La Vièrj Mari : Kosa la Bib i di d’su li ?
Sak la Bib i di
La Bib i di ke Mari, le momon Jézu, la gingn in gran loneur ke la ariv in seul foi : la tonm ansint kan li té ankor vièrj. Mirak la té finn anonsé dann liv Izai é Matieu èk Luk la ékri dan zot liv sak la éspasé.
Dan in profési su le nésans le Mési, Izai lavé di : « Le ti manmzèl va tomn ansint é va gingn in garson, é èl va apèl ali Émanuèl » (Izai 7:14). Dann liv Matieu, ke lé inspiré par Bondieu, la di ke profési la lété pou Mari. Kan li la ésplik par koman gras le mirak li la tonm ansint, li la ajouté : « Tousa la arivé pou réalizé sak Jéova lavé anonsé avèk son profèt : “La vièrj a va tonm ansint é va gingn in garson, é nou va apèl ali Émanuèl”, sa i ve dir “Bondieu lé avèk nou” » (Matieu 1:22, 23).
Dan son liv, Luk osi la ésplik par koman Mari gras in mirak, la tonm ansint. Li la ékri ke Bondieu la anvoiy lanj Gabrièl « la kaz in vièrj ke té fiansé èk in bonom té apèl Jozèf, in désandan David ; é le non le vièrj lété Mari » (Luk 1:26, 27). Mari li mèm la di ke li lété vièrj. Kan lanj la anons a èl ke li té sa ni le momon Jézu, le Mési, èl la poz késtion la : « Koman sa i va arivé alor ke moin na poin bann relasion sèksuèl èk in bonom ? » (Luk 1:34).
Koman in fam vièrj la fé pou tonm ansint ?
Sé par léspri sin, la fors ke Bondieu i utiliz ke Mari la tonm ansint (Matieu 1:18). Lanj la di èk Mari : « Léspri sin va ni su ou, é le puisans le Tré o va fé lombraj pou anpar aou. Sé pousa le zanfan ke va nèt i va apèl ali sin, le Garson Bondieu b » (Luk 1:35). Bondieu la fé in mirak pou mèt la vi son garson dann vant Mari, é sé komsa li la tonm ansint.
Poukosa sé in fam ke lété vièrj ke té doi gingn inn ti baba ?
Si Bondieu la choizi in fam vièrj pou fé nèt Jézu, sé pou ke li nana in kor parfé. É komsa, Jézu té gingn libèr bann zumin le péché èk la mor (Jan 3:16 ; Ébreu 10:5). Bondieu la mèt la vi Jézu dann vant Mari. Aprésa, kan la vi Jézu la komans dévlopé dann vant, lé sur léspri sin la protèj ali pou anpar ali kont le péché (Luk 1:35).
Sé komsa ke Jézu lé né parfé, kom Adan lété avan ke li té i pèch. La Bib i di su Jézu : « Li la pa fé bann péché » (1 Pièr 2:22). Kom Jézu lété in moun parfé, li la gingn donn son vi kom ranson pou pèy le péché èk la mor bann domoun (1 Korintien 15:21, 22 ; 1 Timoté 2:5, 6).
Èske Mari la rès vièrj ?
La Bib i ansègn pa ke Mari la rès vièrj tout son vi. Olèrksa, i di keMari la gingn dot marmay (Matieu 12:46 ; Mark 6:3 ; Luk 2:7 ; Jan 7:5).
La Bib i ansègn ke Jézu lavé dot frèr é seur.
Èske le mirak la nésans Jézu i apèl Limakulé Konsépsion ?
Non. Dapré la New Catholic Encyclopedia, le kroiyans Limakulé Konsépsion « sé kroir ke depui le bann premié débu la vi la vièrj Mari, depui ke li lété dann vant son momon, li la pa gingn le PÉCHÉ ADAN. Apar li tout bann domoun i gingn in kor ke na péché [...]. Par kont Mari, rienk li touseul, la gingn la GRAS BONDIEU, pou ke le péché Adan i souy pa li » c.
Seulman, na okin plas dan la Bib i ansègn ke Mari lété protéjé kont le péché Adan (Psom 51:5 ; Romin 5:12). Dayeur, le loi Moiz té oblij ke bann momon té donn in sakrifis pou le péché apré le nésans inn ti baba. Sé sa mèm ke Mari la fé, é sa i mont anou bien ke le péché lavé souy ali (Lévitik 12:2-8 ; Luk 2:21-24). La New Catholic Encyclopedia i di : « Na okin plas dan la Bib i trouve Limakulé Konsépsion [...]. Sa sé in lansègnman Légliz. »
Koman nou doi konsidèr Mari ?
Mari lé in légzanp pou son manir mèt pa li su la oteur, pou son foi, pou son lobéisans, èk son lamour pou Bondieu. I ankouraj anou suiv son légzanp ke lé anparmi bann fidèl sèrviteur Bondieu (Ébreu 6:12).
Lé vré, Mari ali touseul la gingn in mision éspésial, èt le momon Jézu, mé la Bib i ansègn pa ke nou doi ador ali ou pri ali. Jézu la pa mont son momon in réspé plus ki fo, é li la pa demann son bann disip fé sa. An vré, rienk dann zévanjil i parl Mari é in foi seulman dann liv bann Zakt. I parl pa d’li dan bann 22 zot liv ke i apèl le Nouvo Téstaman (Akt 1:14).
Na okin plas dan la Bib i di ke bann premié krétien té mont Mari réspé plus ki fo, é anplus parl pa ador ali. Olèrksa, la Bib i ansègn ke bann krétien i doi ador rienk Bondieu (Matieu 4:10).
a Dann profési Izai, le mo ébreu alma lé tradui par « jeun fiy », i ve dir soi in manmzèl ke lé vièrj oubien in manmzèl ke lé pa vièrj. Pourtan, Matieu inspiré par Bondieu, i utiliz le mo grèk parténos. Le mo la lé plu prési é i ve dir « vièrj ».
b Na detroi i ve pa i di « Garson Bondieu ». Pou zot, kozé komsa i ve dir ke Bondieu la gingn bann relasion sèksuèl èk in fam. Mé sé pa sak la Bib i ansègn. Olèrksa, i apèl Jézu « Garson Bondieu » é « premié né dan tout la kréasion » parske li lé le premié é le seul ke Bondieu la kré dirèkteman (Kolosien 1:13-15). Dayeur, kan la Bib i parl Adan, le premié bonom, i di osi « garson Bondieu » parske Bondieu la kré ali osi (Luk 3:38).
c Segond édision, volum 7, paj 331.
Agard sa osi…
BANN KÉSTION LA BIB I RÉPONN
Èske Mari sé le momon Bondieu ?
La Bib é listoir su le vré relijion krétien i donn in répons klèr su se kroiyans la.
