Tucuicunallatami familiapa ima minishtishcacunata randingapaj culquita minishtinchi (Proverbios 30:8). Huaquinbica imapipash ama llaqui apachunmi culquipash jarcashpa cuenda ayudan (Eclesiastés 7:12). Huaquinbica, culquimanda cusahuarmi parlarinaca na facilchu can. Shinapash culqui parlomandaca na fiñanajunachu capanguichi (Efesios 4:32). Ishcandimanda confianzata charinami capanguichi. Shinallata imata randigrijushpapash ishcandillatami parlarina capanguichi.

BIBLIAPICA NINMI: Cangunapuramanda maijambash huasita rurangapaj munashpaca, culqui pactanata na pactanatapash ¿nachu chaitara cuentanguichiman? nishpa (Lucas 14:28). Culquiguta charinajushpaca, chai culquihuan imata ruranata ishcandimi parlarina capanguichi (Amós 3:3). Ishcandimi imata randinata, mashna culquita gashtanatapash ricuna capanguichi (Proverbios 31:16). Masqui culquiyu cashpapash, imatapash yangata randinamandaca jarcarinami capanguichi. Ashtahuangarin na dibi tucushpa, culqui pactanagutalla ricushpami imagutapash randina capanguichi (Proverbios 21:5; 22:7).

CAITA RURAPANGUI:

• Ima minishtishcacunata randishca jipa culquigu puchujpica, imata ruranataca ishcandi parlapaichi

• Culquigu na pactajujpica imapash yanga gashtucunamandami jarcarina capanguichi. Yuyapai, restaurantepi micunapa randica huasipi yanushpa micunami ali canman

BIBLIAPICA NINMI: “Diospaj ñaupajpipash, gentecunapaj ñaupajpipash, ama juchachi tucungapaj munashpami, cashna aliguta ruranajunchi” nishpa (2 Corintios 8:21). Semanapi o quillapi mashna culquiguta japishcata, mashnata gashtashcatapash na pacashpami cusaman o huarmiman villana capangui.

Culquihuan imatapash ruragrijushpaca, nara imatapash rurashpallatami cusahuarmi parlarina capanguichi (Proverbios 20:18). Culquimanda ishcandillata aliguman parlarishpaca, cusahuarmi tranquilo, ali cachunmi ayudanga. Shinallata quiquin trabajashpa japishca culquiguta quiquinballa cashcata yanapa randica, ishcandipa cashcatami yarina capangui (1 Timoteo 5:8).

CAITA RURAPANGUI:

• Cada uno mashna culquita gashtai ushashcataca ishcandillata parlaripaichi

• Culquimanda problemacuna nara tiajpillatami, aliguman parlarina capanguichi