Kare e rauka i te au arataki e te au akaaerenga o teianei ao i te akatupu i te ʼau. Maata ua atu te au tamaki kino pakari e tupu nei i teia tuatau i to te tuatau o te Tamaki II o te Ao. Vaitata e rua pirioni tangata​—mei te kota o te tangata i teianei ao—​e noo ra i te ngai te tupu ra te tamaki.

 Eaa te tumu kare e rauka i te tangata i te akatupu i te ʼau? Eaa ta te Pipiria e akakite maira?

1.  1. Te akaari nei te tangata i te au tu kia kore ratou e akatupu i te ʼau. Kua totou mai te Pipiria e ka “riro te tangata nei ei akaperepere ia ratou uaorai, ei noinoi, ei akatietie, ei nengonengo, . . . ei viivii, . . . ei akaatikau koreromotu ra, . . . ei mako kore, ei rotoriri, . . . ei māro, ei ngakau akateitei.”​—2 Timoteo 3:2-4.

2.  2. Kare e rauka i tetai tangata me kore ei pupu tangata i te akatikatika i to ratou manamanata ma te kore te tauturu a Tei Anga mai ia ratou, te Atua ko Iehova. a Te akakite maira te Pipiria e “kare tei te tangata e aere nei, i te akono i tona uaorai takainga tapuae.”​—Ieremia 10:23.

3.  3. Tei raro ake teianei ao i te akatereanga a tetai tutara ririnui e te kino, ko Satani te Tiaporo, ko tei “pikikaa i to te ao katoatoa nei.” (Apokalupo 12:9) Me ka “vai ua nei rai to te ao ravarai i raro ake i taua vaerua kino ra,” ka vai ua rai te tamaki.​—1 Ioane 5:19.

 Te akapapu maira te Pipiria kia tatou e kare e rauka i te tangata i te akatupu i te ʼau, mari ra na te Atua e akatupu i te reira.

•   “Kua kite oki au i te au akakoro anga taku i akakoro ia kotou nei, te tuatua mairā Iehova, e akakoro anga au ïa, kare to te kino, kia oronga atu au ia kotou i te openga ta kotou i manako ra.”​—Ieremia 29:11.

 Akapeea te Atua me akatupu i taua taputou ra? “Na te Atua au e akaparuparu ia Satani.” (Roma 16:20) Ka taangaanga te Atua i tetai kavamani i te rangi, ta te Pipiria e taiku ra e ko “te basileia o te Atua,” te ka akatupu i te ʼau i te ao katoa. (Luka 4:43) I raro ake ia Iesu Karaiti, te Ariki o taua Patireia, ka apiiia te tangata kia noo ʼau ua.​—Isaia 9:5, 6.

•   Kia kite maata atu, e tatau i te atikara “Eaa ta te Patireia o te Atua ka Akatupu?”