Saltar al contenido

¿E riva mau rō te taŋata ko mate ꞌā mo ora haka ꞌou?

¿E riva mau rō te taŋata ko mate ꞌā mo ora haka ꞌou?

¿Pē hē ki taꞌa kī . . .

  • ꞌē-ē?

  • ꞌina?

  • pēaha?

TE MEꞌE KĪ E TE PUKA O TE ꞌATUA

“Te ꞌAtua e haka ora rō i te taŋata mai te mate” (Aŋa o te ꞌĀpōtoro 24:15).

TE HAUHAꞌA MO RAVAꞌA

Nō atu te rahi o te mamae he ravaꞌa koe i te haumārū ka mate ena te huaꞌai here ꞌāꞌau (2 Kōrinto 1:3, 4).

He kore tahi tuꞌu riꞌa-riꞌa o ruŋa i te mate (ꞌEvereo 2:15).

Te piri haka ꞌou ki taꞌa nuꞌu here ko mate ꞌā, he ꞌite koe he parautiꞌa mau ꞌā (Iovani 5:28, 29).

¿HE PARAUTIꞌA MAU ꞌĀ TE MEꞌE KĪ E TE PUKA O TE ꞌATUA?

ꞌĒ-ē, ꞌī he tapa atu e toru parautiꞌa:

  • Te ꞌAtua i aŋa te meꞌe ora taꞌatoꞌa. Te Puka o te ꞌAtua e kī rō ꞌā mai i a Iehoha te ora iŋa taꞌatoꞌa e oho mai era (Salmo 36:9; Aŋa o te ꞌĀpōtoro 17:24, 25). Mo ai ꞌāꞌana i vaꞌai te ora ki te meꞌe taꞌatoꞌa e riva nō mo haka ora i te nuꞌu ko mate ꞌā.

  • Te ꞌAtua i haka ora haka ꞌou rō i te nuꞌu mate o muꞌa ꞌā. E vaꞌu nuꞌu o muꞌa ꞌā —ŋā poki, taŋata, viꞌe, nuꞌu paꞌari— i haka ora haka ꞌou rō ꞌi ruŋa i te henua. Kē nuꞌu i mate iho nō ꞌe e tahi o rā ŋā nuꞌu ka hā mahana o te mate (Iovani 11:39-44).

  • Ko pohe riva-riva ꞌā te ꞌAtua mo haka ora haka ꞌou i te nuꞌu ko mate ꞌā. He enemī mau o te ꞌAtua te mate ꞌe mōꞌona te mate he toꞌa e tahi (1 Kōrinto 15:26). Te ꞌAtua ko haŋa riva-riva ꞌā mo haka kore i te toꞌa nei ꞌe he aŋa pē ira ka haka ora haka ꞌou era i te nuꞌu ko mate ꞌā. Ko haŋa takoꞌa ꞌā mo ora haka ꞌou ꞌi ruŋa i te henua te ŋā nuꞌu noho era ꞌi roto i tōꞌona manaꞌu (Job 14:14, 15).

KA ꞌUI ATU

¿ꞌO te aha tātou e korohuꞌa ꞌe e mate nei?

He ravaꞌa koe te pāhono ꞌi ruŋa i te Puka o te ꞌAtua i a GÉNESIS 3:17-19 ꞌe RŌMANO 5:12.