Γράμμας σο Μπουτσσάντιλο κο Ρωμαίοι 12:1-21
12 Οτθάρ, πφραλάλεν, αφού ο Ντεβέλ αγαβέλα τουμαρί ντουκχ, μολίναβα-τουμέν τι ντεν τουμαρέ σώματα σαρ εκ τζουβντί ντα πάκι θυσία σο κερέλα ι Ντεβλέσκο γκι. Αντικάς, κα ντεν-λες άγια υπηρεσία σαρέ τουμαρέ γκοντιάσαρ.
2 Ντα μα μουκχέν τι επηρεάνελ-τουμέν* ανταβά ντουνιάς.* Αλλά μουκχέν ι Ντεβλές τι αλλάνελ ο τρόπος σο σκεφτίνενα για τι σικαβέν τουμαρέ νεαυτόσκε οντουβά σο μανγκέλα ο Ντεβέλ, σο ισί λατσσό ντα τέλειος ντα κερέλα λέσκο γκι.
3 Αντράλ κατά μπαρό λατσσιπέ ι Ντεβλέσκο* σο σικάντιλο μάνγκε, βακεράβα σαρέ τουμένγκε μα τι σκεφτίνεν ότι ισινέν μπουτ σημαντικοί. Αλλά σκεφτίνεν μετρημέ τροπόσαρ, σόσκε ο Ντεβέλ βοηθίνελα ι κάθε εκχές τι τθερέλ πίστη Λέστε.
4 Εκ σώμας τθερέλα μπουτ μέρη, αλλά να κερένα σαρέ ο μέρη ι ίδια μπουτί.
5 Αντικάς αμέν-ντα, παρόλο σο ισινάμ μπουτ, ισινάμ εκ σώμας ενωμέ ι Χριστόσαρ. Αλλά ο κάθε εκ ισί εκ μέρος ι σωμάσκο σο να κερέλα ο εκ μπι ι γιαβερέσκο.
6 Ο Ντεβέλ ντέλα-αμέν σαβέ τι μανγκές ικανότητες* αντράλ κατά μπαρό λατσσιπέ σο σικαβέλα αμένγκε. Οτθάρ, άμα ντιντιλί-αμέν η ικανότητα τι βακεράς προφητείες, τι βακεράς προφητείες αντράλ κατά πίστη σο τθεράσα.
7 Άμα ντιντιλί-αμέν η ικανότητα τι υπηρετίνας ι γιαβερέν, τι υπηρετίνας-λεν. Οντουβά σο σικλιαρέλα, τι σικλιαρέλ.
8 Οντουβά σο ντέλα ζορ, τι ντελ ζορ. Οντουβά σο ντέλα λατσσέ πράγματα, τι ντελ-λεν πουταρντέ βαστέσαρ. Οντουβά σο κερέλα κουμάντος,* τι κερέλ κουμάντος λατσσές.* Οντουβά σο τζιτζίνελα, τι τζιτζίνελ* χαράσαρ.
9 Τι μανγκέν μπαγιά ι γιαβερέν σαρέ τουμαρέ γκίσαρ.* Τζουνγκάν κατά πφιρνιπέ.* Προσπαθίνεν τι κερέν σο-ντα ισί λατσσό.
10 Τι μανγκέν αντράλ τουμαρέ γκίσταρ ο εκ ι γιαβερές σαρ μανγκένα τουμαρέ πφραλέν. Τι σικαβέν πρώτα τουμέν σεβασμός κο γιαβερά.
11 Τι αβέν μπουτιαρνέ,* όχι τεμπέληδες. Ο πνεύμας ι Ντεβλέσκο τι πφαμπόλ σαρ γιακ* αντρέ τουμέντε. Υπηρετίνεν ι Ιεχωβάς* σαρ δούλοι.
12 Τι χαιρίνεν ι πραγματένγκε σο μπεκλεντίνενα τι αβέν-πες.* Τι νταϊντίνεν κάνα τθερένα στεναχώρια. Μα τσσιναβέν τι κερέν προσευχή.
13 Τι ντεν τουμαρέ πραγματένταρ κο άγιοι σο τθερένα ανάγκη. Μα τσσιναβέν τι πουτρέν τουμαρό κχερ ι γιαβερένγκε.*
14 Τι ντεν ζαμ οντουλέν σο τζάνα τουμέντζαρ κόντρα. Τι ντεν ζαμ ντα μα τι ντεν αρμάν.
15 Χαιρίνεν οντουλέντζαρ σο χαιρίνενα. Ροβέν οντουλέντζαρ σο ροβένα.
16 Τι ντικχέν ι γιαβερέν αντικάς σαρ ντικχένα τουμαρό νεαυτός. Μα τι αβέν μπαρικανέ, αλλά τι αβέν ταπεινοί. Μα τι πακιάν ότι ισινέν πο γκοντιαβέρ σαριλένταρ.
17 Μα κερέν τουμέν-ντα γκεραλιπέ* οντουλέσκε σο κερέλα τουμένγκε γκεραλιπέ. Κερέν ο πράγματα σο ισί λατσσέ κο γιακχά σαρέ κι τζενένγκε.
18 Άμα αβέλα-πες, καζόμ ισί τουμαρέ βαστέστε, τι τθερέν ειρήνη σαρέ ι τζενέντζαρ.
19 Μα λεν εκδίκηση τουμαρέ νεαυτόσκε, πφραλάλεν, αλλά μουκχέν τθαν ι Ντεβλέσκε χολιάκε, σόσκε ισί γραμμέ: «“Η εκδίκηση ισί μιρί. Με κα νταβ παλάλ κο τζενέ οντουλά σο κερντέ”, βακερέλα ο Ιεχωβά».*
20 Αλλά «άμα μποκχάλιβελα το ντουσμάνι,* ντε-λες τι χαλ. Άμα μερέλα πανίσκε, ντε-λες τι πιλ, σόσκε αντικάς κα γκίντες οπράλ λέσκε σορέστε ανγκαρά σο πφαμπόνα».*
21 Μα μουκχ ο γκεραλιπέ τι νικίνελ-τουτ, αλλά νίκινε ο γκεραλιπέ ι λατσσιμάσαρ.
Υποσημειώσεις
^ Γιαβέρσοϊ «τι λατσσαρέλ-τουμέν αντικάς σαρ μανγκέλα».
^ Κι Πουρανί Μπαλαμανί βακέρντιβελας «χαρίσματα».
^ Γιαβέρσοϊ «οδηγίνελα ι κχανγκιρί».
^ Γιαβέρσοϊ «σαρέ πι γκίσαρ».
^ Γιαβέρσοϊ «γκεραλιπέ, μπίλατσσιπε».
^ Γιαβέρσοϊ «Μα κερέν-τουμέν ότι μανγκένα ι γιαβερέν».
^ Γιαβέρσοϊ «Τι κερέν μπουτί λατσσές, σαρέ τουμαρέ γκίσαρ».
^ Γιαβέρσοϊ «γιανγκ».
^ Γιαβέρσοϊ «Τουμαρί ελπίδα τι ντελ-τουμέν χαρά».
^ Γιαβέρσοϊ «τι σικαβέν λατσσιπέ κο ξένοι».
^ Γιαβέρσοϊ «μπίλατσσιπε, κακός».
^ Γιαβέρσοϊ «εχθρός».
^ Δηλαδή για τι ηρεμίνες-λες ντα τι κερές κοβλό λέσκο σουκό γκι.
