Anglo peskero meriben o Ježiš phenďa: A kada evaňjelijum [čiže lačhi sprava] pal o kraľišagos pes vakerela pal calo svetos, kaj savore narodi te šunen a paľis avela o koňec. (Matuš 24:14 NZ) Sar pes anela e lačhi sprava savore manušenge pal calo svetos? O Ježiš amenge ada sikaďa akor, sar sas pre phuv. (Lukáš 8:1)

Phiras pal o manuša ke lende khere. O Ježiš sikavelas peskere učeňiken, sar te zvestinel e lačhi sprava kher kherestar. (Matúš 10:11-13; Skutky 5:42; 20:20) Phenďa lenge, andre save obvodi, čiže pre save thana, te zvestinen. (Matúš 10:5, 6; 2. Korinťanom 10:13) The adaďives sam mište organizimen. Dojekhe zboroske sas phendo, save hin lengere uľici the gava, kaj šaj phiren. Ada amenge pomožinel te kerel, so o Ježiš prikazinďa: Kaj te vakeras e lačhi sprava [so nekbuter] manušenge. (Skutki 10:42 NZ)

Das duma le manušenca, kaj pes del. O Ježiš zvestinelas le manušenge avri, paš o moros, paš e chaňig, andre ada amen diňa lačho priklados. (Marek 4:1; Ján 4:5-15) The amen vakeras le manušenca pal e Biblija ode, kaj hine, pre uľica, andre skľepa, andro parkos abo prekal o telefonos. Te pes del, ta das duma olenca, so paš amende bešen, andre buťi, andre škola abo la fameľijaha. Avka milijoni manuša šaj šunen e lačhi sprava pal e zachrana. (Žalm 96:2)

Hin vareko, kaske rado phenďanas e lačhi sprava pal ada, so lačho kerela le Devleskero kraľišagos prekal o manuša? Ma daran pal ada te phenel! Ma odthoven ada!

• Savi lačhi sprava mušinen o manuša te šunel?

• Savo lačho priklados amen diňa o Ježiš, sar te zvestinel?