Ángel Miguel o shuj religionguna nishcashna “san Miguel” angelca Jesusllatami can. Jesús cai alpaman nara shamushca horas y jahua cieloman tigrashca jipapash cai shutihuan Jesusta rijsin cashcatami Bibliapica ricuchin. a Bibliapica ángel Miguelca Moisespa huañushca cuerpomanda Satanashuan fiñanajushcatami nin. Shinallata Miguelca shuj angeltapash ayudashcatami ricuchin. Cai angelca profeta Danielmanmi Taita Diospa partemanda shuj mensajeta curca (Daniel 10:13, 21; Judas 9). Ángel Miguelca Jehová Dioslla mandana derechota charishcata ricuchijmi can. Shinallata paica Diospa contracunahuanbashmi macanajun. Caicunata ruraimandami cai shutipi rijsishca cana derechota charin. Cai shutica “¿Pita Taita Dioshna Can?” nisha ninmi (Daniel 12:1; Apocalipsis 12:7).

 Jesusllatami angelcunata mandaj ángel Miguel can. ¿Imamandata shina nipanchi? Ricupashun.

•   Miguelca ‘angelcunata mandaj angelmi’ can (Judas 9). Angelcunata mandaj ángel nishpaca ángel Miguelca “tucui angelcunapa jefe” cashcatami ricuchin. Cai shimicunaca Bibliapica ishcai viajecunatallami ricurin. Shinallata mandaj ángel nishpaca shuj angelmandalla parlajushcatami ricuchin. Shinaca shuj angelllami tucui angelcunata mandaj can. Shuj versopica Jesús causarishca jipamanda parlashpami, “Señorllatami angelcunata mandaj angelpa vozhuan mandashpa [...] jahua cielomanda shamunga” nijun (1 Tesalonicenses 4:16, TNM). Cai textopica Jesusllata angelcunata mandaj angelpa vozta charishcatami ricuchin. Chaimandami Jesusllatami angelcunata mandaj ángel Miguelmi can nipanchi.

•   Ángel Miguelmi cielopi caj angelcunata mandajun. “Miguel shuti angelca, paipaj angelcunandimi, dragonhuan macanajurca”. Dragón nishpaca Diablohuan macanajushcatami ricuchin (Apocalipsis 12:7). Miguelca cielopica ashtaca autoridadtami charin. Chaimandami Bibliapica paica ‘angelcunata mandaj puramanda Miguel shuti ángel’ y “jatun mandaj Miguelmi” can ninmi (Daniel 10:13, 21; 12:1). Cai shimicunamanda parlashpaca Mushuj Testamentota estudiashca David Aune jarica ninmi: ‘Angelcunata mandaj puramanda Miguel shuti ángel’ y “jatun mandaj Miguel” nishpaca “cielopi angelcunata mandaj” cashcatami ricuchin ninmi.

   Bibliapica angelcunata mandangapaj autoridadta charij shuj angelpa shutimandapashmi parlan. Chaipica ninmi: ‘Apunchi Jesusca jahua pachamanda paipaj ninan ushaita charij angelcunandimi tigramunga [...]. Punchapamba nina chaupipimi paica tigramunga’ ninmi (2 Tesalonicenses 1:7, 8; Mateo 16:27). Shinallata 1 Pedro 3:21 y 22​pica Jesús cieloman rishcatami ricuchin. Y ‘chaipica angelcunapash, mandajcunapash, ushaita charijcunapash paita cazunajun’ ninmi. Taita Diosca ¿Jesustapash, Migueltapashchu angelcunata mandachun churashca? Na, ishcai mandajcuna cashpacarin randimandami macanajunman. Ashtahuanbash Jesús nishpa o Miguel nishpapash shuj personamandallatami parlanajunchi.

•   Ángel Miguelca “jatun llaqui” punllacunapimi “shayaringa” (Daniel 12:1). Daniel libropica ‘shayarina’ shimita utilizashpaca shuj rey imapash importante cosascunata ruragrijujta ricuchingapami utilizan (Daniel 11:2-4, 21). Jesucristotaca ‘Taita Dios Rimashca Shimi’ nishpapashmi rijsin. Paica ‘Jatun Mandajcunata Jatun Mandaj’ cashpami Taita Diospa contracunata tucuchishpa Diosta sirvijcunataca cuidanga (Apocalipsis 19:11-16). Ñallami ‘Ninan manllanayai llaqui tianga. Cai pacha tiai callarishca punllamandapacha cunangaman, chashna jatun llaquica nara tiashcachu’ chai punllacunapimi Jesusca Taita Diosta sirvijcunataca cuidanga (Mateo 24:21, 42).