TAPUI 9
Evolucionbi quirina chani
CAN IMATA RANGUIMA
Caita yari: Alex imata quirinata ña mana yachanzhu. Paiga cai Allpa, chimandahuas tucui ima tiyashcata Dios tarabashcata quirin. Chasna ashahuas, Biologiamanda profesorga, evolucion sirtu ashcata yachachin. Alex mana pingaibi saquirina munanzhu, pai yuyan: “Estudiashca cientificoguna evolucion sirtu man nicpiga, ñucaga pi tani mana quiringahua”.
Alex ashaga libroguna nicllaichu evolucion sirtu ashcata quiringuima.
ALITA PINSARI
Maican runagunaga mana alita intindishallata evolucionbi, Dios tucuita rashcaibi quirinaun. Chasna ashahuas, imaraicu quirishcata mana shuccunata yachachina ushanaunzhu.
-
Maican runaguna yayaguna yachachishcamanda Dios tucuita rashcata quirinaun.
-
Shuccunaga escuelaibi yachachishcamanda evolucionbi quirinaun.
CAITA TAPURI
Hebreos 3:4 nin: “Tucui huasigunaga maican runas rashca man. Chasnallatami Diosca tucui caibi tiyaccunata rara”. Cai Biblia nishcata quiringuichu.
RUNAGUNA CAITA NIN: Cai mundu shuc manzhanayacta tugyashcaibi tiyai callarira. Cai tugyashcata ninaun Big Bang nisha.
1 Pita Big Bang nishcata tugyachira.
2 Imata mas ali an: Yangamanda tucui tiyai callarishcata quirina manashaga maican tucuita tarabashcata quirina.
RUNAGUNA CAITA NIN: Runaguna animalgunamanda shamun.
3 Runaguna mono animalguna shinamanda shamushca ashaga imahuata paigunamanda mas yuyayuc anchi.
4 Shuc robotta yuyayuc runa taraban. Chasna acpiga, runata rangahua manachu shuc yuyayuc minishtirin.
RUNAGUNA CAITA NIN: Evolucionga sirtu man.
5 Caita rimac runaga pai quiquinllatachu estudiashca.
6 Ashca yuyayuc runaguna evolucionbi quirishcamanda manachu shuccunahuas evolucionbi quirinaun.
“Caita yuyai: Sacha ñambita puriusha shuc gustu tablamanda huasita tupasha. Maican ruyaguna urmashcamandami cai gustu huasi casna tucushca nishachu pinsaringuima. Chiga mana sirtu chanma. Chasna acpiga, imaraicuta tucui cai munduibi tiyac yangamanda tucushcata quirishun” (Julia).
“Shuc tintata tarabac fabrica tugyacpi chi tinta tucui partibi talirishami shuc diccionario libro tucura nicpi quiringuimachu” (Gwen).
IMARAICUTA DIOSPI QUIRINI
Bibliaga nin “tucui shimita uyasha sirtuchu nisha yuyarisha camaichi” (1 Tesalonicenses 5:21). Caiga nisha ninmi mana cai yuyaigunallaibi quirina ashcata:
-
CAN PINSASHCALLAIBI: “Dios tiyashcatami sintini”.
-
SHUCCUNA QUIRISHCALLAIBI: “Ñucahuan causac runaguna Diospi quirinaun”.
-
CAITA QUIRI NIGLLAIBI: “Ñuca huasibiga Diospi quirina mangui nihuanaun”.
Shuccuna nishcata quirina randiga, can amullata imata quirinata ricuna angui.
“Runa aicha imasa ashcata profesor yachachicpi Yaya Dios sirtu tiyashcata mas quirini. Ñucanchi caran aicha parti causangahua minishtirishca man. Maicanbiga ñucanchi aicha ucuibi imasa ashcata mana musiarinchichu. Caita yachana balishca man” (Teresa).
“Shuc barcota ricusha, aututa ricushahuas tapurini: ‘Pita caita rara nisha’. Shuc aututa rangahuaga yuyayuc runa minishtirin. Autu puringahua tucui partigunami ali churashca ana an. Autuga shuc tarabacta minishtin, chasnallatami runaguna tiyangahua shuc tarabacta minishtinaun” (Richard).
“Cientificoguna yachachishcata mas intindishaga evolucion nishcata mas mana quiric arani. [...] Evolucionbi quiringahua Diosta quirinamandas mas yali feta minishtinchi” (Anthony).
CAITA YARI
Cientificoguna ashca timputa estudiashahuas, evolucionmanda chican chican yuyaiguna tiyan. Estudiashcaguna ashahuas paigunapura mana pariu yuyanaunzhu. Chimanda, imaraicuta evolucionda sirtuta shina quirishun.