QARANPI KAQ YACHACHIKUY
¿Imaynataq kanku Jehova Diospa testigonkunaqa?
Beke sutiyuq warmim nirqa: “Unay watakunañam Miketa riqsini. Payqa Jehova Diospa testigonmi, ichaqa manam yacharqanichu imayna chay religionnin kasqanmantaqa. ¿Pitaq Jehova Diosqa? ¿Imanasqataq testigokunaqa fiestakunaman mana rinkuchu? Mikemantam llakikuq kani mana allin religionpi kasqanta piensaspay”, nispa (California, Estados Unidos).
Zenon sutiyuq runam nirqa: “Vecinoymi Jehova Diospa testigonwan biblia estudiayta qallaykurqa. Chaymi piensarqani, ¿ima religiontaq chayqa? ¿Imanasqataq chaynata sutichakunku?”, nispa (Ontario, Canadá).
Ken sutiyuq runam nirqa: “Warmiywan ñuqam piensarqaniku testigokunaqa iglesiaykuman manaña risqaykurayku engañawanankupaq watukamuwasqankumanta. Ñuqaykuqa allin riqsisqa religionpim karqaniku, ichaqa manam yachachiwarqakuchu yachay munasqaykumantaqa. Chaymi testigokunaqa astawanraq yanqapaq kasqankuta piensarqaniku”, nispa (Washington, Estados Unidos).
Sesel sutiyuq warmim nirqa: “Manam yacharqanichu testigokuna imayna runa kasqankumantaqa nitaq imapi iñisqankumantapas”, nispa (Esbjerg, Dinamarca).
Qampas rikurqankichá testigokunaqa wasin-wasin rispa punkukuna takasqankuta, callekunapipas runakunaman asuykuspa bibliamanta hurqusqa qillqakunata mana qullqillapaq qusqankuta. Ichapas kay leesqayki qillqatapas huk kaqnin quykusurqanki. Kay yachachikuypa qallariyninpi piensasqankuman hinapaschá qampas piensanki.
¿Imatam ruwawaq paykunamanta yachayta munaspaykiqa? ¿Imaynatam yachawaq imapi iñisqankumanta, ima qullqiwan tukuy ruwasqankumanta, maypi huñunakusqankumanta chaynataq imanasqa wasin-wasin risqankumantapas?
Seselmi nirqa: “Testigokunamanta internetpi leesqaywan hinaspa paykunamanta mana allin rimasqankuta uyarisqaywanmi ñuqapas chiqnipakurqani”, nispa. Payqa kikin testigokunawan rimaspanmi yacharurqa allin runakuna kasqankumanta.
¿Qampas munawaqchu testigokunawan parlaykuyta? Astawan yachayta munaspaykiqa paykunawan rimay. Kay qillqaqa paykunapa ruwasqanmi, chaymi ima tapukuynikimantapas imam kaqta willaykusunki (Proverbios 14:15). Qatiqnin yachachikuykunapim astawan yachanki testigokuna imayna kasqankumanta, imapi iñisqankumanta chaynataq imakunata ruwasqankumantapas.
