“Fin ñami chayamujun” nijta uyashpaca ¿imapita pensaripangui? ¿Imapash jatun rumi jahua cielomanda urmashpa cai Alpata tucuchijtachu pensapangui? Na cashpaca, mundo enteropi Alpa ushashcata huaglinata o imapash bombata tujyachishpa cai Alpata tucuchinatachu pensapangui? Chashnacunapi pensarishpaca huaquin gentecunaca ushashcatami manllarin. Cutin shujcunaca na crinllu. Shujcunacarin burlarinmi.

Shinapash Bibliapica cashnami nin tucurimui [“finga”, NM] chayamungami nishpa (Mateo 24:14). Chai tucurimui punllamanda o finmanda parlashpami Bibliapica “Armagedón” nin o, “Taita Diospa ninanda llaquichina punlla” nin (Apocalipsis 16:14, 16). Religiongunapash finmanda parlashpaca shuj shuj cosascunatami yachachin. Huaquingunaca jatunbacha llaqui tianata o imapash na crinai cosascunatami yachachin. Shinapash ¿imatata Bibliaca yachachin? Bibliaca fin tianata, fin ñalla chayamunata, gentecuna imashina salvarinatami villan. Shinaca fin ima cajta, fin chayamujpi ima tucurinata Bibliapi ricupashun.

1. ¿RUPASHPACHU ALPACA TUCURINGA?

   Bibliaca ninmi, Taita Diosmi ‘cai pachataca callari rumicunapa jahuapi churarca. Ima horapash na anchuringachu [“tucuringachu”, NM]’ nishpa (Salmo 104:5). Cai textopipash shuj textocunapipashmi intindichin, Taita Diosca na cai Alpata tucuchingachu, shuj gentecuna o imapash cai Alpata tucuchichunga na saquingachu nishpa (Eclesiastés 1:4; Isaías 45:18).

2. ¿IMA PUNLLAPACHA, IMA HORAPACHATA FINGA CHAYAMUNGA?

   Ashtacacunaca ninmi, finga na ima horapash chayamungachu nishpa. Shinapash Taita Diosca ña shuj punllata agllashcallami charin. Chaimandami Bibliapica nin: ‘Ima punlla ima horas chashna tucunataca, pipash na yachanllu. Jahua pachapi tiaj angelcunapash na yachanllu. Diospa Churi cashpapash na yachanichu. Ñuca Taitallami yachan. Ricuichi, ima punllacuna chashna tucunata na yachaimandami na puñushpa chapariana’ canguichi nishpa (Marcos 13:32, 33). Imashinami ricupanchi, fin chayamuna punllataca Taita Diosca alimi yachan.

3. ¿JAHUA CIELOMANDA IMAPASH RUMI URMAJPI O GENTECUNA CAI ALPATA HUAGLICHIJPICHU FINGA CHAYAMUNGA?

   Bibliapica ninmi: ‘Jahua pacha pascarijpimi shuj yuraj caballota ricurcani. Chai caballopi tiajuj runaca, imatapash Pactachij, Na Llullaj shutitami charirca. Shinallata manllanayai animaltapash, cai pachapi jatun mandajcunatapash, paicunapa soldadocunatapashmi ricurcani. Paicunaca, yuraj caballopi tiajuj runahuan, paipa soldadocunahuanbash macanajungapami tandanajushca carca’ nishpa (Apocalipsis 19:11-21). Apocalipsis libropica ashtaca chimbapuraicunatami churan. Shinapash, Taita Diosca paipa angelcunata cachamushpa paipa contracunata tucuchinataca alimi intindinchi.

1. GOBIERNOCUNA

   Bibliapica ninmi: ‘Jatun mandajcuna mandajui punllacunapimi, jahua pachapi causajuj Taita Diosca ima horapash na tucuchi tucuna mandana llactata churanga. Chai mandana llactataca na shuj llacta runacunaman cungachu. Chai mandajca cai tucuilla mandana llactacunatami ñutushpa tucuchinga. Ashtahuangarin paica causaita causaicaman  mandajungallami’ nishpa (Daniel 2:44). Imashinami cai revistapa página 4, Apocalipsis 19:11-21pi ricurcanchi, ‘jatun mandajcunaca’ tucuilla tandanajushpami ‘yuraj caballopi tiajuj runahuan, paipa soldadocunahuanbash macanajunga’ (Apocalipsis 19:19). Shinapash Diospa Reinomi mishanga.

2. GUERRACUNA, NALI RURAICUNA, LLAQUICHICUNA

   Bibliapica ninmi, Taita Diosmi mundo enteropi tucuilla ‘jatun macanajuicunata’ tucuchinga nishpa (Salmo 46:9). Proverbios 2:21, 22pipash cashnami nin: ‘Aligutalla rurajcunallami llactapica causanajunga. Ima pandatapash na rurajcunallami llactapica causashpa catinga. Ashtahuangarin Diosta na manllajcunaca sapimanda llujchinshnami shitai tucunga’ nishpa. Apocalipsis libropipash ninmi, Taita Diosmi ‘tucuita mushujta ruranga’ nishpa (Apocalipsis 21:4, 5).

3. TAITA DIOSTAPASH GENTECUNATAPASH LLAQUICHISHCA PANDA RELIGIONGUNA

   Taita Diosta catij tucuj gentecunamanda parlashpaca Jeremías 5:31pica ninmi: “Diosmanda villajcunapash, llullashpallami villanajurca. Curacunapash, paicuna munashcatami yachachinajurca. Shina cashcamandaca, llaqui chayamui punllapica, ¿imatashi ruranguichi?” nishpa. Shinaca Taita Diosmanda llullashpa yachachijcunaca ¿imata tucunga? Jesusca nircami: ‘Chai punllapica ashtacacunami ‘Apunchi Jesús, Apunchi Jesús ¿nachu canba shutipi canmanda villanajurcanchi? ¿Nachu canba shutipi rimashpa ayacunatapash llujchircanchi? ¿Nachu canba shutipi rimashpa imagutapash rurashpa ricuchircanchi?’ ninajungami. Shina ninajujpimi cashna nisha: “Cangunataca ima horapash na rijsishcanichu. Caimanda anchurichi”’ nishpa (Mateo 7:21-23).

4. NALITA RURANATA ALICACHISHPA NALITA APOYAJ GENTECUNA

   Jesusca nircami: ‘Michami cai pachaman shamurca. Gentecunaca, paicunapa imata rurashcapash nali cajpimi, michata juyanapa randica yana yana tutapishna causanatara ashtahuan juyarca’ nishpa (Juan 3:19). Noepa punllacunapica Taita Diosca tucuilla nali gentecunatami tucuchirca. 2 Pedro 3:5-7pica nircami: ‘Chashna causashcamandami cai pachapi ima tiashcapash, yacupi huashajushpa tucurishca. Ashtahuangarin cunanbi tiajuj cai pachapash, jahua pachapash Dios tiachun nishca punllacamanllami tianajun. Paita na manllaj runacunandi Dios ricuchishpa llaquichina punllacaman alichishca tianajun’ nishpa.

Imashinami ricupanchi, Noepa punllacunapi llaquichi tucushcataca shamuj punllacunapi Taita Dios llaquichina punllahuanmi chimbapuran. Shinapash yaripai, ñaupa punllacunapica tucuilla nali gentecunatami Taita Diosca tucuchirca, cai Alpataca na tucuchircachu. Shamuj punllacunapipash, nalita ruranata alicachishpa Taita Diospa contra tucushca gentecunatami Taita Diosca tucuchinga. Shinapash imashinami Noepa punllacunapica Noetapash, paipa familiatapash salvarca, shinallatami shamuj punllacunapipash ali gentecunataca salvanga (Mateo 24:37-42).

Tucui nali gentecuna tucurishca punllacunapi causanaca alipachami canga. Bibliapica ali noticiacunatami yachachijushca. Shinapash fin chayamungapaca ¿ashtaca tiempochu faltan? Salvaringapaca ¿imatata rurana capangui? Chaicunata yachangapaca Bibliapi shuj yuyaicunata ricupashun.