Canmanda ñucanchira cuintahuai.

1979 huatai, Estados Unidos llactai pagaricani. Quinsa huataunara charishcai ñuca yaya, mama divorciarinuca. Ñuca mama ñucara judía cuinta iñachicami, chiraigumanda judías escuelagunama rij acani yeshivás nishcami anun. Canzhis huataunara charishcai Israel llactama causangaj ricanchi; ñuca rishca escuela muyuunara tarpuna partii aca, kibutz nishcai. Shu huata pasashca huasha México llactama causangaj ricanchi.

Ñuca huasi mayambi sinagogaguna mana tiashas judía cuinta causasha caticani: sábado punzhai velagunara sindichij acani, Torá nishca libroras leaj acani [judioguna santu quillcashcauna] shinallara sidur nishca librohua mañaj acani. Ñuca escuelai ñuca religión sirtu religión ashcara ñuca compañerogunara nij acani. Nuevo Testamento nishcara mana ima huras leashcani, cai librogunaga Jesús yachachishcaunamanda, pai Diospa Shimira yachachinamandas riman. Ñuca mama chita ama leachu nica ñucara ama pandachingahua.

¿Imarasha Nuevo Testamento nishcara leana munacangui?

17 huataunara charishcai Estados Unidos llactama tigracani ñuca escuelara tucuchingaj. Shu amigo Jesusta catij ashcara nihuaca, pai ñucara nica camba causaibi Jesús illajpi mana cushi causanguimi nisha.

“Jesuspi quirijcuna pandarishca causanun” cutipacani.

Pai nica: “¿Maican timpui Nuevo Testamento leashcanguichu?”.

“Mana”, nicani.

Pai tapuca: “¿Imarasha shina ningui? Manalichu mana yachasha rimangaj, chi upaunajmi”.

Pai rimashca manzhachihuaca, ñuca shinallara iyacani. Shinajpi manzharisha pai cushca Nuevo Testamentora Biblia huasima apacani leangaj.

¿Leashcamanda imara iyangui?

Ashcara manzhachihuaca Nuevo Testamento judioguna quillcashca ashcara, leasha catiushcai ricucani Jesús yapa llaquisiqui, mansu shunguyuj runaunara yanapana munaj ashcara, mana runaunara huajlichina munashcara. Shinallara bibliotecama ricani Jesusmanda rimaj librogunara mascangaj. Shinajpis mana maicans libro ñucara quirichica Jesús Mesías ashcara. Maicanguna Jesusta Dios ninuca, chi ¿imarasha shina anga? Ñuca iyacani: “Jesús mañaushcai ¿pitara mañaca shinajpi? ¿Paillarara?”. Shinallara Jesús huañuca, shinajpi Biblia Diosmanda nin “can mana huañungui” nisha. a

¿Imara rurarcangui?

Sirtu shimi mana pandarin, ñuca sirtu shimira tupangaj munacani. Ñuca punda mañaira huacasha shungumanda Yaya Diosta mañacani sidur nishca librora mana utilizasha. Ñuca mañasha tucuchishcai pungüibi tucanuca, chibi ishqui Jehovahuaj testigoguna pactamunuca. Cuintarisha shu publicacionda saquinuca. Chi publicación cuintarishcaunahua tucui yachachishcauna Bibliamanda shamushca ñucara quirichica. Chimanda rimasha, Jehovahuaj testigoguna quirinun Jesús mana quinsa diosgunamanda parti shamushcara, maspas “Diospa Churi”, b paita pundamanda rurashca ajta quirinun. c

Ansa huasha México llactama tigracani, chibi Jehovahuaj testigogunahua Mesías profeciagunamanda estudiasha caticani. ¡Ashca profeciaguna tian! Shinajpis mana tucuira quiricani. Ñucallara tapuricani: “¿Jesusllachu chi profeciagunara pactachica? ¿Llullashcachu anga Mesías ani nisha runaunara quirichingajlla?”.

¿Imara yanapaca canda sirtura quirichingaj?

Jehovahuaj testigoguna profeciara ricuchinuca mana pis llullaj runa caita pactachina ushashcara. 700 huatauna manara pactashcallaira, Miqueas ña rimaca Belembi Mesías pagarinara. d ¿Pita ajllana ushan pai pagarina lugarda? Isaías rimaca Mesías shu shuhuaj cuinta huarcushca anara, shinajpi nica cullquiuna charij ucui pambashca anara. e Tucui chi profeciaguna Jesuspi pactarica.

Ñucara mas quirichica Jesús maican aillumanda shamushcara. Biblia ninmi Mesías rey David miraimanda shamushcara. f Judioguna aillumanda ali quillcashcaunara huacachisha charinuca, shinajpi Jesús, David aillumanda mana ashcajpi paita chijnijcuna tucuigunara cuintanunmaca. Shinajpis mana ushanuca, pai Davidmanda aillu aca, chiraigu runauna “Davidpa Churi” ninuca. g

70 huatai, 37 huatauna pasashca huasha Jesús huañushcai romano suldaruuna Jerusalenda tucuchinuca, aillumanda quillcasha huacachishcauna pirdishca tucunuca. Chiraigu ima aillumanda shamushcara yachangaj manara 70 huata pactashcallaira Mesías ña ricurina aca.

Tucui cai pasashcaunara yachashca huasha ¿imara iyacangui?

Deuteronomio 18:18, 19 Dios rimaca Israel llactai Moisés cuinta shu profeta tianara, huasha nica: “Ñuca tapushami ñuca shutii pai rimashcara mana uyajta”. Intiru Bibliara ña yachasha catishcai intindicani Nazaretmanda Jesús chi profeta ashcara.