Oja, ki Biblija isi but dokazija kaj postojnela Devel. Oj sovetinela amen te na verujna sigate ko religiozna sikajba, nego te koristina amaro razum te šaj te ovel amen vera ko Devel (Rimjanite 12:1; 1. Jovanovo 5:20). Te dikha o sledna bibliska dokazija kola so sikavena kaj postojnela Devel:

•   O redo so vladinela ko univerzum hem o životo ki leste sikavena kaj postojnela Stvoriteli. I Biblija vakerela: „Sekova kher nekoj kergja le, a okova so kergja sa tano o Devel“ (Evreite 3:4). Iako akava logično čačipe tano ednostavno, but učime manuša mislinena kaj akava tano silno dokaz kaj postojnela Devel. a

•   Osven so isi len fizička potrebe, e manušen isi len prirodno želba te haljoven i smisla hem i cel ple životoskiri. I Biblija potvrdinela akava fakti. Ki late pišinela kaj isi amen „duhovna potrebe“, kote soj vklučimi i želba te pendžara e Devle hem te služina leske (Matej 5:3; Otkrovenie 4:11). Adava so isi amen duhovna potrebe tano dokaz kaj postojnela Devel, jekh grižlivo Stvoriteli kova so mangela te pomožinel amenge te zadovolina adala potrebe (Matej 4:4).

•   O detalna proroštvija kola so sine pišime ki Biblija vekoncar angleder ispolningje pe dži ko najtikno detali. Adava sikavela kaj mora te aven nekastar soj tano but pobaro taro manuš (2. Petrovo 1:21).

•   O pisatelija e Biblijakere džanena sine but poviše baši nauka nego o manuša so živinena sine ko lengoro vreme. Na primer, ko purano vreme but manuša mislingje kaj i Phuv ikerela pe upro nesavo životno, sar soj sloni ili želka. Sprotivno taro adava, ki Biblija pišinela kaj i Phuv na ikerela pe ko ništo (Jov 26:7). Isto agjaar, ki late pišinela kaj e Phuvjakiri forma tani okruglasto (Isaija 40:22). But manuša mislinena kaj o najlogično zaklučok tano kaj o bibliska pisatelija dobingje akala informacie taro Devel.

•   Ki Biblija isi odgovorija bašo but važna pučiba. Na primer, nesave taro adala pučiba tane: Ako o Devel mangela amen hem isi le mokj soske isi mukhe hem lošnipe? Soske i religija, namesto šukar, but puti isi la lošno vlijanie upro manuša? (Tit 1:16). But manuša so našti te arakhen o soodvetna odgovorija ko akala pučiba, šaj lokheste te počminen te na verujnen ko Devel.