¿Diosqa uyarinchu mañakusqanchikta?
Achka runakunam tapukunku sichu Diosqa mañakusqankuta uyarisqanmanta. Chaynataqa tapukunku sasachakuyninkunamanta utaq ñakariyninkunamanta Dios mana hurqusqanraykum. Yaqapaschá qampas chaynata tapukurqanki. ¿Chaywanqa nichkanchikchu mañakusqanchikta Dios mana uyarisqanmanta? Manam. Bibliam niwanchik Diospa munasqanman hina mañakuptinchikqa payqa uyariwasqanchikmanta. Yachaykusunyá bibliapa ima nisqanta.
DIOSQA UYARIWANCHIKMI
Salmo 65:2 nin: “Mañakusqaykutam qamqa uyarinki, llapallan runakunam qanman asuykamusunki”, nispa.
Wakin runakunam ninku mañakusqankuta Dios mana uyarisqanmanta. Chayna kaptinpas Diostam mañakunku hawka tarikunankupaq. Ichaqa Diosta mañakuyqa manam hawka tarikunallapaqchu yanapawanchik. Bibliam niwanchik Jehova * Diosqa ‘sunqumanta qayakuqninkunapa hichpallanpi kasqanmanta’. Niwanchiktaqmi qayakuptinku Dios uyarisqanmantapas (Salmo 145:18, 19).
Arí, Jehova Diosqa yupaychaqninkunapa mañakusqantaqa uyarinmi. Kikinmi palabranpi kaynata niwanchik: ‘Qayakamuwaspa mañakuwaptikichikqa uyarisqaykichikmi’, nispa (Jeremias 29:12).
DIOSQA MUNANMI MAÑAKUNAYKITA
Romanos 12:12 nin: “Tukuy tiempoyá Diosta mañakuychik”, nispa.
Palabranpim Jehova Diosqa niwanchik tukuy tiempo payta mañakunanchikpaq. Chaywanmi sutillata qawachiwanchik payta mañakunanchikta munasqanta (Mateo 26:41; Efesios 6:18).
¿Imanasqataq Jehova Diosqa munan payta mañakunanchikta? Chaypaqyá kaypi yuyaymanasun: Yaqa llapallan taytakunam warmanku imayna tarikusqankuta utaq ima munasqankutaqa yachankuña. Chayna kaptinpas taytakunaqa munankum churinkuna imayna tarikusqankuta utaq ima munasqankuta paykunaman willanankuta. Taytankuman willaspankuqa churinkunaqa qawachichkankum taytanku yanapananmanta mana iskayrayasqankuta. Yaqa chaynam ñuqanchikpas Diosta mañakuspaqa paypi hapipakusqanchikta qawachichkanchik. Qawachichkanchiktaqmi Diosman asuykuyta munasqanchiktapas (Proverbios 15:8; Santiago 4:8).
DIOSQA MANAM QUNQASUNKICHU
1 Pedro 5:7 nin: “Tukuy llakikichiktapas Diospa makinpi saqiychik, payqariki qamkunamantam nanachikun”, nispa.
Diosqa anchatam kuyawanchik hinaspa ñuqanchikmanta nanachikun. Chaymi payqa munan sunqumanta payta mañakunanchikta.
Chaynatam kamachiq Davidpas ruwarqa. Payqa Jehova Diospa yanapakuynintam mañakurqa. Willarqataqmi tukuy ima llakichisqanta hinaspa imayna tarikusqantapas (Salmo 23:1-6). ¿Yaqachu Jehova Diosqa mañakusqanta uyarirqa? Arí uyarirqam (Hechos 13:22). Davidta hinam Jehova Diosqa ñuqanchikpa mañakusqanchiktapas uyariwasun.
‘TAYTA DIOSTAM KUYANI, PAYQA QAYAKULLASQAYTAM UYARIYKUWAN’
Kaytaqa Salmos qillqaq runam nirqa. Payqa manam iskayrayarqachu mañakusqanta Jehova Dios uyarisqanmanta. Chay yachasqanmi anchata yanaparqa. Yanaparqam Diosman astawan asuykunanpaq hinaspa ima sasachakuywanpas mana hukmanyarunanpaq (Salmo 116:1-9).
Mañakusqanchikta Dios uyarisqanmanta mana iskayrayaspaqa hinallam payta mañakusun. Pedro sutiyuq runamanta yachaykusun. Payqa España nacionpim yachan. Paypa churinmi 19 watanpi wañukullarqa. Chaywan llumpay llakisqa kasqanraykum Diosta mañakullarqa yanapananpaq hinaspa sunqunta tiyaykachinanpaq. ¿Imaynatam Jehova Diosqa yanaparqa? Pedrom nin: “Jehova Diosqa uyariykullawarqam. Payqa iñiqmasiykunawanmi warmichaytawan ñuqata yanapaykuwarqaku”, nispa.
Diosqa mañakusqanchikman hinam yanapaykullawanchik. Payqa kuyawaqninchikkunawanmi kallpanchawanchik.
Maynataña Diosta mañakuspanpas Pedroqa manamá churinwan kaqmanta tupaykurqachu. Ichaqa Diosta mañakusqanraykum pay hinaspa ayllunpas hawkaña tarikurqaku. Maria sutiyuq warmichanmi nin: “Diosta mañakusqayqa mana llumpay llakisqa tarikunaypaqmi yanapawarqa. Chaymantapas yanapawarqam Dios kuyawasqanmanta mana iskayrayanaypaq”, nispa.
Arí, bibliapa nisqan hinaspa runakunapa nisqanmi sutillata qawachiwanchik Jehova Dios mañakusqanchikta uyarisqanmanta. Chaywanpas manamá lliw runakunapa mañakusqankuman hinachu Diosqa yanapan. ¿Imanasqa? Chaymantayá qatiqninpi yachasun.
^ par. 5 Diospa sutinqa Jehovam (Salmo 83:18, TNM).
