Organisaciunniycupi mana sacerdotes pagarasckas apiycu. Cunan ’ruacun imaina huámaj congregaciunpi ’ruácoj cara, nombracun huauckes capacitasckas «Yáyap congregaciunninta cuidáypaj» (Hechos 20:28). Cá ckaris suj ancha alli amistar Yayaan apincu, paycuna congregaciunmanta cajcunata yachachincu y cuidancu, «mana obligasckas ina, manapé alli ganasuan; mana interesraycu o munas imastas chasquiyta, manapé empeñuan» (1 Pedro 5:1-3). ¿Imát ’ruancu nockaycuraycu?

Cuidaaycu y protegeaycu. Huauckes capacitasckas Bibliaan yachachincu y congregaciunta yanapacuncu ckaylla Jehovamanta tianancúpaj. Paycuna allít unanchancu ima Yaya cá atun resposabilidarta ckopucora, chayraycu congregaciunpi mana ordenaaycu, manapé yanapaaycu allít tiáypaj y cusisckas canaycúpaj (2 Corintios 1:24). Imaina suj pastor sapa suj ovejasninmanta allít cuidan, cá huauckespas capacitasckas preocupacuncu ’rejsíypaj sapa suj congregaciunninmanta cajcunata (Proverbios 27:23).

Yachachiaycu Yáyap voluntarninta ’ruáypaj. Sapa semana, cá huauckes capacitasckas tantacunas congregaciunmanta encargacuncu, cá tantacunaspi feycuta sinchiyachiaycu (Hechos 15:32). Cá ckaris predicaciunmantapas encargacuncu, nockaycuan cuscas predicancu y ashca layas predicáypaj yachachiaycu.

Sapa sujta animaaycu. Sapa sujta feycupi yanapáypaj, cá huauckes capacitasckas huasiycuman ’rincu nockaycuan ’rimáypaj y Huasipi tantacunasmanta Jehóvap testigusninmanta nockaycuan ’rimancu. Bibliaan yanapaaycu y consuelút ckoaycu (Santiago 5:14, 15).

Nátaj congregaciunpi ’ruasckancunamanta, cá huauckes capacitasckas suj llámcay apincu y suj familia cuidáypaj y atendéypaj. Cá huauckesta ima ashcát llamcancu, respetanaycu tían (1 Tesalonicenses 5:12, 13).

• Cá huauckes capacitasckas, ¿ima llámcay congregaciunpi ’ruancu?

• ¿Imaina sapa suj nockaycuraycu interés ckaachincu?