Jehova Diospa testigonkunaqa enteron pachapim kachkan, paykunamanta wakichallanmi Diospa llaqtanpi punta apaqkunaqa. Paykunapa ruwayninqa kaykunam:

•   Paykunam cuentallikunku Jehova Diospa testigonkunapa qillqankupi, huñunakuyninkupi chaynataq escuelankupi yachachikuykunamanta (Lucas 12:42).

•   Cuentallikunkutaqmi enteron pachapi Jehova Diospa testigonkunapa tukuy ima ruwasqankumantapas. Paykunaqa qawankum enteron pachapi Jehova Diospa testigonkuna Diosmanta willakunankupaq chaynataq imapas sunqumanta qusqankuwan imata ruwanankupaqpas.

 Diospa llaqtanpi punta apaqkunaqa ñawpa tiempopi Jerusalenpi kaq apostolkunapa ruwasqankuta chaynataq iñiqkunapi punta apaqkunapa ruwasqankutam ruwanku. Paykunaqa lliw iñiqmasinkupa rantinpim imapaqpas tantiaqku (Hechos 15:2). Ñawpaq tiempopi hinam kunanpas Diospa llaqtanpi punta apaqkunaqa mana Jehova Diospa testigonkunapa umalliqninkuchu. Paykunaqa imapaqpas tantianankupaqqa Diospa palabranwanmi yanapachikunku, hinaspapas riqsikunkum iñiqkunapa uman Jesucristo kananpaq Jehova Dios churasqanta (1 Corintios 11:3; Efesios 5:23).

 Paykunam kanku: Kenneth Cook (churin), Gage Fleegle, Samuel Herd, Geoffrey Jackson, Stephen Lett, Gerrit Lösch, Mark Sanderson, David Splane hinaspa Jeffrey Winder. Paykunaqa llapankum Nueva York lawpi Warwick llaqtapi betel wasipi llamkanku.

 Paykunapa llamkayninqa suqtaman rakinasqam kachkan. Diospa llaqtanpi punta apaqkunaqa sapakamam huk utaq iskay llamkaymanta cuentallikunku.

•   Encargakuqkunamanta cuentallikuqkuna. Autoridadkunapa nisqanman hina kananpaqmi iñiqmasinkuta yanapanku. Yanapankutaqmi ima desgraciapas pasaruptin utaq iñiqmasinku ima sasachakuypipas tarikuptin. Chaymantapas yanapankum may nacionpipas Diosmanta willakunankupaq harkakuptin imata ruwanankupaq tantiaspanku.

•   Betelpi llamkaqkunamanta cuentallikuqkuna. Paykunam cuentallikunku enteron pachapi kaq betel wasipi llamkaqkuna allinlla kanankupaq.

•   Qillqakuna ruwaypi cuentallikuqkuna. Paykunam cuentallikunku qillqanchikkuna maquinakunapi ruwasqa kananpaq chaynataq enteron pachapi iñiqmasinchikkunaman apachinankupaqpas. Cuentallikunkutaqmi huñunakuna wasikuna ruwaymanta, qillqakuna huk rimaykunaman ruwakunanpaq wasikuna ruwaymanta chaynataq betel wasikuna hatarichiymantapas.

•   Enteron pachapi Diosmanta willakuypi cuentallikuqkuna. Paykunam cuentallikunku ‘Diospa gobiernonmanta sumaq willakuy enteron pachapi willakusqa kananpaq’ (Mateo 24:14).

•   Yachachikuymanta cuentallikuqkuna. Paykunam encargakunku huñunakuykunapi yachachikuykunamanta, escuelakunapi yachachikuykunamanta chaynataq uyarinallapaq kaqmantawan qawanapaq kaq yachachikuykunamanta.

•   Yachachikuykuna qillqaqkunamanta cuentallikuqkuna. Paykunam encargakunku bibliamanta hurqusqa kaq qillqakunapi yachachikuykunata ruwanankupaq chaynataq internetpi “jw.org” niqpi lluqsimuq yachachikuykunamanta. Encargakunkutaqmi chay yachachikuykuna achka rimaykunapi lluqsinanpaqpas. Chaymantapas yanapakunkum chay yachachikuykuna huk rimaykunaman ruwakuptin allin ruwakunanpaq.

 Diospa llaqtanpi punta apaqkunaqa chay ruwayniyuqkuna kaspankupas sapa semanam huñunakunku enteron pachapi Jehova Diospa testigonkuna ima necesitasqankuta tantianankupaq. Huñunakuspankuqa bibliapa nisqanta allinta qawaspankum Jehova Diospa atiyninwan yanapachikunku imatapas tantianankupaq. Kallpanchakunkum chay tantiasqankuwan llapallanku acuerdopi kanankupaq (Hechos 15:25).

 Chay suqtantin llamkaypi sapa cuentallikuqkunapam yanapaqninkuna kan. Paykunaqa kanku Diosman sunqu hinaspa iñiyninkupi allin takyasqa runakunam. Unay wataña Diosta servisqankuraykum chay llamkasqankutaqa allintaña yachanku (1 Corintios 4:2). Paykunaqa mayqin llamkaypi kasqankuman hinam sapa semana huñunakunku. Chay huñunakuyninkupi mana imata tantiaspankupas punta apaqkunamanmi willanku imakunapas imayna kananmanta utaq imayna ruwakunanmanta, hinaspapas punta apaqkunapa nisqanman hinam ruwanku. Diospa llaqtanpi punta apaqkunam paykunataqa ninmanku huklaw nacionpi testigokunata watukunankupaq, ninmankutaqmi sapa wata hatun huñunakuypi utaq Galaad escuela tukuykuptin rimarinankupaqpas.