Casado vidaykipiwan familiaykipi kusisqa kawsanaykipaq kallpanchakuptikipas, wakinpiqa qonqaymantam imapas pasakurunman (Eclesiastes 9:11, NM). Ichaqa Diosmi yanapakuyta qowanchik imapas sasachakuypi tarikuptinchik. Qatiqninpi Bibliapa nisqankunata kasukuspaykichikqa atinkichikmi hatun sasachakuykuna atipaytaqa.

BIBLIAM NIN: “Tukuy afannikichiktaqa Diosmanyá qoychik, paymi qamkunamanta nanachikuqqa” (1 Pedro 5:7). Diosqa manam huchayoqchu imapas sasachakuyninchikmantaqa (Santiago 1:13). Payman asuykuptikiqa, payqa yanapasunkim (Isaias 41:10). Paypa qayllanpi sonqoykita kichariy (Salmo 62:8).

Yanapasunkitaqmi Bibliata sapa punchaw leeyniki. Chayta ruwaspaykiqa qawankim Jehova Dios sasachakuyninchikpi kallpanchawaqninchik kasqanta (2 Corintios 1:3, 4; Romanos 15:4). Paymi niwanchik “runakunapa mana entiendey atinan hawkayaywan” hawkayachiwananchikta (Filipenses 4:6, 7, 13).

¿IMATAM RUWAWAQ?

• Diospa yanapakuyninta mañakuy, chaynapi hawkalla kanaykipaq hinaspa allinta piensanaykipaqpas

• Chayman hina allinta tanteay

BIBLIAM NIN: “Entiendeq runaqa allin yachaytam tarin. Yachayniyoq runaqa allin yachaytam uyarin” (Proverbios 18:15). ¿Imatam familiaykipi sapakama necesitanku? Chayta yachanaykipaqqa, paykunawan rimariy hinaspa uyariy (Proverbios 20:5).

¿Familiayki wañukuptinqa? Llakikuymantachá waqanki, ichaqa ama penqakuychu Jesuspas waqarqam (Juan 11:35; Eclesiastes 3:4). Chay sasachakuyta atipanaykipaqqa yanapasunkim allinta samariyniki hinaspa puñuynikipas (Marcos 6:31).

¿IMATAM RUWAWAQ?

• Manaraq imapas pasakuchkaptin familiaykiwan rimariy, chaynapi ima sasachakuypas kaptin mana iskayrayaspa qanwan rimanankupaq

• Rimariy qam hina llakipi tarikuq runakunawanpas

BIBLIAM NIN: “Tukuy tiempopim cheqap amigoqa kuyakun. Sasachakuy tiempopipas wawqe hinaraqmi kuyakun” (Proverbios 17:17). Yaqapaschá amistadnikikunaqa yanapayta munasunki, ichaqa manapaschá yachankuchu imayna ruwayta. Mana iskayrayaspa niy imapi yanapasunaykipaq (Proverbios 12:25). Chaymantapas, Bibliamanta allinta yachaqkunata maskay iñiynikipi yanapasunaykipaq. Paykunam Bibliapa nisqanman hina yanapasunki (Santiago 5:14).

Diospi hinaspa promesankunapi iñiqkunawan hukllawakuspaykiqa, tarinkim yanapakuy necesitasqaykita. Yanapasunkitaqmi hukmanyasqakuna consuelaypas. Jehova Diosmanta hinaspa promesankunamanta willay. Hukkunata yanapay hinaspa ama karunchakuychu kuyasuqniki runakunamantaqa (Proverbios 18:1; 1 Corintios 15:58).

¿IMATAM RUWAWAQ?

• Amistadnikiwan rimay hinaspa yanapasunaykita saqey

• Mana iskayrayaspa niy imakunapi yanapasunaykipaq