Bibliaqa willawanchikmi diablo kasqanmanta, payqa Diospa unanchasqan angelmi karqa, chaymantam mana kasukuspan contranpi hatarirurqa. Bibliaqa nintaqmi diablo ‘kay pachata kamachisqanta’ (Juan 14:30; Efesios 6:11,12). Bibliaqa sutichantaqmi huk sutikunawanpas diablotaqa. ¿Mayqinkunataq chay sutikunaqa?

•   Satanas, chiqnikuq kasqanrayku (Job 1:6 a).

•   Diablo, yanqamanta tumpakuq kasqanrayku (Apocalipsis 12:9).

•   Culebra, pantachikuq kasqanrayku (2 Corintios 11:3).

•   Llullakuq (Juan 8:44).

Satanasqa manam runakunapa sunqunkupi mana allin kaqkunallachu

 Wakin runakunam ninku Diabloqa mana kawsasqanta, aswanqa llapallan runakunapa sunqullanpi kasqanmanta, hinaspapas ninkuraqmi Diospa sunqunpipas kasqanta. Bibliapiqa willawanchikmi diabloqa Dioswan rimasqanmanta, chaynaqa ¿imaynamá sunqullanpi kaqwanqa rimanman karqa? Bibliapiqa nintaqmi Jehova Diospa sunqunpiqa mana allinkunaqa mana kasqanmanta (Deuteronomio 32:4; Job 2:1-6). Diabloqa Jesusmanpas tukuy imata munapayachispanmi Diosta qipanchananta munarqa (Mateo 4:8-10; 1 Juan 3:5). Bibliaqa imam kaqtam willawanchik satanasmantaqa.

 Achka runakunam mana creenkuchu satanas kasqanmantaqa. ¿Chayna piensasqankuqa ciertochu? Manam, bibliapa nisqanman hinaqa satanasqa tukuytam ruwachkan pantachiwananchikpaq (2 Tesalonicenses 2:9, 10). Chaymi satanasqa runakunapa yuyayninta tutayachiptin piensanku pay mana kasqanta (2 Corintios 4:4).

 Ninkum: Diablopa sutin Lucifer kasqanmanta.

 Bibliapim nin: Hebreo rimaypiqa Lucifer nispanqa “llipipipiq” nichkanmi (Isaias 14:12). Chaynata nispanqa Babiloniapi kamachikuqkunawanmi tupachirqa. Babiloniapi, kamachikuqkunataqa Jehova Diosqa alabakuqkunallaña kasqankuraykum chinkachirqa (Isaias 14:4, 13-20). Kay willakuypim Babiloniapi kamachikuqkuna chinkaruptinku asikuspanku nirqaku “llipipipiq” nispanku.

 Ninkum: Diabloqa Diospaq llamkasqanmanta.

 Bibliapim nin: Diabloqa Diospa enemigonmi, manam llamkapuqninchu. Hinaspapas satanasqa Jehova Diospa yupaychaqninkunapa enemigonmi, chaymi tukuy imawan Dios yupaychaqkunata ñakarichin (1 Pedro 5:8; Apocalipsis 12:10).