„I Biblija šaj te ovel dosadno, ako na đaneja sar te čitine la“, phenela jekh tinejdžeri kova vićini pe Vil.

 Da li mangeja te đane sar šaj te uživine đi čitineja i Biblija? Akava članko ka pomožini tuće ko odova.

•  Ćer tuće slika ki godi

•  Istražin

•  So phenena te vrsnikija?

 Te šaj te zamisline odova so čitineja, probin te ćere akala buća:

1.   Birin jekh deo andi Biblija kova mangeja te proučine. Odova šaj te ovel disavo događaj andi Biblija, dijekh deo ando jevanđelje ja snimko ando dramsko čitibe andi Biblija kotar amaro sajt jw.org.

2.   Čitin odova deo andi Biblija. Šaj te čitine le kokri ja ko glaso te amalencar ja te porodicaja. Jekh osoba šaj te ovel narator, a avera šaj te ovel len avera uloge.

3.   Probin dijekh ando akala predlogija:

   •   Crtin odova sostar čitineja. Na primer, šaj te crtine nekobor tikne slike kola ka mothoven so ulo. Tali svako slika kratko pisin so ulo.

   •   Ćer jekh šema. Đi čitineja andi disavi verno osoba kotar Biblija, pisin olake šukar osobine, o šukar buća kola ćerđa hem o blagoslovija kola dobinđa.

   •   Ćer reportaža. Vaćer ando odova događaj ando razna strane hem ćer „intervju“ okolencar kola tane glavna ko odova događaj hem okolencar kola hine othe.

   •   Ako neko ando odola osobe anđa lošno odluka, zamislin so bi ovela ked bi ovela averćhane. Na primer, razmislin ando Petar ked odrekninđa pe ando Isus (Marko 14:66-72). Sar o Petar šaj hine pošukar te reagujini ki odija situacija?

   •   Ako hijan but maštovito osoba, tegani le hem pisin jekh drama ando disavo događaj kotar Biblija. Pisin hem so šaj te sikljova ando odova događaj (Rimljanima 15:4).

 Ako hari razmislineja ando detaljija, šaj te arakhe but šuže biserija. Podijekh puti, jekh ja duj lafija ki disavi priča andi Biblija šaj te mothoven amenđe diso nevo.

 Na primer, uporedin o lafija ando Matej 28:7 odoleja so pisini ko Marko 16:7.

•    Sose o Marko pisinđa so o Isus ka pojavini pe pekle učenikonenđe hem „e Petarese“?

•  Tikni pomoć: O Marko na hine odothe ked odova ulo. Odolese šaj te ova sigurna so o Petar vaćerđa lese sa so ulo.

•  Jekh šužo biseri: Sose o Petar hine bahtalo ked šunđa so o Isus mangela te dikhel le? (Marko 14:66-72). Sar o Isus mothovđa soj tano pravo amal e Petarese? Sar šaj sar o Isus te ove pravo amal averenđe?

 Ked ćereja tuće slika ki godi hem ked istražineja o detaljija, pobuter ka uživine đi čitineja i Biblija.