελ τζουβλιά».
^ Γιαβέρσοϊ «τι χωρίνελ».
^ Ο πουρανό μπαλαμανό λάφι μανγκέλα τι σικαβέλ τζενέν σο να τθερένας ποτές σεξουαλικές σχέσεις.
^ Ντικχ εδάφιος 1 Κορ. 7:25, υποσημείωση κο λάφι «παντριμέ».
^ Γιαβέρσοϊ «κα τθερέν στεναχώρια πουμαρέ σωμάστε».
^ Κι Πουρανί Μπαλαμανί βακέρντιβελας «σόσκε ο σκηνικός ανταλέ ντουνιάσκο».
^ Κι Πουρανί Μπαλαμανί βακέρντιβελας «πνευμάστε».
