HĀPĪ 6
He aha te meꞌe e piri atu ena e poreko ena taꞌa poki
“Te ŋā poki he mahia e tahi mai i a Iehoha.” (Salmo 127:3)
E poreko ena te poki raꞌe, he koa te matuꞌa e peira ꞌā he tikeꞌa pe nei ē, he aŋa e tahi. Peaha he uꞌi iho, ꞌina he hora o rāua mo noho e he rohi-rohi i te aŋa era he hapaꞌo te rāua poki. I te meꞌe era ꞌina he haka ora, he riri hōrou, he haka viku, he haka teŋa te hihi, e i te ŋā meꞌe nei, he tuꞌu ki te roa era mo hetu ararua. Oīra hokorua kōrua ana kimi te raveꞌa mo uꞌi, mo hapaꞌo te kōrua poki e peira ꞌā te kōrua haīpoīpo. ¿Pe hē te roŋo o te Puka o te ꞌAtua ana haꞌūꞌū atu mo haka tere riva-riva i te ŋā meꞌe nei?
1 RAHI NO TE MEꞌE KA PIRI ATU ENA E POREKO ENA TE POKI
TE MEꞌE KĪ E TE PUKA O TE ꞌATUA: “Te here e haka ꞌuhu rō ꞌā e he meꞌe riva nō te meꞌe mo aŋa [...], ꞌina he kimi i te meꞌe moꞌona nō, ꞌina he riri hōrou” (1 Corintios 13:4, 5). Pahe matuꞌa vahine, e poreko iho ena taꞌa poki he meꞌe tano mau ꞌā mo haŋa koe mo hapaꞌo rahi i a īa. I te meꞌe nei, peaha taꞌa kenu he manaꞌu ꞌina koe he tapa i a īa, oīra ꞌina ko rehu mo tapa takoꞌa koe i taꞌa kenu. Hai haka ꞌuhu e hai riva ana haka tikeꞌa, ko haŋa riva-riva ꞌā koe mo haꞌūꞌū atu e īa, e he meꞌe nui-nui moꞌou, mo hapaꞌo takoꞌa e īa i te kōrua poki.
“Ko kua kōrua e te kenu ē, e noho e oho i muri i te kōrua viꞌe, hai aŋi-aŋi riva-riva o ruŋa i a rāua” (1 Pedro 3:7). Mo ai ko koe te matuꞌa tane, e aŋi-aŋi riva-riva pe nei ē, taꞌa viꞌe i te hora nei he rahi taꞌana aŋa i te hapaꞌo haŋa i te poki. Peaha he ŋaroꞌa ko rahi ꞌā te aŋa i ruŋa i toꞌona hakari, ko rohi-rohi ꞌā e ko tuꞌu ꞌā ki te roa era ꞌina e tahi meꞌe haŋa toe, i te aŋa nui-nui nei he matuꞌa. Nā he tuꞌu te mahana he riri moꞌou, no atu nei meꞌe ꞌina koe ko riri o te ai “te taŋata haka ꞌuhu i te riri, ata hau te riva ki te taŋata pūai” (Proverbios 16:32). Ka aŋi-aŋi riva-riva he aha taꞌana meꞌe haŋa, ꞌai ka aŋa rō (Proverbios 14:29).
TAꞌA MEꞌE MO AŊA:
-
Mo ai ko koe te matuꞌa tane: Ka haꞌūꞌū ki taꞌa viꞌe mo hapaꞌo te poki e peira ꞌā i te pō. Ka haka tano nō taꞌa meꞌe mo aŋa mo ata piri ki taꞌa viꞌe e ki taꞌa poki
-
Mo ai ko koe te matuꞌa vahine: Mo haŋa taꞌa kenu mo haꞌūꞌū atu mo hapaꞌo te poki, ka haꞌatiꞌa mo haꞌūꞌū atu. E mo ai ꞌina he tano atu pe hē a īa e aŋa era, ꞌina ko ture, ka hāpī hai here pe hē ana aŋa
2 KA HAKA HIO-HIO TE KŌRUA HAĪPOĪPO
TE MEꞌE KĪ E TE PUKA O TE ꞌATUA: “He riro ararua e tahi nō hakari” (Genesis 2:24). I nui-nui i oho era te kōrua huaꞌai, e uꞌi o rehu rō, a koe koīa ko tuꞌu hokorua ko te riro haŋa ꞌā e tahi nō hakari. Ka aŋa ka oho mo hio-hio te kōrua haīpoīpo.
E viꞌe haīpoīpo ē, e mauru-uru ki taꞌa kenu o te haꞌūꞌū e o te hokorua atu i te aŋa nei. Mo mauru-uru koe ki a īa he ŋaroꞌa a īa i te ora (Proverbios 12:18). E kenu, e kī ki taꞌa viꞌe e here rahi rō ꞌā koe ki a īa e he meꞌe nui-nui a īa moꞌou. E mauru-uru takoꞌa o te aŋa e aŋa era e īa moꞌou e mo te kōrua poki (Proverbios 31:10, 28).
“E tahi e tahi o roto i a kōrua, ꞌina ko kimi ko oho i tuꞌu riva nō, e kimi te riva o te rua takoꞌa” (1 Corintios 10:24). E aŋa koe paurō te mahana i te meꞌe hopeꞌa o te riva mo tuꞌu hokorua. E haꞌataꞌa te hora mo vānaŋa e mo haka roŋo i a kōrua. E kī takoꞌa te aŋa e aŋa era e īa, he taoꞌa e tahi. Mo haŋa taꞌa viꞌe o taꞌa kenu mo moe kōrua, ꞌina ko ꞌohumu. E tapa koe i te meꞌe haŋa o tuꞌu hokorua. Te Puka o te ꞌAtua ko uŋa ꞌā ki te nuꞌu haīpoīpo: ꞌIna e tahi o kōrua mo kī ki te rua ꞌina au kai haŋa mo moe tāua, mo ai ꞌina kōrua kai vānaŋa peira (1 Corintios 7:3-5). Oīra ka vānaŋa kōrua hai parautīꞌa o ruŋa i te meꞌe nei. Mo haka ꞌuhu mo oho e mo aŋi-aŋi riva-riva i te meꞌe taꞌatoꞌa nei, he hio-hio he oho te kōrua haīpoīpo.
TAꞌA MEꞌE MO AŊA:
-
ꞌIna ko rehu mo haka tapa te hora mo piri hoko tahi nō kōrua
-
Ka haka tikeꞌa te rahi o te kōrua here, hai meꞌe riki-riki pahe haꞌi, hoŋi, tiare e te tahi meꞌe
3 KA HĀPĪ KOE I TAꞌA POKI
TE MEꞌE KĪ E TE PUKA O TE ꞌATUA: “Mai te iti-iti haŋa ꞌā a koe i aŋi-aŋi i oho ai te puka o te ꞌAtua ꞌe e riva nō mo haka maramarama atu mo ora ꞌoꞌou” (2 Timoteo 3:15). Ka manaꞌu pe hē ka hāpī ena e koe ki taꞌa poki. Te ŋā poki paꞌi meꞌe haka kē mo aŋi-aŋi i te meꞌe taꞌatoꞌa, e peira ꞌā raꞌe ki toꞌona poreko mai. Mo haꞌauraꞌa atu, hora era i roto i te manava, te poki e riva era mo aŋi-aŋi te reꞌo o toꞌona matuꞌa, e he makenu-kenu i te hora e ŋaroꞌa era. Ka haka mahani mo taiꞌo mai te hora poreko era ꞌā, no atu te taꞌe aŋi-aŋi te vānaŋa, o te ai paꞌi, hai meꞌe nei he haŋa a īa mo taiꞌo ka nui-nui ka oho ena.
ꞌIna ko manaꞌu pe nei ē e iti-iti nō ꞌā taꞌa poki mo vānaŋa koe o ruŋa i te ꞌAtua. Ka pure ki a Iehoha i muri i a īa (Deuteronomio 11:19). E kori ena kōrua, ka vānaŋa o ruŋa i te meꞌe aŋa tahi era e te ꞌAtua (Salmo 78:3, 4). Ka nui-nui ka oho ena taꞌa poki, he aŋi-aŋi he oho te rahi o tuꞌu here ki a Iehoha, e he aŋi-aŋi pe hē ana here takoꞌa ki a Īa.
TAꞌA MEꞌE MO AŊA:
-
Ka pure ka nonoꞌi te maramarama mo hāpī ki taꞌa poki
-
Ka hāpī ka oho paurō te mahana te meꞌe haŋa era e koe mo aŋi-aŋi e īa ꞌe e aŋa peira mai toꞌona poreko haŋa ꞌā