Santo Domingoi pagaricani, capital de la República Dominicana llactai; chuscu huauquiunamanda ñuca puchu ani. Ñuca yayauna estudiashca anuca, paiguna munanuca ñucanchira ali runaunahua iñangaj ali estudiangaj. Chuscu huatauna ñuca manara pagarishcallaira, ñuca yayauna shu misionero mormones nishcaunara ricsinuca, ñuca yayauna ashca gustanuca cai maltauna ali runauna, alichirishca, ali ricurij ashcaunara ricusha. Ansa timpu huasha ñuca, ñuca aillu República Dominicana llactai Iglesia de Jesucristo de los Santos de los Últimos Días nishcama mayanllacanchi shinallara cai Iglesia Mormona cuinta ricsishca an.

Ñuca tucui huras Iglesia rurashcaunai yanapacani shinallara respetacani mormonguna yachachishcara, ailluunara, causaimanda yachachishcaunaras yapajta valichinuca. Mormón cuinta ana ñucara yapa cushiyachihuaca shinallara shu meta churacani misionero angaj.

18 huatara charishcai, ñuca aillu Estados Unidos llactama rinuca ñuca ali universidadma icungaj. Shu huata huasha ñuca mamahua pani paihua caris, paiguna Jehovahuaj testigoguna anun, Florida llactama pasiangaj shamunuca, paiguna cumbiranuca shu asambleama ringaj. Tucuiguna Bibliai texto ricusha quillcasha tianuca shinajpis ñucas quillcangaj munacani chiraigu ñuca mañacani shu quillca shu esfero quillcangaj.

Asamblea huasha ñuca tioguna, ñuca misionero tucungaj munajpi paiguna yanapana munanuca Bibliara mas ricsingaj. Cai ali uyarica, ñuca mormón libromanda mas yachacani Bibliamanda yachana randimanda.

Paiguna rishca huasha celularmanda Bibliamanda cuintarisha caticanchi. Tucui huras animachihuanuca ricungaj ñuca quirishca Bibliamanda shamushcara, mana shamushcara intindingaj. Paiguna munanuca ñuca sirtu shimira yachangaj.

Ñuca religionmanda ashca cosasguna quiricani tucui sirtu cuinta shinajpi sirtu pacha mana yachacani caimanda Biblia ima nishcara. Ñuca tía cachamuca ¡Despertad! 8 de noviembre de 1995 huatamanda, cai revistara Jehovahuaj testigoguna llucchinushca aca, cai charica ishqui temagunara mormonismo nishcamanda. Riparacani ñuca Iglesia quirishcamanda mana ashcara yachacani chiraigu ñuca Iglesia mormonmanda internet paginai cai revista sirtu rimashcara yachangaj ricucani, cai sirtu aca. Cai sirtu ashcara ricucani Utah llactai mormonmanda museogunara pasiashcai.

Biblia, Libro de Mormón nishcahua tucui huras intindicani parijulla chi tunullara intindichishcara. Shinajpi sirtu pacha Bibliara leangaj callarishcai intindicani ishquindipura chi tunullara mana yachachishcara. Bibliai Ezequiel 18:4 nin alma paillara huañun. Shinajpi Libro de Mormombi Alma 42:9 nin alma mana ima huras huañuna ushashcara.

Mormongunamanda cai iyaiguna shuj iyaigunas ñuca iyaira pandachinuca. Shu ejemplo, paiguna quirinun (Misuri, Estados Unidos) Jackson llactai ñaupa chibi jardín de Edén ashcara quirinun. Iglesiamanda profetaguna ninun, “Diospa Reino mandangaj callarijpi, Estados Unidosmanda bandera caran partima cuyurisha ahuayachishcara ricuchinga, tucuiguna lugarda, dirichura charishun”.

Ñuca tapuricani imara tucunga ñuca llactara shinallara shuj llactaunaras cai pasajpi. Shu chishii misionero tucungaj estudiauj ñucara cayahuaca shinajpi cai temamanda tapucani. Ñuca pasajta tapucani: “Camba llacta shuj llactahua guerrai tianujpi ¿can macanunguichu chi llactamanda mormongunahua cuntra?”. Ñuca manzharicani pai ari nijpi. Ñuca religionmanda yachachishcaunara mascasha caticani shinallara ñuca Iglesiara pushajcunaras tapucani, paiguna rimahuanuca ñuca tapushcauna pasashca timpu huasha ñuca cai cutipanaunara charina ashcara.

Pai cutipashcahua ñuca manali sintiricani. Ñucallara tapuringaj callaricani imarasha misionero tucungaj iyaira charini nisha, riparacani misionero tucungaj shuj runaunara yanapangajlla ashcara shinallara shujcuna ñucara respetanuchu munacani. Sirtu pacha ansalla Diosmanda yachacani. Ashca cuti Bibliamanda textogunara leashas chi librora mana valichishca cuinta ruracani. Shinallara mana yachacani Yaya Dios imara rurana munan runaunahua allpahuas.

Jehovahuaj testigogunahua Bibliara estudiasha ashcara yachacani: Diospa shuti, huañushca huasha imara tucunchi, Diospa munai pactarichu imasnara Jesús yanapaun... Cunara cai gustu librora ricsingaj callaricani ¡ñuca ashca munacani Bibliamanda sirtu shimimanda yachaushcara shujcunara cuintangaj! Tucui huras yachashca acani Dios tiashcara, shinajpi cuna paita mañana ushacani ñuca ali amigo cuinta. 12 de julio 2004 huatai bautisaricani Jehovahuaj testigo cuinta, sucta quillauna huasha intiru timpu Diosta sirvingaj callaricani.

Pichca huatauna central mundial Jehovahuaj testigogunamanda oficinai tarbacani Brooklyn (Nueva York) llactai. Ñuca yapa sumaj aca Bibliara ruranaunai shuj publicaciongunara ruranaunais yanapangaj, caigunahua ashca huaranga huaranga runaunara yanapanun. ¡Chara cushihua yanapasha catiuni shujcuna Diosta ricsingaj pactanuchu!