QAYNINPA watakunam, achka religionkunamanta kaq 800 masnin mozo-sipaskunata tapurqaku sichu Jesus mañakusqankuta uyarisqanta. Hinaptinmi yaqa 480 masnin nirqaku Jesus uyarisqanta, ichaqa hukllam Jesus sutipa rantinpi nirqa “Dios” nispan.

Qamqa, ¿ima niwaqtaq? ¿Pitataq mañakunanchik? ¿Diostachu icha Jesustachu? * Chaymanta yachanapaq qatiqninkunaman Jesuspa yachachisqanta qawasun.

Jesusqa yachachirqam taytanta mañakunapaq, chaytam paypas ruwarqa.

YACHACHISQAN: Huk kutipim Jesuspa qatiqnin tapurqa: ‘Señor, bautizaq Juanqa yachachirqam discipulonkunata imaynam Dios mañakuyta, chaynaqa ñuqaykutapas yachaykachiwaykuyá’, nispan. Jesusñataqmi nirqa: “Diosta mañakuspaqa kaynatam ninkichik: ‘Taytayku’”, nispa (Lucas 11:1, 2). Chaymanta qipatam ancha riqsisqa yachachikuyninpi nirqa: ‘Mañakuy taytaykita’, nispa. Nirqataqmi: ‘Manaraqpas mañakuchkaptikichikmi Dios taytaykichikqa yachanña imam necesitasqaykichikta’, nispa (Mateo 6:6, 8). Hinaspapas manaraq wañukuchkaspanmi qatiqninkunaman nirqa: ‘Sutiypi mañakuptikichikqa taytayqa qusunkichikmi’, nispa (Juan 16:23). Yachamusqanchikman hinaqa, achka kutitam Jesusqa taytan Jehova Diosta mañakunapaq yachachirqa (Juan 20:17).

RUWASQAN: Kikin Jesusmi taytanta kaynata mañakurqa: ‘Hanaq pachapipas, kay pachapipas munaychakuq taytáy, qamtam alabayki’, nispa (Lucas 10:21). Huk kutipiñataqmi hanaq pachata qawarispan nirqa: ‘Taytáy, graciastam quyki uyariykuwasqaykimanta’, nispa (Juan 11:41). Chaymantapas wañuypiña kachkaspanmi nirqa: ‘Taytáy, espirituytam qumuyki’, nispa (Lucas 23:46). Chaynaqa, Jehova Diosllata mañakunapaqmi yachachiwarqanchik (Mateo 11:25; 26:41, 42; 1 Juan 2:6). Chaytam ruwarqaku Jesuspa qatiqninkunapas.

Hanaq pachaman Jesuspa kutisqan semana pasayllatam, qatiqninkunaqa autoridadkunawan ñakarichisqa karqaku (Hechos 4:18). Chaymi yanapakuyta mañakurqaku. Ichaqa, ¿pitam mañakurqaku? Jesuspa sutinpim ‘llapallanku huk sunqulla Diosta mañakurqaku’ yanapasqa kanankupaq (Hechos 4:24, 30). Jesuspa yachachisqanman hinam paykunaqa Diosta mañakurqaku.

Chaymanta watakuna pasaytam apostol Pablo nirqa: ‘Qamkunapaq mañakuspaykum graciasta quniku señorninchik Jesucristopa taytan Diosninchikman’, nispa (Colosenses 1:3). Hinaspapas iñiqmasinkunatam nirqa: ‘Tukuy imamantayá señorninchik Jesucristopa sutinpi Dios taytaman graciasta quychik’, nispa (Efesios 5:20). Huk kutipipas Jesusnintakama ‘Dios taytaman graciasta qunankupaqmi’ nirqa (Colosenses 3:17).

Punta cristianokuna hinam ñuqanchikpas Jesuspa nisqanman hina Diosta mañakunanchik, chayta ruwaspaqa payta kuyasqanchiktam qawachisun (Juan 14:15). Bibliata huk kaqnin qillqaqmi nirqa: ‘Qayakullasqayta uyariykuwasqanraykum tayta Diosta kuyani. Ñuqallayqa kawsanaykamam paytaqa mañakusaq’, nispa (Salmo 116:1, 2). Ñuqanchikpas Jehova Diosllata mañakuspaqa, Biblia qillqaq runa hinam tarikusun. *