Бијандиљум ко Монтреал, и најбари диз ки канадско област Квебек. Заедно ме пхењаја хем ме дује пхраленцар бариљум ки јекх шужи населба Розмон. Амаре родителија воспитинѓе амен мангипаја, хем сине амен мирно живото.

 Интересиринела ман сине и Библија панда сар тикно. Сетинава ман, кеда сине ман 12 берш, уживинава сине те читинав о Нево завет ко кова керела пе лафи башо е Исусескоро живото. Мукхља манге баро впечаток лескоро мангипе хем сочувство спрема о јавера. Мангава сине ме да те овав сар лесте. Ама, сар со накхела сине о време нашавѓум адаја желба соске почминѓум те дружинав ман лошно друштвоја.

 Мо дад башалела сине саксофони. Освен со денѓа манге пло саксофони, ов керѓа бут те мангав и музика. Ој ули манге најважно ко живото. Сиклиљум те башалав гитара да. Несаве амаленцар керѓем рок-група хем сине амен некобор настапија. Дикхле ман несаве пенџарде музичка продуцентија хем нудинѓе манге те керав ленцар бути. Потпишинѓум договор јекхе баре дискографско фирмаја. Мле гиља уле бут популарна хем нон-стоп мукхена лен сине ко радио ко Квебек.

 Мислинѓум кај иси ман са. Сиум сине терно хем популарно, заработинава сине бут паре хем керава сине адава со мангава. Дивескоро џава сине ки теретана, дава сине интервјуа, чхивава сине автограмија ко плоче хем настапинава сине ки телевизија. Раќате башалава сине хем џава сине ко забаве. Адалеске со сиум сине популарно сине ман баро притисок таро јавера. Те шај те издржинав адава притисок почминѓум те пијав панда сар терно, а покасно почминѓум те лав дрога да. Живинава сине неморално живото хем на секиринава ман сине башо ништо.

 Несаве мануша сине манге љубоморна адалеске со изглединава сине сар бахтало мануш. Ама, хор ки манде осетинава ман сине чучо, посебно кеда сиум сине коркори. Сиум сине разочаримо хем вознемиримо. Кеда сиум сине бут популарно, дуј таро мле продуцентија муле тари СИДА. Адава бут потресинѓа ман! Бут мангава сине и музика, ама одвратно сине манге о начин сар живинава сине.

 Иако сиум сине успешно музичари, свесно сиум сине башо страшна буќа со овена сине ко свето. Нашти сине те хаљовав соске иси добором неправде хем соске о Девел на керела нешто башо адава. Молинава сине е Девле те дел манге одговор башо адава. Кеда завршинѓум и турнеја, почминѓум палем те читинав и Библија. Иако на халиљум побаро дело таро адава со читинава сине, сепак халиљум кај о крајо е светоскоро мора те овел бут паше.

 Џикоте читинава сине и Библија, дознајнѓум кај о Исус ки јекх прилика постинѓа 40 диве ки пустина (Матеј 4:1, 2). Мислинѓум кај, ако керава ме да адава о Девел ка откринел пе манге, хем адалеске одрединѓум манге датум кеда те почминав те постинав. Ама, дуј курке англедер те почминав те постинав, дуј таро е Јеховаскере сведокија але ко мло удар. Одма викинѓум лен те кхувен андре. Јекхе лендар, кова со викинела пе сине Жак, дикхљум ле право ко јакхја хем пучљум ле: „Котар шај те џана кај живинаја ко последна диве акале светоскере?“ Тегани ов пхравѓа манге и Библија хем читинѓа манге 2. Тимотеј 3:1-5. Пучљум лен бут пучиба, а ола цело време дена ман сине одговорија тари Библија. Сиум сине воодушевимо таро ленгере логична хем шукар одговорија. Откеда посетинѓе ман некобор пути, халиљум кај на ваљани те постинав.

 Почминѓум редовно те проучинав и Библија е Сведоконцар. Пало несаво време, чхинѓум мле бала хем почминѓум редовно те џав ко са о состанокија ки дворана со сине манге паше. Адатхе сарине љубезно поздравинена ман сине хем керена сине лафи манцар. Адава сине манге панда јекх доказ кај конечно аракхљум о чачипе.

 Нормално, ваљани сине те керав баре промене те шај те живинав аѓаар сар со сикљовава сине тари Библија. Мора сине те чхинавав те дрогиринав ман хем повише те на живинав неморално. Исто аѓаар, халиљум кај на сиум ме главно ко свето хем кај ваљани повише те мислинав е јаверенге. Сар самохрано родители, мора сине те сикљовав те грижинав ман башо емоционална хем духовна потребе мле дује чхавенгере. Откажинѓум ман тари мли музичко кариера хем аракхљум ки јекх фабрика бути со сине похари платими.

 На сине манге локхе те керав са акала промене. Кеда решинѓум те мукхав и дрога, сине ман бари криза хем некобор пути палем лељум дрога (Римјаните 7:19, 21-24). Најпхаро сине манге те прекининав те живинав неморално. Освен адава, и неви бути сине манге пхари, а и плата сине бут тикни. Ваљани сине манге трин масек те керав бути хем те лав о паре со лава лен сине дује саатенге сар музичари.

 И молитва поможинѓа манге те на откажинав ман те керав акала баре промене. Халиљум кобор тано важно редовно те читинав и Библија. Бут охрабринѓе ман несаве библиска стихија сар, на пример, 2. Коринќаните 7:1, кова со поттикнинела е христијанен те чистинен секова мелалипе таро пумаро тело хем духо. Јавер стихо кова со уверинѓа ман кај шај те чхинавав е лошна навикенцар тано Филипјаните 4:13 коте со пишинела: „Са шај те керав соске поможинела манге окова со дела ман сила“. О Јехова одговоринѓа ко мле молитве хем поможинѓа манге те хаљовав о библиско чачипе хем те почминав те живинав спрема лесте. Акава поттикнинѓа ман те дав лафи кај ка служинав е Јеховаске цело живото (1. Петрово 4:1, 2). Крстинѓум ман ко 1997 берш.

 Сигурно сиум кај ка овав сине муло ако понадари да живинава сине сар поангле. Наместо адава, акана сиум чаче бахтало. Ми шукар ромни, и Елви, тани чачутно поклон таро Девел. Секова масек, одвојнаја баро дело таро амаро време те шај те кера лафи е манушенцар баши Библија. Адава керела ман те овав бут бахтало хем задоволно. Бут сиум благодарно е Јеховаске со анѓа ман ки песте (Јован 6:44).