Tucuiguna cullquira ministinchi ñucanchi familiara cuirangaj (1 Timoteo 6:8). Cullquimanda rimashaga cullquiga yanapanmi (Eclesiastés 7:12). Huaquimbi cullquimanda rimangahua shinzhimi, shina ajpis camba carihua o huarmihua cullquimanda ama piñanunguichu (Efesios 4:32). Cari huarmi parijumanda cuintanunami anun pariju cullquira imais gastanara.

BIBLIA NINMI: “¿Pita cangunamanda shu huasira rasha nisha, manzhu ñaupa punda tiaringa, cullquira yupangaj, ‘Pactangachu huasira tucuchingaj?’ nisha” (Lucas 14:28). Yapa valinmi parijumanda cuintanunara cullquira ima gastana ushashcara (1 Corintios 14:40). Shinallara ishquindipura cuintanuna anguichi masna gastana, ima randina ushashcaras (Proverbios 31:16). Randingahua cullquira charishas mana tucui munashcara randinachu. Dibi charina randi cullqui pactashca tupulla gastana angui (Proverbios 21:5; Romanos 13:8).

CAMANA USHANGUICHARI:

• Tucuimanda pagashca huashas cullqui puchujpiga camba carihua o huarmihua cuintanungui puchushca cullquira imara randina ushanchi nisha

• Cullqui pishirijpiga, mana mas yapajta gastangaj ricungui. Ansa cullquihuallas huacachina ushanguima mana mushuj yapa valij celularda randisha

BIBLIA NINMI: Tucui ranai ali rangui, “mana [‘Jehovapa’, NM] ñaupajllai astaun shinallara runauna ñaupajpis” (2 Corintios 8:21). Camba carira o huarmira mana llullasha rimangui imasna ganashcara masna gastashcaras.

Camba carira o huarmira tapungui masna gastana ushashcara (Proverbios 13:10). Camba carihua o huarmihua cullquimanda cuintanunaga camba familiara yanapangami mana piñanusha causangahua. Can ganashca cullquira tucui familiaj cuinta ricungui (1 Timoteo 5:8).

CAMANA USHANGUICHARI:

• Camba carihua o huarmihua cuintanungui masna cullquira pailla o ñucalla caran duiñu gastana ushanchi nisha

• Cuintanungahua mana chapana angui cullquimanda piñanuna horasgama