Huk kutipim Alex sutiyuq mozo escuelanpi kachkaptin profesornin yachachichkarqa: “Yachaysapa runakunapa nisqanman hinaqa imakunapas qunqayllamantam rikuriramurqa”, nispan. Hinaptinmi Alexqa imakunapas Diospa unanchasqan kasqanta yachaspan, chayta uyarispan iskayrayayta qallaykurqa. Chaymi rimapakurqa: “Chaynaqa, yachaysapa runakuna chaynata niptinkuqa, paykunapa nisqanchiki nis allinqa”, nispa.

Alex kaspaykiqa, ¿yachaysapa runakunapa nisqankuraykullachu imakunapas qunqayllamanta rikurisqantaña niwaq?

Wakin runakunam mana sumaqta yachaspanku ninku imakunapas qunqayllamanta rikurisqanta utaq Diospa unanchasqan kasqanta. Chaymi imanasqa chayna nisqankumanta tapuptikiqa mana ima niytapas yachankuchu.

• Wakinqa iglesiankupi uyarisqankuraykullam ninku imakunapas Diospa unanchasqan kasqanta.

• Wakinñataqmi escuelankupi yachasqankuraykulla ninku imakunapas qunqayllamanta rikurisqanta.

Hebreos 3:4 nin: “Wasiqa runapa ruwasqanmi, Diosmi ichaqa tukuy imata ruwarqa”, nispa. ¿Ima niwaqtaq? ¿Chaynachu kanman icha manachu?

RUNAKUNAM NINKU: Tukuy imapas rikuriramurqa qunqayllamanta bomba hina tuqyaruspanmi, chayqa “Big Bang” nisqanmi.

RUNAKUNAM NINKU: Runakunaqa monomantam rikurimurqanchik.

RUNAKUNAM NINKU: Imakunapas qunqayllamanta rikurisqanqa chiqapmi.

Juliam nin: “Sichum sachakunapa kasqan lawninta purichkawaq hinaspa tariruwaq tablakunamanta sumaq ruwasqa wasita hinaspaqa, ¿niwaqchu ‘kay wasiqa sachakuna qunqayllamanta wichiykamuptinchiki wasi rikurirun’ nispa? Manachá ¿aw? Chaynallataqmi ‘tukuy imapas qunqayllamantam rikuriramurqa’ nispa runakunapa nisqankuqa”, nispa.

Guwen sutiyuq sipasmi nin: “Qillqakuna ruwananku wasi imawanpas tuqyaruptin, hinaspa kayman-chayman pinturakunapas pawaruptin huk sumaq qillqa lluqsirusqanta pipas nisuspaykiqa, llullakusuchkankimanchiki ¿aw?”, nispa.

Bibliaqa kallpanchasunki tukuy yuyaynikiwan imatapas ruwanaykipaqmi (Romanos 12:1). Chaymi Diospi iñisqaykiqa kanan:

• Manam “Diospiqa iñinam” nispa nisqaykiraykullachu.

• Manam llapa runakuna Diospi iñisqankuraykullachu.

• Manataqmi wasikipi kaqkuna Diospi iñinaykipaq nisusqaykiraykullachu.

Diospi iñisqaykiqa kanan paymanta allinta yachasqaykiman hinam.

Teresa sutiyuq sipasmi nin: “Profesorniy cuerponchik imayna kasqanta yachachiptinqa, aswanraqmi mana iskayrayanichu Jehova Diosqa tukuy ima unanchaq kasqanmantaqa. Cuerponchik ukupi imapas kaqkunaqa suma-sumaq ruwasqam kachkan. Chaykunataqa manam ancha musyakunchikchu, ichaqa suma-sumaqmi kachkan”, nispa.

Richard sutiyuq mozom nin: “Hatu-hatun wasita, buqueta utaq carrota qawaspaymi nini: ‘¿Piya wakkunata ruwarqa?’, nispay. Carroqa yachaqpa ruwananmi. Tukuy imachankunapas achkallañam hinaspapas suma-sumaqtam tupan. Chaymi carrollapas yachayniyuq runapa ruwasqan kachkaptinqa runakunapas yachayniyuqpa ruwasqanmi kanchik”, nispa.

Anthony sutiyuq mozom nin: “Yachaysapa runakunapa yachasqankumanta astawan yachaptiyqa yanqapaq hinañam rikchakuwan qunqayllamanta imapas rikuriramusqanqa. [...] Diospi iñiymantapas aswan sasaraqmi imakunapas qunqayllamanta rikurirusqanta allinpaq hapiyqa”, nispa.

Imakunapas qunqayllamanta imayna rikurisqanta yachaysapa runakuna una-unay watakunaña estudiaspankupas hukta-huktam sapakama rimanku. Paykunapas mana sumaqta yachachkaptinkuqa, manam imananchu paykunapa nisqankumanta iskayrayayqa.