ROALD, Elsebeth cristianokunan 50 watankupi hinaña kashanku, paykunan ura watakunalla Noruega nacionpa Bergen hatun llaqtanpi mana imamanta llakikuspa tiyarqanku. Paykunaqa Isabel, Fabian wawankunawan kuskan iñiq t’aqankupi Diosta servirqanku. Roaldqa umallin karqan esposantaq precursora, wawankunapas allintan Diosta serviqku.

Paykunan decidirqanku huk semana hunt’ata hawa llaqtapi predicamunankupaq. Chaymi 2009 watapi setiembre killapi, 18 watayoq Fabian wawankupiwan Nordkinn llaqtata viajarqanku, chayqa Lamar-qochaq qayllanpi Finnmark provinciapin tarikun, círculo polar ártico nisqaq Inti lloqsimuy kinrayninpi. Chaypin tarikun Kjøllefjord llaqta, chaypin predicarqanku huk ladokunamanta hamuq cristianokunapiwan. Roald nin: “Qallariy p’unchaykunaqa ancha kusisqan kasharqani tukuy ruwanaykunata saqespa Diospaq aswan askhata llank’aspa”, nispa. Ichaqa, ¿iman qhepaman sucederqan?

Roald willakun: “Finnmark nisqapi Mario sutiyoq precursormi tapuwarqan: ‘¿Astakuwaqchischu Lakselv llaqtachapi 23 publicadorkunaq  kasqan iñiq t’aqaman chaypi yanapakunaykichispaq?’” nispa. Roaldqa manan ima niytapas atirqanchu. Paymi nin: “Ñawpaqkunatan esposaywan rimarqayku maykunapichus yanapanata necesitaq llaqtaman rinaykupaq. Ichaqa wawayku wasimanta ripuqtinkuñan chaytaqa ruwayta munarqayku”, nispa. Chaypi predicasqan p’unchaykunan repararqan runakuna Diosmanta yachay munasqankuta. Chay raton yanapanata necesitarqanku manan qhepamanñachu. Roald nin: “Marioq niwasqanmi umallaypi kasharqan chaymi mana puñuytapas atiqchu kani”, nispa. Marion Roaldta familiantawan aparqan Kjøllefjord llaqtaman, chaypi Lakselv iñiq t’aqata reqsimunankupaq, chaypaqqa 240 kilometrotan carropi viajarqanku.

Andreas iñiqmasin Huñunakuna Wasita chay llaqtatawan paykunaman reqsichimurqan. Chaypi tiyaq iñiqmasikunan sumaqta paykunata chaskirqanku, Roaldta esposantawanmi nirqanku: “Maytan munaykuman familiaykichiswan hamuspa kaypi yanapawanaykikuta”, nispa. Andreasmi asirikuspa nirqan: “Ñan huk jefewan rimaramuykuña qanwan churiykipiwan llank’anamanta rimamunaykichispaq”, nispa. ¿Imatan chay familia ruwarqan?

Fabianmi nirqan: “Manan kaypiqa tiyayta munaymanchu”, nispa. Payqa manan munarqanchu huk llaqtachaman astakunanrayku iñiq t’aqapi wiñaymasi amigonkunamanta t’aqakuyta. Hinaspapas electricista kananpaq estudiontan manaraq tukurqanchu. Isabelta tapuqtinkun ichaqa nirqan: “¡Chaytapunin ñoqaqa ñawpaqtaraq munarqani!”, nispa. Chaywanpas kaytan nirqan: “Ichaqa pisi-pisimantan iskayayta qallarirqani. Tapukuqmi kani: ‘¿Amigoykunamanta llakikusaq chayri? ¿Iñiq t’aqallaypi qhepakuyman chayri? Kaypiqa manan imaypas pisiwanchu thakmi kanipas’”, nispa. Elsebethmi nillantaq: “Jehová Diospas chay llank’anata qowashankuman hinatan qhawarirqani, ichaqa mosoqyachisqayku wasiypi, 25 watapi tukuy imaymana rantikusqaykupi iman yuyaykurqani”, nispa.

Huk semana hunt’akuqtinmi Roald familiantin llaqtankuman kutipurqanku. Llaqtankuqa 2.100 kilometro hinapiraqmi kasharqan, chaywanpas yuyaykushallarqankun reqsimusqanku iñiqmasikunapi. Elsebeth nin: “Sapa kutillanmi Diosmanta mañakuq kani, reqsimusqayku iñiqmasikunawanpas telefonopin parlashallaq kani. Experienciakunatan willanakuq kayku fotokunatapas apachinakuq kayku”, nispa. Roaldmi nillantaq: “Sasan karqan chay p’unchaykunalla astakunaykupaq decidiyqa. Ñoqaqa familiayta imawan uywanaypin yuyaykunay karqan. Sapa kutillanmi Diosmanta mañakurqani, parlashallaqtaqmi kani familiaywan experienciayoq iñiqmasikunawanpas”, nispa. Fabianmi nillantaq: “Chaypi astawan yuyaykuqtiymi repararqani chayman astakunaypaq mana imapas hark’awasqanta. Diosmantan mañakurqani hinan pisi-pisimanta chay llaqtaman astakuyta munarqani”, nispa. ¿Isabelri? Astakuy yuyaywanmi precursora kapurqan, astawanmi Bibliatapas estudiarqan. Soqta killa qhepamantaq listoña kasharqan astakunanpaq.

Paykunaqa astawanmi munasharqanku huk llaqtakunapi yanapakuyta, chaymi chay yuyaywan llank’asharqanku. Allin llank’anayoqña Roald karqan chaypas jefenmantan huk watapaq permisota mañakurqan. Jefenmi ichaqa llank’ashanallanta munaspa nirqan iskay semanalla llank’ananpaq soqta semanataq samananpaq. Roald nin: “Pisillataña ganarqani chaypas aypawarqankun”, nispa.

Elsebeth nin: “Qosaymi niwarqan Bergenpi wasiykuta alquilaspa Lakselv llaqtapi wasita maskhamunaypaq. Sasaña karqan chayta ruway chaypas qhepamanqa atikurqanmi. Lakselv llaqtaman astakusqayku qhepamanmi wawaykuna kuskan p’unchay llank’anata tarirqanku, yanapakushankutaqmi gastokunawan”, nispa.

Isabelmi nin: “Precursora kasqayta hunt’anaypaqmi kuskan p’unchaypaq llank’anata maskharqani, ichaqa llaqta huch’uylla kasqanraykun mana tariyta atirqanichu. ‘Manachus hina tarisaqchu’ niqmi kani”, nispa. Chaywanpas payqa tukuy atisqanpin llank’aq, qallariy wata kasqankupin isqon llank’anakunapi karqan, chaykunawantaq gastonkunata pagarqan. ¿Fabianri? Paymi nin: “Estudioyta tukunaypaqmi yachaq hinalla huk llank’anaman haykunay  karqan, chaytan chay llaqtapi tarirqani. Electricista kanaypaq estudioyta tukusqay qhepamantaq kuskan p’unchayllapaq llank’anata tarirqani”, nispa.

Marelius, Kesia casarasqa cristianokunapas huk llaqtakunapin yanapaykuyta munarqanku. Marelius (29 watayoq) nin: “Asambleakunapi precursorkunapaq discursokuna experienciakuna iman yanapawarqan ñoqapas Diosta astawan serviyta munanaypaq”, nispa. Kesian (26 watayoq) ichaqa mana munarqanchu familianmanta t’aqakuyta. Paymi nin: “Munakusqay runakunamanta t’aqakuypi yuyaykuspan sinchita llakikuq kani”, nispa. Qosanpaqpas sasan karqan, payqa bacomantan qolqeta manukusqa wasinta prendaspa, chayta pagananpaqmi ch’isiyaq llank’anan karqan. Paymi nin: “Jehová Diosmantan mañakurqayku tukuy chaykunapi yanapawanankupaq, qhepamantaq huk llaqtaman astakurqayku”, nispa. Ñawpaqtaqa Bibliatan astawan estudiaqku. Qhepamanmi llank’anankuta saqepurqanku, wasinkuta vendepurqanku, 2011 wata agosto killapitaq Noruegaq Inti lloqsimuy kinrayninpi Alta llaqtaman astakurqanku, chaypin precursor kaspa yanapakushanku. Mareliusmi contador hina llank’an Kesiataq huk almacenpi.

Knut, Lisbeth casarasqa cristianokunan 30 watayoq hinaña kashanku, paykunan anchata admirakurqanku Anuariopi huk llaqtakunapi yanapakuq cristianokunamanta leespa. Lisbethmi nin: “Chay experienciakunan yuyaymanachiwarqanku. Chaymi tapukurqani: ‘¿Manachu ñoqaykupas huk nacionman riyta atiykuman yanapakuq?’, nispa. Chaywanpas niqmi kani: ‘Ñoqa hina común runaqa manachus hina chayta ruwayta atinmanchu’”, nispa. Chaywanpas kallpachakurqankun chayta ruwanankupaq. Knutmi nin: “Cuartoykutan venderqayku, qolqeta huñunaykupaqtaq mamaypa wasinman astakurqayku. Huk nacionpi Diosta serviy imayna kasqanta yachanaykupaqtaq Bergen llaqtapi inglés simipi iñiq t’aqaman ripurqayku suegraypa wasinpitaq tiyarqayku”, nispa. Qhepamanqa listoñan kasharqanku ñawpaqmantapacha yuyaykusqankuman hina África nacionpi Uganda llaqtaman astakunankupaq. ¿Imatan ruwanku gastonkuta paganankupaq precursorlla kashanankupaqpas? Sapa watanmi Noruega nacionman kutispa iskay killa llank’anku.

¿Imaynan kashanku chay cristianokuna? Roald nin: “Familiaypiqa kuskallan imatapas ruwayku, Bergen llaqtapiqa manan chhaynachu karqan. Kunanqa aswan hukllachasqan kashayku anchatataqmi kusikuyku iskaynin wawayku iñiyninkupi wiñasqanta rikuspa”, nispa. Hinaspapas kaytan nin: “Kunanqa pisitan qolqemanta llakikuyku”, nispa.

Elsebethmi huk simita yachayta munarqan. ¿Imapaq? Predicasqanku llaqtapin sami runakunaq  tiyasqan hallp’api kallantaq Karasjok llaqtacha. Chaypin tiyanku Noruega, Suecia, Finlandia, Rusia nacionkunamanta runakuna. Paykunaman predicananpaqmi sami simita estudiarqan, kunanqa ñan pisillatapas chay simita rimaq runakunawan parlarishanña. Chay rimaypi predicasqanmantan ancha kusisqa nin: “Soqta estudiotan qoshani. ¡Manan hayk’aqpas kaymanta ripuyta munaymanchu!” nispa.

Fabianqa yanapakuq qharin precursortaqmi kashanpas. Paymi panan Isabelwan Diosta serviypi pisiyapuq kinsa wayna-sipaskunata yanaparqanku. Kunanqa kinsantinkun Diosta allinta servishanku. Iskaymi bautizakunkuña, 2012 wata marzo killapitaq precursor auxiliar karqanku. Huknin sipasmi Isabelta Fabiantawan anchata agradecekun yanapasqankumanta. Fabianmi nin: “Niwasqankun sonqoyman chayarqan. ¡Anchatan kusikunchis hukkunapaq allinkunata ruwaspa!” nispa. Isabelmi nillantaq: “Kay llaqtapi Diosta servispan Salmo 34:8 textoq hunt’akusqanta repararqani, ninmi: ‘Reqsiykuychis, hinaspa rikuychis may sumaqchus Señor Diosqa kashasqanta’, nispa. Hinaspapas kusisqan kani kaypi Diosta servispay”, nispa.

Marelius, Kesia cristianokunan imachus necesitasqallankuwan kawsaspa kusisqa kashanku. Astakusqanku Alta llaqtapin kunan 41 publicadorkunaña kashan. Marelius nin: “Kunanqa hukniraymi kawsayniyku kapun chaywanmi kusisqa kashayku. Jehová Diostan agradecekuyku kaypi precursor kaspa llank’anaykupaq yanapawasqankumanta. Manan imawanpas aswan kusisqaqa kaykumanchu”, nispa. Kesia nin: “Kunanqa Jehová Diospin astawan hap’ipakuni, munakuywantaqmi payqa cuidawashanku. Hinaspapas familiaykumanta karupi tiyasqaykun yanapawan qosayman astawan hukllachakunaypaq. Manan pesapakunichu kayman hamusqaykumantaqa”, nispa.

¿Imaynan Knut, Lisbeth cristianokuna kashanku? Knut nin: “Manan faciltachu chay nacionpa costumbrenman yachakurqayku. Mayninpin wiksa nanaywan onqoyku, maynillanpin unupas luzpas kan, chaywanpas askha runakunamanmi Bibliamanta yachachishayku”, nispa. Lisbeth nin: “Huk llaqtachakunan tarikun tiyasqayku llaqtamanta kuskan horallapi chayanapaq, manataqmi chaypi hayk’aqpas predicakurqanchu. Chaykunaman riqtiykun tariyku Bibliata leeq runakunata, paykunan valekusparaq niwanku Bibliamanta yachachinaykupaq. Chhayna huch’uyyaykukuq runakunaman yachachispan ancha kusisqa kayku”, nispa.

Umalliqninchis Jesusqa may kusisqachá kashan, llank’ay qallarichisqanta kay Hallp’aq k’uchunkunakamaraq aparisqanchismanta. Diospa llaqtanpas anchatan kusikun ‘llapa suyu runakunata yachachimunapaq’ Jesuspa kamachisqanta tukuy sonqowan hunt’aspa (Mat. 28:19, 20).