O Svedokija na sine ljubezna samo e manušencar, nego hem me džukelencar. Jekh dive i Ilejn, koja so tergjola sine uzi količka, dengja biskotija mle duje džukelenge. Ottegani, samo so ka nakha sine taro količke, mle džukela vlečinena man sine ko than kote so dobinena sine biskotija.

Nekobor masekija nakhle, mle džukela uživinena sine ko biskotija, a me uživinava sine ko kratka razgovorija e Svedokoncar. Ama na mangljum te ovav but paše lencar. Sine man poviše taro 70 berš, hem na sium sine sigurno ko so verujnena o Svedokija. Adaleske so sium sine razočarimo taro but hristijanska crkve, mislingjum mange kaj tano najšukar korkori te proučinav i Biblija.

Ko adava periodi, dikhljum javere da Svedokon ko javera delija tari diz sar tergjona sine količkencar svedočibaske. Ola da sine sekogaš ljubezna. Sekogaš odgovorinena mange sine e Biblijaja ko mle pučiba, hem adaleske mli doverba ki lende barili.

Jekh dive, i Ilejn pučlja man: ’So mislinea, dali o životne tane poklon taro Devel?‘ Me odgovoringjum: ’Oja, sigurno sium ko adava!‘ Tegani i Ilejn čitingja mange o lafija taro Isaija 11:6-9. Palo adava mangljum te doznajnav nešto poviše baši Biblija, ama ponadari da na mangava sine te lav lendar literatura.

Ko sledna dive, e Ilejnaja hem lakere romea e Brentea keraja sine kratko lafi, ama bašo hor teme. Ola dengje man predlog te čitinav i Biblija taro Matej dži ko Dela, te šaj te haljovav so značinela te ovel pe čačutno hristijani. Baš adava kergjum. Sigate palo adava, počmingjum te proučinav i Biblija lencar. Adava sine ko nilaj 2016 berš.

Uživinava sine so sekova kurko proučinava sine i Biblija, hem so džava sine ko sostanokija ki e Jehovaskere svedokongiri dvorana. Sium sine but bahtalo so šaj sine te sikljovav o bibliska čačipa. Jekh berš palo adava, krstingjum man hem uljum e Jehovaskoro svedoko. Akana isi man 79 berš hem džanava kaj sium ko ispravno drumo. O Jehova dengja man bereketi adalea so dozvolingja mange te ovav delo tari leskiri familija soj ko celo sveto“.