SEPIA animalchaqa pakakunanpaqmi rikchayninta tikrarun, mana rikuy atinapaq hina kanankama. Chay animalchamanta yachaq runakunam ninku, “chay animalchaqa rikchayninta chaylla tikrasqanwan hinaspa qaranta llampuyachisqanwan riqsisqa kasqanta”. ¿Imaynatam chayta ruwan?

Kaypi yuyaymanay: Sepia animalchaqa colornintam tikran qarachanpa ukunpi mana rikuy atina bolsachakuna kasqanrayku, chay bolsachakunapa ukunpim colorniyuq yakuchakuna kachkan. Chay animalcha pakakuyta munaspanqa chayllam qaran ukupi ankuchankunata chintirichin, hinaptinmi qaran ukupi bolsachakuna wiñariptin colorninqa tikrakurun hinaspa qaranpas llampuyarun. Manam pakakunallanpaqchu chaytaqa ruwan, ruwantaqmi castamasinkunaman imamantapas willananpaq utaq parischakunanpaqpas.

Inglaterra nacionpi Bristol Universidadpi llamkaq ingenierokunam ruwarunku sepia animalchapa qaran hina colornin tikrakuq pachata. Chaypaqqa chay pachapa ruwasqanku qaytupa ukunpim churarunku uchuychalla yana gebechakunata. Corrienteta churaykuptinkum chay gebechakunaqa chulluristin hina wiñarin, hinaptinmi pachaqa colorninta tikran.

Jonathan Rossiter doctormi nirqa: ‘Sepia animalchapa qaranmanta yachayqa yanapawanchikmanmi kikillanmanta colorninta chaylla tikrakuq pachata ruwananchikpaq’, nispa. Chay Doctorqa piensantaqmi chayna pachakunaqa pakakunapaq hinaspa runakuna munasqankuman hina pachakunankupaq servikunanmanta.

¿Ima ninkitaq? Sepia animalchapa qaran kikillanmanta rikchaynin tikrakusqanqa ¿kikillanmantachu chayna rikurirqa icha unanchasqachu karqa?