Warmayki wasi ukupi pelotawan pukllachkaspa imatapas pakirusqanta uyariruspaqa chayllam pawanki ima pasasqanta qawanaykipaq. Chayaptikiñataqmi waytawan puyñuchaqa pampapi chiqirayachkan. Warmaykiñataqmi mancharisqa uyachayuq kachkan.

Qamñataqmi piñasqallaña tapunki: ¿Qamchu pakirunki?, nispa.

Warmaykiñataqmi chaylla nisunki: ¡Manam ñuqachu mamay!, nispa.

¡Chaynatam llullakuykun! Achka kutitañam llullakusunki. ¿Allinchu chayqa?

Llullakuyqa hucham. Jehova Diosqa chiqninmi llullakuytaqa (Proverbios 6:16, 17). Ñawpaq naciontam kamachirqa llullakuq runakunata wañuchinankupaq (Levitico 19:11, 12).

Manam lliw llullakuykunachu chaynalla. Wakinkum llullakunku mana allinta ruwanankupaq. Wakinñataqmi mana pinqaypi qipanankupaq otaq sasachakuypi mana tarikunankupaq (Genesis 18:12-15). Lliw llullakuykuna mana allin kaptinpas, wakinqa llumpay mana allinmi. Warmayki llullakuptinqa yuyaymanay hayka watanpi kasqanta hinaspa imanasqa llullakusqantapas.

Warmaykita uñallaraq kachkaptin yachachiy. Huk doctormi nin: “Sasaña kaptinpas mana llullakuspa imam kaqta rimayqa warmakunapa allinninpaqmi. Warmaykiwan allin kawsakunaykipaqqa manam paymantaqa iskayrayanaykichu, llullakusuptikim ichaqa iskayrayanki”, nispa. *

Ama hukmanyaychu. Warmaykiqa manam llullakusqanraykuchu mana allin runapiqa rikurirunqa. Chay ruwayninqa Bibliapa nisqanman hina warma kayninpi mana allin piensasqanraykullam (Proverbios 22:15). Chaytam wakin warmakunaqa llullakuspanku qawachinku, ichapas piensanku llullakuptiyqa manam imanawanqakuchu nispanku. Chaymi qampa ima ruwasqayki yanapanqa.

Imanasqa llullakusqanpi yuyaymanay. ¿Maqanaykita manchakuspanchu? ¿Mana llakikunaykita munaspanchu? ¿Warmamasinkunata admirachinanpaqchu imatapas umallanmanta willakun mana chayna kachkaptinpas? Imanasqa llullakusqanta yachaspaykiqa, atinkim imayna yanapaytapas. (Bibliapa yachachisqan: 1 Corintios 13:11.)

Imapas ruwasqanmantaqa ama tapuychu. Qallariypi rimamusqanchik mamaqa yacharqam warmanpa ima ruwasqantaqa, chaywanpas warmantam tapurqa pi pakirusqanta, chaymi warmanqa llullakuykurqa. Sichum mana tapuspan ninman karqa: “Pakirusqankim”, nispallan. Chaynata niptinqa manapaschá llullakunmanchu karqa. Chayta ruwaspam imam kaqta willakunanpaq yanapanki. (Bibliapa yachachisqan: Colosenses 3:9.)

Imam kaqta willakuptinqa alabaykuy. Warmakunaqa tayta-maman kusichiytam munanku. Chaynaqa warmaykitam niwaq mana llullakuspa imam kaqta willakuptinqa kusikusqaykita hinaspa lliw aylluykipaq allin kasqantapas. (Bibliapa yachachisqan: Hebreos 13:18.)

Warmaykita niy: “Llullakuptikiqa imapas ruwasqaykimantam iskayrayasaqña”, nispa. Sapa kuti imam kaqta willakuptinqa alabaykuy, chayta ruwaptikiqa kallpanchasqam tarikunqa hinalla chayta ruwananpaq. Ichapas kaynata niwaq: “Kusikunim imam kaqta willakusqaykimanta”, nispa.

Qampas amam llullakunaykichu. Pipas maskasuptiki warmaykita niwaq: “Manam kaypichu, niykuy”, nispa. Otaq llamkaq mana riyta munaspa niwaq: “Unquchkanim”, nispa. Kaynata llullakuspaykiqa manam suyawaqchu warmayki mana llullakunantaqa. (Bibliapa yachachisqan: Santiago 3:17.)

Bibliawan yachachiy. Bibliapi yachachikuykunawan willakuykunaqa mana llullakunapaqmi kallpanchawanchik. Jehova Diospa testigonkunapa ruwasqan ‘Diospa kuyakuyninpiyá takyasunchik’ niq qillqawanmi warmaykikunata yanapawaq sunqunmanta mana llullakuq kanankupaq. 14 kaq yachachikuyninpim nin: “Tukuy imapi honrado kaymanta”, nispa. Kayqa Internetpipas kachkanmi jw.org /quy nisqapi.