Huata 2005​pica, India llactamanda Sowbhagya shuti huarmipaca paipa juyashca cusami huañurca. Paipa cusaguca paitapash, quimsa huatagucunata charij paipa ushigutapash alipachami cuidashcarca. Ushiguca Meghana shutimi carca. Shinapash, cunanga cai huarmigupa ñaupaman catingapaj culquiguta gananaca shinllimi carca.

 Ashtahuanbash, Sowbhagyataca shuj gentecunaca na ricunayachinllu carca. Familiacunapash paita y paipa ushigutaca caridadta mañajcunata cuendami tratai callarirca. Shinallata, cangunaca shuj cargami canchi ninmi carca. Sowbhagyaca pipash consolachunmi minishtijurca. Chaimandami shuj iglesiaman ri callarirca. Shinapash chaipi gentecunaca pobre cashcamandaca paita nalicachishpami tratan carca. Shinallata trabajota mascashpapash maipipash na tarinllu carca.

 Paica ninmi: “Imatapash na rurai atinashpami huañungapaj munarcani. Shinallata, ñuca illajpi ñuca ushigu ashtacata sufrinata yachashpami, paitapash huañuchingapaj dicidirircani” nin. Llaquicunahuan ña na aguantashpami Sowbhagyaca venenota randingapaj rirca.

 Trenbi huasiman tigrajujpica, Elizabeth shuti testigo de Jehovami paiman quimirishpa paihuan parlai callarirca. Sowbhagyaca trabajo illajmi cani nishpami parlarca. Chaimi Elizabethca trabajota mascashpa ayudanata, Bibliamanda yachachingapaj rijushcata parlarca. Sowbhagyaca ashtaca iglesiacunaman rishca carca. Shinapash, Bibliamanda yachachij cashcataca maipipash na uyashcachu carca. Chaimi paica ninanda manllarirca. Chaimandami Elizabethca ashtahuan yachajungapaj munashpaca ñucata visitangapaj shamungui nirca.

 Huasiman chayashpapash Sowbhagyaca huañunatami pensashpa catijurca. Shinapash shuj familiami paipa ushigutaca de viaje apashca carca. Chaimi paipa ushigu tigramujpi ishcandi huañungapaj shuyajurca.

 Ushi tigramungacamanga Elizabethpa huasimanmi rirca. Elizabethca cushijushpami chasquirca. Shinallata ¿Qué enseña realmente la Biblia? librotami ricuchirca. Sowbhagyaca paipa cusagu chairalla huañushcamandami, “Huañushcacunaca ¿imashinata can?” nishca capitulomandami ashtahuan yachajungapaj munarca. Chai punllallatami Bibliata yachajui callarirca.

 Ashtahuanbash Elizabethca chaishuj semanaca asambleatami charinchi, chaiman shamungui nishpami invitarca. Chai asambleapi yachachishcacuna paipa shunguman chayajpimi, paica testigo de Jehová tucungapaj munarca. Huasiman tigrajushpaca trabajotapashmi tarirca.

 Sowbhagyaca Bibliamanda yachajushpami catirca. Chaimi cunanga causashpa catingapaj munarca. Tiempohuanga Sowbhagyaca bautizarircami. Jipaca paipa ushgupashmi bautizarirca. Cunanbica ishcandimi precursora regular can. Shinallata, paipa ushiguca India llactapa oficina de traducionbimi voluntaria a distancia shina sirvin.

 Sowbhagya y Meghanaca trenbi rijushpa Bibliamanda Elizabeth cushilla parlashcataca ninandami agradicin. Pero ashtahuanga Jehová Diostami agradicin. Meghanaca ninmi: “Bibliamanda chai punllana na yachajushpaca, ña huañushcami canchiman. Shinapash cunanga cushillami canchi. Ñucapash, ñuca mamitapash papitota ugllashpa chasquingapaj, Jehová Diosmanda yachachingapaj, ñucanchicunata imashina salvashcata parlangapami munanchi” nin.