Unquqta imaynata yanapanapaq
Maribelmi nirqa: ‘Hospitalmanta papay lluqsinanpaq kachkaptinñam doctorta tapurqani yawarninmanta papaypa qawachikusqan imayna kasqanta. Doctorqa niwarqam allin kasqanmanta, ichaqa chay papelkunata kaqmanta qawaykuspanmi cuentata qukururqa wakillanpi allin kasqanta. Chaymi pampachaykunaykupaq niwaspanku yawarmanta astawan yachaq doctorta qayarqa. Papayqa allinñam kachkan. Allinmi karqa dortorwan rimasqaykuqa’, nispa.
Doctorman manaraq richkaspa unquqpa imankuna nanasqanmanta hinaspa ima hampikuna tomasqanmanta qillqay
Doctorman riyqa utaq hospitalpi unquyqa hukmanyachiwanchikmi. Maribelpa willakusqanpi hinam ayllunchikta utaq amistadninchikta yanapaykuyqa ancha allin. ¿Imaynatam yanapachwan ayllunchikpas utaq amistadninchikpas unquptinqa?
Doctorman manaraq richkaspa. Unquqta yanapay nanayninmanta, ima hampikuna tomasqanmanta hinaspa doctorta imakuna tapunanmanta qillqananpaq. Unquqwan rimay chay unquynin imayna kasqanmanta, tapuytaq mayqin ayllun pay hina unquyniyuq kasqanmantapas. Ama piensaychu tukuy chaykunamanta doctor tapusunaykichiktaqa utaq llapallanta yachasqantaqa.
Doctorpa ima nisqanta allinta uyariy, tapukuy hinaspa qillqay
Doctorwan rimaspa. Unquqta yanapay doctorpa ima nisqanta allinta entiendenanpaq. Doctorta tapuy, ichaqa ama imatapas niychu yachaq tukuspaqa. Unquqpas tapukuchun imakunamanta yachay munasqanta. Doctorpa ima nisqanta allinta uyarispa qillqay. Tapuytaq imaynatawan hampikunanmantapas. Unquqta niy atikuptinqa huk doctormanwan rinanpaq.
Doctorpa nisqanman hina ima hampikunata tomananpaq hinaspa ima nisqanta kaqmanta qaway
Doctorman riruspa. Doctorpa imakuna nisqanta yuyariychik. Yanapay doctorpa nisqanman hina hampikunata rantinanpaq hinaspa tomananpaq, yanapaytaq hampi mana allinta ruwaptinqa doctorman chaylla willananpaqpas. Unquqta kallpanchay ama hukmanyarunanpaq, doctorpa nisqanta kasukunanpaq chaynataq kaqmanta kutinanpaqpas. Yanapay imawan unqusqanmanta astawan yachananpaq.
Hospitalpi
Allin qillqasqa kachun imaynata hampichikunanpaq tanteakusqan
Hawkalla kay hinaspa imamantapas cuentata qukuy. Pitapas hospitalpi kananpaq niykuptinkuqa mana imapas ruway atiq hinam chaynataq mancharisqam tarikun. Hawkalla hinaspa cuentata qukuq kaspaykiqa yanapankim unquqpas chaynataq atiendeqninkunapas hawkalla kanankupaq utaq mana pantarunankupaq. Unquqmi tanteakunan imawan utaq imaynata hampichikunanpaqqa. Llumpayta unqusqanwan mana tanteakuyta atiptinqa respetay papelpi qillqachispan imakuna nisqanta chaynataq ayllunpa utaq paypa rantinpi rimaq doctorpa nisqantapas *.
Doctorman sumaq llata willay unquq imayna tarikusqanmanta
Rimarinaykipaq kallpanchakuy. Ama manchakuspayki rimay. Allin pachasqa kaptikiqa chaynataq sumaqllata rimaptikiqa doctorkunawan yanapaqninkunapas kallpanchakunqakum unquqta sumaqllata atiendenankupaq. Wakin hospitalkunapiqa achka doctorkunam unquqta atiendenku. Chaymi willanayki wakin doctorkuna ima nisqanmanta chaynataq unquq imayna tarikusqanmantapas.
Mana sasachaspalla allinta yanapay
Sumaqllata rimay hinaspa agradecekuy. Tukuy ruwayniyuq kasqankuraykum hospitalpi llamkaqkunaqa manaña ancha pacienciayuq kanku. Chaymi allinllata atiendesunaykita munaspaqa sumaqllata rimapayanayki (Mateo 7:12). Yachasqanman hina ima nisusqaykita respetay hinaspa agradecekuy. Chayna kaptikiqa doctorkunam kallpanchasqa kanqaku.
Runaqa llapallanchikmi imawanpas unqunchik. Chaymi imayna yanapayta yachaspaqa allinta yanapasun unquq ayllunchikta utaq amistadninchikta doctorkuna allin atiendenankupaq (Proverbios 17:17).
^ par. 8 Doctorwan imaynata hampichikunanpaq tanteakusqanta respetanankupaq leykunaqa sapa nacionpim mana chaynallachu. Chaymi unquspan imaynata hampichikunanpaq tanteakusqanqa llapan hinaspa allin qillqasqa kanan.
