Huaquin gentecunaca paicunapa causaipi llaqui apashca jiparami alita o nalita ruranajushcataca cuenta japin. Ñucatami shina pasahuarca. Ñucaca Barcelona llactapimi viñarcani. España llactamanda Barcelona llactaca jatunbachami. Ñuca familiaca Somorrostro nishca pushtupimi causarca. Somorrostro pushtuca playa manñapimi quedan. Cai pushtutaca gentecunaca drogacunata jatun nishpa, shuhua shuhua pushtu nishpami rijsin carca.

 Ñuca 9 huauquipanicunamandaca ñucami mayor cani. Pobre pobremi carcanchi. Chaimi ñuca taitaca, tenis nishcata pugllaj pushtuman uchilla pelotacunata yalichishpa trabajachun cachahuarca. 10 huatagucunatalla charishpapash 10 horascunatami trabajashpa yalin carcani. Chaimandami ñucaca escuelamanbash na ri usharcani. 14 huatacunata charishpaca jirrucunata ruraj pushtupimi trabajai callarircani.

 1975 huatapica cuartelmanmi rina tucurcani. Chai tiempocunapica, España llactapica cuartelman rinaca obligatoriomi carca. Cushilla yalisha yashpami Melilla llactapi La Legión española nishca cuartelman ringapaj anotarircani. Melilla llactaca África llactapimi can. Chai tiempocunapimi ñucaca ashtahuan drogacunata chupai callarircani, tragotapashmi ashtahuan ufiai callarircani.

 Cuartelmanda llujshishpa Barcelona llactaman tigrashpaca shuj pandillatami formarcani. Imacunatapashmi shuhuan carcanchi. Chai shuhuashca cosascunataca drogacunata randingapami jatun carcanchi. Ñucaca LSD nishca drogata, anfetaminas nishca drogatapashmi chupai callarircani. Huarmicunahuan puñushpa, ufiashpa, apostashpallami causan carcani. Shina nali cosascunata rurajuimandami millai millaipacha tucurcani. Maiman rishpapash cuchillota, jachata, machetetapash apashpami rin carcani. Chaicunataca imapash pasajpi ñapash llujchingapami apan carcani.

 Shuj punllaca shuj carrotami shuhuanajurcanchi. Chaita cuenta japishpami policiaca ñucanchitaca ñapash cati callarirca. Shuj peliculata ricujunshnami carca. Policiacunaca 30 kilometrocunata ninanda catishca jipami disparai callarirca. Chaimi ñucanchica chocarircanchi. Chai jipaca pacajungapami calparcanchi. Ñuca taita chaita yachaj chayashpami huasimanda calpachihuarca.

 5 huatacunatami callecunapi causarcani. Ñucaca huasi ñaupacunapi, carro ucucunapi, parquecunapi tiaj asientocunapi, panteongunapipashmi puñun carcani. Huaquin punllacunataca shuj jatun utujupimi causarcani. Ñuca causaipi imata ruranatapash na atinajurcanichu. Ñucataca pipash na juyahuanllu yuyanmi carcani. Drogarishca horasca maquicunatami cuchurin carcani. Cuchurishca señalcunataca cunangamanmi charini.

 28 huatacunata charijpimi ñuca mamaca huasiman tigramui nishpa nihuarca. Chaimi huasiman tigrarcani. Ñuca mamitataca ñana nalicunataca rurashachu, cambiarishami nircanimi. Shinapash chaita pactachingapaca ashata pararcanimi.

 Shuj chishica ishcai testigo de Jehovacunami ñucanchi huasiman shamurca. Chaimi paicunahuan parlai callarircani. Chaita ricushpaca ñuca taitaca paicunataca ama uyaichu, punguta vichai nishpami caparihuarca. Ñucaca caita o chaita rurai nihuachunga na munanllu carcani. Chaimandami ñuca taita nishcataca na cazurcani. Testigo de Jehovacunaca 3 uchilla librocunatami saquihuarca. Paicunataca maipita tandanajunguichi nishpami tapurcani. Huaquin punllacuna jipami Tandanajui huasimanga rircani.

 Tandanajuimanga tucuicunami ali mudarishca yaicunajurca. Chaitaca ninandami alicachircani. Shinapash ñucaca ajchapash largo largo, barbas junda, mapa mapami carcani. Pinganayajpimi canllapi quedarcani. Shinapash ñapashmi ñuca punda amigo Juanda rijsircani. Juanbashmi pundaca pandillero carca. Paica ñana pundashna churajushcachu carca, cunanga ali mudarishcami carca. Juanga ña shuj huatatami testigo de Jehová cashcarca. Paita chaipi ricushpaca na manllashpami tandanajuimanga yaicurcani. Chai punllamanda vichaimi ñuca causaica cambiarirca.

 Bibliamanda yachajui callarishpaca Jehová Diosta cushichingapaj munashpaca, ñana millai millai cana cashcata, nali ruraicunatapash saquina cashcatami cuenta japircani. Shinapash na facilchu carca. Jehovata cushichingapaj munashpaca ñuca causaipi ashtaca cambiocunata rurana cashcata, ñuca yuyaicunatapash mushujyachina cashcatami cuenta japircani (Romanos 12:2). Pandarijpipash Jehová Dios llaquishpa perdonanlla cashcata yachanaca ninandami ayudahuarca. Ñuca causaipi ninanda pandarishca cajpipash Jehová Dios ñucata perdonangapaj munashcatami cuenta japircani. Jehová Diosmanda yachajushpaca tucui shunguhuanmi cushijurcani. Ciertopacha shuj Dios tiajta, ñucatapash ninanda juyajtami yachajurcani (1 Pedro 5:6, 7).

 Chaita yachajushpami ñuca causaipica cambiocunata rurai callarircani. Shuj punllaca tabacota chupana nali cashcatami Bibliahuan yachachihuarca. Chaimi ñucaca “Jehová Dios tucuipi limpio cachun munajpica, maimandami tabacota chupanataca saquina cani yuyarcani” (2 Corintios 7:1). Chaimi tucuilla tabacocunata basurapi shitarcani.

 Shinallata drogarinata, drogacunata jatunatapashmi saquina carcani. Shinapash chaicunata saquinami ñucapaca ashtahuan shinlli cahuarca. Chaicunata saquingapaj munashpaca ñuca amigocunamandami caruyana carcani. Paicunahuan tandanajuimandami espiritualmente ñaupaman catitapash na ushajurcani. Tiempohuanga Jehová Diospi, congregacionmanda amigocunapipashmi confiai callarircani. Paicunaca ñucamandaca ciertopachami preocuparin carca. Ciertopacha juyarijtaca ni maipipash na ricushca carcanichu. Tiempohuanga drogacunatapashmi saquircani. Shinallata Jehová Diosta cushichingapami pai munashcashna causai callarircani (Efesios 4:24). Ñucaca agosto de 1985 huatapimi bautizarircani.

 Bibliamanda yachajushpami shuhuanata, drogacunata chupanata, nali cosascunatapash saqui usharcani. Chai cosascunata rurashpa catishpaca talvez huañuimanmi carcani. Ñucapa huaquin amigocunataca jovenguna cajpillatami sida nishca ungüi japirca. Shinallata huaquingunataca drogata yapata chupajpimi shuj shuj ungüicuna japirca. Chai ungüicunamandami 30 yali amigocuna huañurca. Jehová Diospa yachachishcacunata ñuca causaipi pactachimandallami na paicunashna llaqui aparcani.

 Pundaca millai millai cashpami cuchillocunatapash, jachacunatapash apashpa purin carcani. Shinapash cunanbica gentecunaman Jehová Diosmanda yachachingapami Bibliata apashpa purini. Shina cambianataca nunca na pensarcanichu. Cunanbica ñuca huarmigundimi ashtahuan villachishpa yalinchi.

 Ñuca taita, ñuca mamapash na Testigocuna tucurcachu. Shinapash Jehová Diosmanda yachajuna ñucata ninanda ayudashcatami paicunaca cuenta japirca. Huaquimbicarin ñuca taitaca paipa amigocuna Testigocunamanda nali parlanajujta uyashpaca, uchallami na shina canllu nishpa difindin carca. Ñuca taitaca ñuca Testigo tucushcamanda ñuca causaipi alipacha cambiocunata rurashcatami cuenta japirca. Cutin ñuca mamitaca siempremi nihuan carca, pundamandallatami Bibliamandaca yachajuna cashcangui nishpa. Ñuca mamitaca ciertotami nijurca. Bibliamanda pundamandallata yachajushpaca alipachami canman carca.

 Drogacunata chupashpa, nali cosascunata rurashpaca cushilla causaitaca na usharinllu. Cunanbica Jehová Diosmanda gentecunaman yachachishpami cushillapacha sintiripani. Jehová Diospa yachachishcacunami ñucataca salvahuarca.