QAYNA ura watakuna Sangir Besar islata viajawaq karqan chayqa, yaqapaschá lamar-qocha patapi kinsa hermanakunawan tupawaq karqan. Paykunaqa Diosta serviqkunamanta jinaña reqsisqa kanku chaypas, chay lamar-qocha patapiqa manan chaytachu ruwasharqanku. Chhaynaqa, ¿imatan ruwashankuman karqan?

Paykunaqa unuq waqtakamusqanman jina jaykuspas bola sayay rumikunata maskhaqku. Chaytas jawaman apamuspa bancachapi tiyaruspa martillowan p’akiqku, runtukunamanta aswan juch’uymanraqsi tukuchiqku. Chay rumikunatas baldeman churaruspa wasinkuman apaqku, chaytataqsi sacokunapi waqaychaqku. Chay sacokunatataq camionkuna jamuspa apapuqku, chay rumikunawan carreterakunata ruwanankupaq.

Chay hermanakunamanta jujninmi karqan Hulda. Payqa jujkunamanta aswan unaychatas chay lamar-qocha patapi llank’aq. Chay rumikunata vendespas payqa familianta yanapaq. Ichaqa kay kutipiqa manas chayllapaqchu llank’ashasqa: Payqa tablet-tas rantikuyta munashasqa chaypi JW Library^® nisqata qhawananpaq. Chay hermanaqa nisqas: “Chaypi videokunaqa qelqakunapas yanapawanqapunin Bibliamanta allinta willanaypaq, Bibliata allinta entiendenaypaqpas”, nispa.

Killa kuskantas payqa iskay horata sapa tutamantan chaypi llank’asqa. Chay kutipiqa juj juch’uy camionchamanraqsi junt’achisqa rumikunata. Chay qolqewansi chay tablet nisqata rantikusqa.

Chay hermananchis Huldan nin: “Sayk’usqan tukuq kani, makiykunaraqmi nanawaq rumita q’asusqaypi. Ichaqa chay tablet-ta llamikuqtiyqa manan nanaypas kapurqanñachu. Chaywanmi jujkunaman facilta yachachiq kani, juñunakuykunapaqpas facil-llatan preparakuq kani”, nispa. Coronavirus onqoy qallarikushaqtinpas kusatas paytaqa chay tabletnin yanapasqa, chay tiempopiqa videollamada nisqallantataq juñunakuy aparikuq chayqa, allintas yanapasqa. ¡May kusikunapaqmi hermana Hulda imachus munasqan tarisqanta yachayqa!