Сој шукар а сој лошно: И Библија дела најшукар советија
Нашти те ова сигурна дали амаре одлуке ка овен шукар ако анаја лен спрема адава сар мислинаја амен или о јавера. И Библија вакерела аменге соске тано адава аѓаар. Ама на вакерела аменге само адава, него поможинела амен те џана сој тано шукар, а сој лошно, а адава керела амен среќна.
ВАЉАНИ АМЕНГЕ ПОМОШ ТАРО ДЕВЕЛ
Ки Библија о Јехова, a о Девел, објаснинела соске е манушенге ваљани лескири помош хем кај нашти те керен са коркори (Еремија 10:23). Адалеске денѓа амен и Библија колате со иси морална мерилија. Ов мангела амен хем на мангела те ана лошна одлуке кола со ка дукхавен амен хем ка керен попхаро амаро живото (5. Мојсеева 5:29; 1. Јованескоро 4:8). Исто аѓаар, сар амаро Створители, иси ле мудрост хем џанела те дел амен о најшукар советија со ваљани аменге (Псалм 100:3; 104:24). Ама, ов на чхивела никогаш силаја е манушен те живинен спрема лескере мерилија.
О Јехова денѓа е прво манушенге, е Адамеске хем е Еваке, са со ваљанѓа ленге те шај те овен чаче среќна (1. Мојсеева 1:28, 29; 2:8, 15). Исто аѓаар, ов денѓа лен едноставна упатствија хем аџикерѓа те икерен пе ки ленде. Сепак, мукхља коркори те биринен дали ка шунен адала упатствија или на (1. Мојсеева 2:9, 16, 17). Жално тано со о Адам хем и Ева биринѓе те живинен спрема пле мерилија, наместо спрема е Девлескере (1. Мојсеева 3:6). Саво сине о резултати? Дали о мануша тане посреќна адалеске со коркори одлучинена сој шукар, а сој лошно? На! Таро са акала берша со накхле дикхела пе кај адава со о мануша на икерена е Девлескере мерилија на анела ленге трајно мир хем среќа (Проповедник 8:9).
И Библија водинела амен те шај те ана мудра одлуке бизи разлика коте живинаја хем тари сави фамилија аваја (2. Тимотеј 3:16, 17; дикх и рамка „ Лил са е манушенге“). Те дикха сар керела адава и Библија.
Дознајн нешто повише башо адава соске баши Библија вакерела пе кај тани е Девлескоро лафи (1. Солунјања 2:13). Дикх о видеоклипи Кастар тани и Библија? ки jw.org.
И БИБЛИЈА ВАКЕРЕЛА АМЕНГЕ СО МАНГЕЛА О ДЕВЕЛ ТЕ КЕРА
И Библија вакерела аменге сар о Девел постапинела е манушенцар панда таро почеток. Адава со пишинела ки лате поможинела амен те хаљова сој тано е Девлеске шукар, а сој лошно, сој корисно, а сој штетно (Псалм 19:7, 11). О начелија со сикљоваја латар никогаш на пуранѓона хем поможинена амен те ана мудра одлуке секова диве ко амаро живото.
На пример, размислин башо совет кова сој пишимо ко Изреки 13:20: „Кој џала мудра манушенцар, мудро ка овел, а кас иси бути околенцар со нане гоѓавер, лошно ка накхел“. Акава начело важинела авдиве да исто кобор со важинела сине англедер. И Библија тани пхерди асавке корисна начелонцар со поможинена амен. (Дикх и рамка: „ Е Библијакири мудрост која со на пуранѓола“.)
Ама шај пучеа тут: Сар шај те овав сигурно кај о советија тари Библија шај те поможинен манге авдиве? Ки следно статија ка дикха искуствија таро несаве мануша.
a Јехова тано е Девлескоро анав (Псалм 83:18).
