Huñunakunayku wasikunatam sutichaniku Salon nispa. Chaynatam sutichaniku Bibliapa yachachisqanman hina Diospa Gobiernonmanta yachasqaykurayku, chay gobiernomantam Jesuspas yachachirqa (Lucas 8:1).

Diosta yupaychanapaqmi chay Salonkunaqa. Chaypim yachaniku allin noticiakunamanta willakunaykupaq (Mateo 24:14). Chay Salonkunaqa manam huk sayayniyoqllachu ichaqa allin rurasqam, chaypiqa yaqa llapanpim huñunakunku iskay otaq masnin congregacionkuna. Iñiqmasiyku astawan yapakusqanraykum pasaq watakunapi waranqantin Salonkunata rurarqaniku (yaqa pichqata sapa punchaw). ¿Imaynatam rurarqaniku? (Mateo 19:26.)

Sonqonkumanta qosqanku qollqewanmi Salonkunaqa rurakun. Chay qollqetam apachinku Betel wasipi cuentallikuqkunaman, paykunañataqmi congregacionkunaman qonku mosoq Salonta ruranankupaq otaq Salonninkuta allichanankupaq.

Yanapakuy munaqkunapa rurasqanmi. Achka nacionkunapim kachkan Huñunakunapaq Salonkunata Ruraqkuna. Paykunam nacionninkupi congregacionkunaman rinku karupi kaptinpas, chaypi kaq testigokunatam yanapanku Salonninkuta ruranankupaq. Wakin nacionkunapiñataqmi kan Salonkuna ruranankupaq otaq allichanankupaq cuentallikuq ancianokuna. Chaymantapas huk ruraykunata yachaqkunapa yanapaynintam chaskinku mana qollqellapaq. Salonkunataqa hatarichinku chaypi huñunakunankupaq kaqkunam. Jehová Diospa yanapayninwan chaynataq serviqninkunapa kallpanchakusqankuwanmi chaykunaqa rurakun (Salmo 127:1; Colosenses 3:23).

• ¿Imanasqam Salonwan sutichaniku huñunakunayku wasikunata?

• ¿Imaynatam Salonkunata Allpantinpi ruraniku?