YOMARACA paipaj ishqui huauquicunahuanmi Guatemala llajtapi saquirij shuj uchilla pueblopi causancuna. Paipaj huauquicunaca Marcelo, Hiver shuticunami can. Yomaraca testigo de Jehovacunahuanmi Bibliata yachai callarirca. Qꞌuipacarin paipaj huauquicunapishmi Bibliamantaca yachai callarircacuna. Pero paicunaca mana ricui tucushcamantami shuj jatun problemata charircacuna. Braillepipish liyinataca mana yacharcacunachu. Chaimantami paicunata Bibliamanta yachachijca parrafocunatapish, Bibliapaj huaquin versocunatapish liyishpa uyachina carca.

Chai jahuapish paicunaca shujtaj problematami charircacuna. Jehová Diosta adorangapaj tandanacuna huasica 40 minutos carupimi carca. Chaimantami paicunaca chaiman mana ri tucurcacuna. Chaita yachaj chayashpaca huauqui panicunaca tucui tandanacuicunaman apangapajmi ari nircacuna. Chai huashapish cai estudiantecunamanca chaupi semanapi tiyaj tandanacuipi asignacionta cuchunmi mingarcacuna. Chai asignacioncunataca huauqui panicunami yuyaipi charichun, memorizachun ayudarcacuna.

Mayo de 2019 huatapica paicunapaj pueblopimi tandanacuicunata rurai callarircacuna. Chai pueblopica shuj cusa huarmimi precursores regularcuna shina sirvinaman rircacuna. Cai cusa huarmica braillepi liyinata, escribinataca mana yacharcacunachu. Chaimantami paicunaca shuj bibliotecapi brailleta ima shina escribina cashcata, liyina cashcata yachanaman rircacuna. Chashnami cai quimsa estudiantecunataca brailleta escribichun, liyichun ayudai tucurcacuna.

Cai quimsa estudiantecunaca ashalla quillacunapimi brailleta jahualla liyi tucurcacuna. Chaita rurai tucushcamantami Yayitu Dioshuanca ashtahuan alli apanacui callarircacuna. a Cunanca quimsandijmi precursores regularcuna cancuna. Marcelocarin siervo ministerialmi can. Quimsandijcunami tucui semanacuna Yayitu Diosta sirvishpa catingapaj esforzarincuna. Achca huauqui panicunaca paicunapaj ejemplota ricushpami paicunapish chashnallataj Yayitu Diosta sirvisha nincuna.

Yomarapish, Marcelopish, Hiverpish congregacionmanta huauqui panicuna cꞌuyaita ricuchishcamantami dimastij agradecidos cancuna. Yomaraca: “Huauqui panicunaca callarimantami ñucanchijmanca cꞌuyaita ricuchishcacuna” ninmi. Cutin Marceloca. “Ñucanchij congregacionpica alli amigocunatami charinchij. Muyundij Allpapipish ñucanchijta cꞌuyaj, llaquij huauqui panicunatami charinchij” ninmi. Yomarapish, paipaj ishqui huauquicunapish cai Allpa shuj paraíso tucuchunmi tucui shunguhuan shuyacuncuna (Salmo 37:10, 11; Isaías 35:5).