Estados Unidos nacionpi yachaq Sarapatam * tukuy imanta wayra-para chinkarachirqa. Saram willakun: “Muspayniypi hinam tarikurqani. Manañam kallpaypas karqañachu”, nispa.

Ayllunchikpa wañukusqanpas hatun llakitaqmi. Australia nacionpi yachaq Yanetmi willakun: “Iskaynin wawaykuna wañukuptinmi mana imawanpas sunquy tiyarqachu. Diostam mañakurqani: ‘Diosnillay, manañam ima ruwaytapas atiniñachu. Puñuruspay manaña rikchariytam munani’”, nispa.

Danielñataqmi llakisqa tarikurqa warmin hukwan tupakurusqanmanta willaykuptin. Danielmi willakun: “Hukwan tupakurusqanmanta warmiy willaykuwaptinmi sunquypas nisyuta nanaruwarqa cuchillowanpas tuksiwachkanmankupas hina. Killantinmi chayna tarikurqani”, nispa.

Ichapas qampas llakisqa tarikuchkanki:

• Wayra-parawan utaq imawanpas

• Aylluykipa wañukusqanwan

• Yanayki hukwan tupakurusqanwan

• Unquywan

• Utaq mana valeqpaq hapikusqaykiwan

Chayna kaptinqa, kay Willakuq qillqam yanapasunki mana llakisqalla kawsakunaykipaq.