Ñucaca Finlandia llactapi Tampere nishca llactamanda carulla pushtupimi viñarcani. Tranquilo pushtugumi carca. Ñuca familiaca religionbi chapurinataca na gushtanllu carca. Shinapash paicunaca ñucanchicunataca ali gentecuna cachunmi yachachin carca. Ñuca mamitaca Alemania llactamandami. Chaimandami huahua cashpaca ñuca abuelocunahuan Alemania llactapi yalin carcani.

 Pugllaicunataca siempremi gushtashcani. Chaimandami shuj shuj pugllaicunata uchillamandapacha pugllan carcani. 14 huatacunata charishpaca tenis nishca pugllaitalla pugllangapami decidirircani. 16 huatacunata charishpaca ashtahuan pugllanata yachajungapami punllapica ishcai o quimsa viajeta entrenan carcani. Punllapica shuj entrenadorhuanmi yachajun carcani. Cutin chishicunaca ñucallami yachajun carcani. Tenista pugllanata ashtahuan yachajushpaca ashtahuanmi gushtai callarircani. Chaimi tenista pugllanata ashtahuan yachajungapaj munarcani. Amigocunahuan llujshishpa huaquinbi cervezata ufiashpapash drogacunapi, nali viciocunapica nunca na urmashcanichu. Ñucapaca tenista pugllanami tucuita yali importante carca.

 17 huatacunata charishpaca Asociación de Tenistas Profesionales nishca organizacionman yaicushpami pugllai callarircani. a Tauca campeonatocunapimi ganarcani. Chaicunamandami ñuca llactapica rijsishca tucurcani. 22 huatacunata charishpaca mundo enteromanda 50 alipacha puglladorcunapurapimi carcani.

 Alipacha pugllanata yachaimandami tauca huatacunata ashtaca ashtaca llactacunapi pugllai usharcani. Shina viajashpa purijuimandami juyailla pushtugucunata rijsircani. Shinallata drogacuna, llaquicuna mirajushcatami ricurcani. Cai alpatapash manllanaita mapayachinajushcatapashmi cuenta urmarcani. Por ejemplo Estados Unidospi cajpica huaquin pushtucunamanga ama ringuichichu, yapa peligrosomi can nishpa villarca. Chaicunata uyashpaca llaquillami sintirin carcani. Ñuca gushtashcatapacha rurajushpapash ñucalla cashpaca llaquillami sintirin carcani.

 Ñuca novia Sannami testigo de Jehovacunahuan Bibliamanda yachajui callarishcarca. Paica Taita Diosmanda yachajunataca gushtanmi carca. Chaimi Bibliamanda ama yachajuichu nishpaca na nircani. Ñucanchica 1990 huatapimi cazararcanchi. Cazarashcamanda shuj huata jipami paica bautizarirca. Ñucaca Dios tiajtaca crinmi carcani. Shinapash Diosmandaca na imagutapash ruranllu carcani. Alemaniamanda ñuca abuelitaca siempremi Bibliataca liin carca. Paimi ñucataca Taita Diosta mañanata yachachihuashcarca.

 Shuj punllaca shuj testigo cusahuarmimi ñucanchitaca paicunapa huasiman richun invitarca. Chaipimi huauquiguca ñucahuan Bibliamanda parlashpa “tucurimui punllacunapa profeciacunamanda parlahuarca” (2 Timoteo 3:1-5). Chaicunamanda yachajushpami imashpa mundo enteropi ashtaca llaquicuna mirajushcata cuenta japircani. Chai punllaca ñana Bibliamandaca parlashpa catircanchichu. Shinapash chai punllamanda vichaimi Karihuanga siempre Bibliamandaca parlan carcanchi. Pai yachachishcacuna cabalpacha cashcatami cuenta urmarcani. Shinapash ñucaca casi siempremi viajashpalla yalin carcani. Ocupado ocupado caimandami huauqui Karihuanga na cada rato tupari ushan carcani. Shina cajpipash ñucata yachachinataca huauqui Karica na saquircachu. Bibliata yachajujushpaca ñucaca ashtaca tapuicunatami ruran carcani. Chai tapuicunatami huauqui Karica cartaguta escribishpa contestahuan carca. Ñucanchi charishca ashtaca ashtaca tapuicunataca Biblia alipacha contestajtami intindircani. Bibliapi yachachishcacunataca asha ashami yachajushpa catircani. Taita Diospa Reinolla shamuj punllacunapi cushilla causaita caramunatami yachajurcani. Taita Diospa shuti Jehová cashcata yachajushpa, shinallata imacunatalla ñucanchimanda rurashcata yachajushpaca ninandami cushijurcani (Salmo 83:18, NM ). Ashtahuanbachaca ñucanchita salvangapaj Jesús huañushcata yachajushpami ninanda cushijurcani. Jehová Dios Jesusta huañuchun cachamushpaca ñucanchita ninanda juyaimanda cachamushcatami yachajurcani (Juan 3:16). Shinallata Jehová Diospa amigo tucushpa paraíso alpagupi para siempre causai ushashcatapashmi yachajurcani (Santiago 4:8). Chaimandami ñucaca Jehová Diosta agradicingapaca ¿imatata rurana cani? nishpa tapuri callarircani.

 Ñuca imacunatalla rurajushcatami pensari callarircani. Bibliapica imagutapash carajcunalla ninanda cushijujtami yachajurcani. Chaimandami Bibliapi yachachishcacunataca shujcunamanbash parlangapaj munarcani (Hechos 20:35). Tenis nishca campeonatocunapilla yalimandami huasipica na yalin carcani. Huatapica 7 quillacunatashnami canllapi yalin carcani. Familiahuan imata rurana cashpapash ñucaca siempremi ñuca pugllaicunapira pensarijun carcani. Chaimi ñuca causaipi cambianapacha cashcata cuenta japircani.

 Tenista pugllashpa ashtaca culquita gananapa randica Jehová Diosta sirvinatami dicidircani. Chaita gentecuna yachaj chayashpa ñucata na alicachishpa ricunataca alimi yacharcani. Shinapash ñucapaca Jehová Diospa amigo cana, para siempre causai ushanami culquitapash, premiocunatapash yali ashtahuan importante carca. Chaimandami ñucaca gentecunapa nishcacunataca na cazushachu yashca pensarircani. Chaica ñuca decisionmi carca. Ñucataca Salmo 118:6​pi nishca shimicunami tucuita aguantachun ayudahuarca. Chaipica Jehová Dios “ñucahuan cajpimi, maijan runa ñucata llaquichinatapash na manllasha” nijunmi.

 Chai tiempocunapimi huaquin empresacunamanda gentecunaca ñucataca paicunapa pugllachun contratangapaj munahuarca. Paicunata cazushpaca ashtahuanmi tenista pugllashpa cati ushana carcani. Shinallata ashtaca huatacunatami culquipash na faltaj, imacunapipash na preocuparishpa causaiman carcani. Shinapash ñami shuj desicionda agllashca carcani. Chaimi paicunataca na pugllashachu nircani. Ashtahuangarin Asociación de Tenistas Profesionales nishca organizacionmandami llujshircani. Bibliatami ashtahuan yachajushpa catircani. Ñucaca 2 de julio de 1994 huatapimi bautizarircani.

 Jehová Diosta rijsingapaca ñucaca na imapash jatun llaquicunata chimbapurana tucurcanichu. Shinallata Bibliamanda yachajuna yuyaitapash na charircanichu. Ñucataca na imapash faltahuanllu, alimi causani yashpami purin carcani. Shinapash Jehová Diosmandaca na yashcapimi yachajui callarircani. Jehová Dios paimanda yachajuchun munashcatami cuenta japircani. Bibliamanda yachajuimandami Jehová Dios ñucanchicuna imata rurachun munashcata yachajurcani. Cunanbica ñucapash, ñuca familiapash cushillapachami causanchi. Ñuca quimsandi huahuacuna Jehová Diosta sirvinajujpimi ninanda cushijuni.

 Tenista pugllashpaca cushillami yalini. Ashtaca huatacunatami tenis pugllaicunahuan ricunata charij trabajocunapi trabajashcani. Ñucaca puglladorcunata entrenashpa, shinallata tenista pugllaj ucucunapi tucuita ricushpami trabajashcani. Cunanbica ñana pugllashpalla yalinichu. Pundaca ashtahuan tenista pugllanata yachajungapaj munaimanda, campeonatocunapi ganangapaj munaimandami semanapi ashtaca ashtaca horascunata entrenashpa yalin carcani. Shinapash cunanbica Jehová Diosmandami ashtaca ashtaca horascunata villachishpa yalini. Shuj gentecunapash Jehová Diosta rijsishpa, Bibliapi yachachishcacunata paicunapa causaipi pactachishpa causachunmi munani. Jehová Diospa amigo caimandaca tucui shunguhuanmi cushijuni. Shinallata jipa punllacunapi Jehová Dios juyailla causaiguta caranamanda villachishpami ninanda cushijuni (1 Timoteo 6:19).