¿Mayqin angeltaq Miguelqa?
Imatam bibliaqa yachachin
Bibliapim Jesusmanta willawanchik kay pachaman manaraq hamuchkaptin hinaspa hanaq pachaman kutiruspanpas Miguelwan sutichasqa kasqanmanta. a Bibliapiqa willawanchiktaqmi, Miguelqa, Moisespa ayanmanta diablowan atipanakusqanmanta. Willawanchiktaqmi Diospa nisqanta Danielman willananpaq riq angelta yanapasqanmantapas (Daniel 10:13, 21 b; Judas 9). Miguel ninanqa “¿Pitaq Dios hina?” ninanmi chayna sutichasqaqa Jehova Diosta kasukusqanraykum chaynataq enemigonkunamanta defiendesqanraykum (Daniel 12:1; Apocalipsis 12:7).
Miguelwan sutichasqa angelmanta astawan yachaykusun.
Angelkunapa kamachiqnin (Judas 9). Miguel sutiyuq angeltaqa ninkutaqmi arcangel nispankupas. Chaynataqa ninku angelkunapa kamachiqnin kasqanraykum. Huk angelllatam arcangel sutiwanqa bibliapiqa sutichan. 1 Tesalonicenses 4:16 Jesusmanta rimaspan nin: “Kikin señorpunim hanaq pachamanta uraykamunqa kamachikuqpa qapariyninwan, angelkunata kamachiqpa qayakuyninwan”, nispa. Chayraykum yachanchik arcangel Miguelqa señorninchik Jesus kasqanta.
Miguelpaqa kanmi tropankuna. Bibliapim nin: “Miguelmi angelninkunapiwan manchakuypaq culebrapa [utaq diablopa] contranpi pelearqa”, nispa (Apocalipsis 12:7). Chaywanmi yachanchik hanaq pachapi angelkunapa kamachiqnin kasqanmanta (Daniel 10:13, 21; 12:1). Musuq testamentomanta sumaqta yachaq David Aune sutiyuq runapas ninmi Miguelqa angelkunapa kamachiqnin utaq comandanten kasqanmanta.
Bibliapim nin: ‘Señor Jesus hanaq pachamanta atiyniyuq angelninkunawan rupachkaq ninapi rikurimunanmanta’ (2 Tesalonicenses 1:7, 8; Mateo 16:27). Chaymantapas 1 Pedro 3:21, 22 nin Jesusqa hanaq pachaman kutikuptin “angelkuna, autoridadkuna hinaspa atiyniyuqkuna paypa makinman” churasqa kasqanmanta. Arí, Jesusllam angelkunapa kamachiqninqa, chaymi yachanchik Arcangel Miguelqa señorninchik Jesus kasqanta.
Miguelmi hatun ñakariy tiempopi hatarimunqa (Daniel 12:1). Daniel qillqapi “hatarimunqa” nispanqa rimachkan Miguel kamachinanpaqña listo kasqanmantam (Daniel 11:2-4, 21). Jesusmantam bibliapi nin: “Diospa palabran”, nispa. Payqa “Kamachiqkunapapas kamachiqnin” kasqanraykum Jehova Diosta mana kasukuqkunata chinkachinqa yupaychaqninkunatañataqmi libraykunqa (Apocalipsis 19:11-16). Chayqa ‘llumpa-llumpay ñakariy punchawkunapim kanqa, manam chaynaqa karqachu runakunapa qallariyninmantapacha kunankamapas’ (Mateo 24:21, 42).
a Bibliapiqa wakin runakunam huk sutiwan sutichasqa karqaku. Jacobtam suticharqaku Israelwan; Pedrotañataq Simonwan; Tadeotañataqmi Judaswan (Genesis 49:1, 2; Mateo 10:2, 3; Marcos 3:18; Hechos 1:13).
b Kay qillqapi ñawpaq testamentoqa Chuya Qellqa sutiyuq bibliamantam kachkan.