Paykunaqa respetakuqllañam kanku, manam alli-allinpaq hapisqa kaytaqa munankuchu, aswanqa hukkunapa allinnintam maskanku, hinaspapas hukkuna yachaykachinantam munanku.

Humilde runaqa riqsikunmi pantasqankunata hinaspa mana ruway atisqankunata. Runakunam ichaqa ninku humilde runaqa manchakuq kasqanta, chayqa manamá chaynachu.

• Churi-wawaykichikmi aswan amistadniyuqkuna kanqaku. “La epidemia del narcisismo” sutiyuq libropim nin: “Yaqa llapanpim humilde runakunaqa allinlla runamasinkuwan kawsakunku, manam piwanpas piñanakunkuchu”, nispa.

• Churi-wawaykichikmi allin qipa punchawkunatapas kawsakunqaku. Humilde kaspaqa kunanpas chaynataq qipa punchawkunatapas allinmi kanqaku, manam sasachakunqakuchu llamkayta tarinankupaqpas. Doctor Leonardo Saxmi nin: “Hatuntukuqllaña musutaqa manam llamkaypiqa chaskinkuchu, patronninpa rimapayasqanta uyarikuqmi chaskisqa kanku”, nispa. *

Yanapaykuy ama llumpa-llumpay allin kasqanta piensananpaq.

BIBLIAPIM NIN: “Mana imapas kachkaspan imapas kasqanpaq hapikuq runaqa kikillanmi pantaypi kachkan”, nispa (Galatas 6:3).

• Ama niychu: “Imapas munasqaykitaqa lliwtam ruwawaq”, nispaqa. Chayqa nisqayki sumaq kaptinpas yaqa llapanpim mana cumplikunchu. Churi-wawaykichikkuna ruway atisqallankuta ruwanankupaq tantiakuspankuqa hinaspa chaypaq kallpanchakuspankuqa qipa punchawkunatapas kusisqam kawsakunqaku.

• Imapas allin ruwasqanmanta alabaykuy. Allin tarikunanta munaspalla sapa kuti imatapas allin ruwasqanta niptikiqa manam humildechu kanqa, imapas ciertopi allin ruwasqanmantayá alabaykuyqa.

• Ama saqiychu internetllaman qukurunantaqa. Sapa kutillañam runakunaqa fotonkutaraq utaq imapas ruwasqankuta internetman churanku. Chaykuna ruwasqankuwanmi aswan sutilla hatuntukuq kasqanku. Chayraykuyá warmaykichikta yachachiychik ama chayna kanankupaq.

• Huchankuta chaylla riqsikunankupaqyá yanapaychik. Churi-wawaykichik imapipas pantaruptinkuqa “pampachaykuway” nispa niytayá yachachiychik.

 Agradecekuq kanankupaqyá yachachiychik

BIBLIAPIM NIN: “Agradecekuqtaqyá kaychik”, nispa (Colosenses 3:15).

• Diospa unanchasqankunamanta. Warmakunaqa yachanankum Diospa unanchasqankuna allinninchikpaq kasqanta. Niwaqmi: “Wayrapas, yakupas hinaspa kawsaykunapas mana kaptinqa wañuruchwanmi”, nispa. Chaynata rimapayaptikiqa Diostam tukuy ima unanchasqankunamanta agradecekunqaku.

• Hukkunapa allin sunqu kasqankumanta. Churi-wawaykichikqa yachanankum imapipas paykunamanta hukkuna aswan allin kasqankuta. Chayraykum envidiakunankumantaqa paykunata qatipakunanku.

• “Gracias” niytayá yachachiychik. Churi-wawaykichikkunaqa tukuy sunqumantam “gracias” niyta yachananku. Chayqa anchatam yanapanqa humilde kanankupaq.

Yanapakuqllaña kanankupaqyá yachachiychik

BIBLIAPIM NIN: “Ama hatuntukuspayá qamkunamantapas aswan allinpaqraq wakinkunata qawaychik, chaymantapas amayá kikillaykichikpa allinnikichiktachu maskaychikqa, aswanqa wakiqnikichikpa allinnintayá”, nispa (Filipenses 2:3,4).

• Niychikyá wasikichikpi ima ruwaypipas yanapasunaykichikpaq. Qamkunalla tukuy imata ruwaptikichikqa warmaykichikkunam aswan allinpaq hapikuspanku manaña ima ruwaytapas munanqakuñachu. Warmaykichikkunaqa yachanankum wasipi ruwaykuna pukllaymantapas aswan punta ruwana kasqanta. Niwaqchikmi yanapakuptinkuqa wasikichikpas allin kananmanta, hukkunapas kusisqa kanankumanta hinaspa paykunapas kuyachikunankumanta.

• Yachachiychikyá hukkunapaq imapas ruwayqa allin ruway kasqanta. Hukkunapaq imatapas ruwaspankuqa aswan yuyayniyuqmi kanqaku. Chaypaqyá hukkunata imayna yanapanaykichikmanta hinaspa warmaykichik imayna yanapananmanta parlariychik. Hukkunapaq allin kaqta ruwaykapuptinqa alabaykuychik hinaspa kallpanchaykuychik.