Responsable cajcunaca paicunaman mingashca trabajotaca a tiempomi rurancuna. Chaimantami shujtajcunapish paicunapi confiancuna.

Huahuacunaca uchillamantami responsables canata yachai tucuncuna. Padres sin fronteras nishca libropica: “Shuj huata quimsa quillata charij huahuacunaca ñami huasipi ayudanata pudincuna. Cutin, shuj huata sujta quillata charij huahuacunaca ñami paicunallataj ayudana munaita charincuna. Achca llajtacunapica, huahuacuna cinco o siete huatacunata charijpimi yaya mamacunaca huasipi ayudanata yachachi callarincuna” ninmi.

Huaquin lugarcunapica jovencunaca huasimanta rishpami paicunalla causai callarishcacuna. Shinapish, problemacunata charishpaca cutinmi yaya mamapaj huasiman tigrashcacuna. ¿Imamanta? Paicuna uchilla cashpaca cullquita ahorranata, huasipi ayudanata, paicunaman cushca tareacunata alli ruranataca manachari yacharcacuna.

Cambaj huahuataca manaraj huasimanta rijpimi responsable canata yachachina cangui. Cómo preparar a su hijo para la edad adulta nishca libropica: “Yaya mamacunaca asha ashami huahuacunataca responsables canata yachachina can. Chashnami ña 18 huatacunata charishpa huasimanta rishpaca problemacunata mana tanto charinga” ninmi.

Huahuacuna huasipi ayudachun mañai

BIBLIAMANTA SHUJ YUYAI: “Tucui yuyaihuan imatapish rurajpica, japinapish tiyanmi” (Proverbios 14:23).

Uchilla huahuacunaca yaya mama ima ruracujta ricushpami ayudanata munancuna. Chashna munaita charijpimi huasipi ayudachun yachachina cangui.

Huaquin yaya mamacunaca, “ñuca huahuaca achca debercunatami charin” nishpami huasipi ayudachunca mana saquincuna.

Huahuacuna huasipi ayudashpaca responsables canata, paicunaman mingashcata alli pajtachinatami yachangacuna. Chaimi alli estudiantecunapish tucunga. Padres sin fronteras libropica: “Huahuacuna huasipi ayudana munaita mana cuentapi tomajpica, paicuna jatunyashpaca  shujtajcunata ayudanaca mana importante cashcatami yuyangacuna. Shinallataj paicunaman tucuita rurashpa cuchunmi costumbraringacuna” ninmi.

Cai libropi nishca shinaca, huahuacuna huasipi ayudanata yachashpaca mana paicunallapi yuyashpami shujtajcunata ayudanata munangacuna. Shinallataj familia ucupica valishca cashcata, ayudana responsabilidadta charishcatami cuentata cungacuna.

Huahuacuna imapi pandarishcata intindichun ayudai

BIBLIAMANTA SHUJ YUYAI: “Cunashcatapish uyangui, alli tucuchun rimashcatapish chasquingui. Chashnami ña yuyaj cashpaca, yachaisapa cangui” (Proverbios 19:20).

Cambaj huahua ima mana allita rurajpica mana pacanachu cangui. Huahuacunaca ima mana allita rurashpaca reconocirinata yachanami can. Por ejemplo, imata pꞌaquishca cashpaca perdonta mañanata, chai dañomanta paganatami yachana can.

Huahuacuna imapi pandarishcata mana pacashpaca caicunatami yachangacuna:

• Honrados canata.

• Shujtajcunata mana yangamanta juchachinata.

• Pai culpata charishcata reconocirinata.

• Minishtirijpica perdonta mañanata.