Achca gentecunaca shamuj punllapi alli causangapajca shuj titulota charina, charij canami minishtirin nincunami. Chashnallataj universidadman rijcunaca alli trabajajcunami tucuncuna, familiahuanpish shujtajcunahuanpish allimi causancuna nishpami yuyancuna. Shinallataj preparado cashcamantami shuj alli trabajopi achca cullquita ganashpa yallitaj cushilla causangacuna nishpami yuyancuna.

China llajtamanta Zhang Chen shuti runaca: “Ñucaca, título illajca siempremi pobre casha. Alli pagashca trabajollami ñucamanca cushi causaita cunga nishpami yuyaj carcani” ninmi.

Alli causaita charinata munashcamantami maijancunaca shujtaj llajtapi tiyaj rijsishca universidadcunaman rinata munancuna. Pero COVID-19 ungüi tiyai callarishcamantami shujtaj llajtaman estudianaman rinaca sinchi tucushca. 2012 huatapi Organización para la Cooperación y el Desarrollo Económicos nishcaca shuj informepica: “Shujtaj llajtacunapi universidadcunapi estudiajcunamantaca chaupi yallimi Asia ladomanta cancuna” ninmi.

Achca yaya mamacunaca paicunapaj huahuacuna shujtaj llajtacunapi tiyaj universidadcunapi estudiachunca tucui pudishcatami rurancuna. Taiwán llajtamanta Qixiang shuti shuj runaca: “Ñucanchij yaya mamaca mana tanto cullquita charishpapish ñucata, ñuca huauqui panicunatapishmi Estados Unidospi tiyaj universidadpi estudianaman cacharcacuna” ninmi. Huahuacuna estudiachun achca cullquita gastana cashcamantami Qixiangpaj familiapish, shujtaj familiacuna layallataj achca dibi tucushcacuna.

Maipica alli titulota charinaca causaipimi ayudai tucun. Shinapish estudiado canaca mana tanto segurochu. Por ejemplo, estudiantecunaca achca huatacunata esforzarishpapish, achcata gastashpapish paicuna munashca trabajotaca mana japincunachu. Singapur llajtamanta Business Times nishca periodicopi escribij Rachel Mui huarmica: “Universidadpi graduarishca achca jovencunaca shuj trabajotaca mana japi tucuncunachu” ninmi. Taiwán llajtamanta Jianjie shuti runaca shuj doctoradotami charin. Paica: “Achcacunaca paicuna estudiashca laya trabajotaca mana japincunachu. Chaimantami ima trabajotapish chasquinllacuna” ninmi.

Achcacunaca paicuna munashca trabajocunatami japincuna. Pero paicuna yuyashca shinaca mana sintirincunachu. Tailandia llajtamanta Niran shuti shuj runaca Reino Unidopi estudiashpami paipaj llajtaman tigrarca. Chaipimi pai munashca trabajota japirca. Paica: “Ñuca estudiocunamantami ñuca munashca alli trabajota japircani. Pero achcata ganangapajca achca tiempotami trabajana carcani. Shinapish tiempohuanca chai empresaca ñucatapish, shujtaj empleadocunatapishmi despidirca. Chaimi ima trabajopish mana seguro cashcata cuentata curcani” ninmi.

Charijcunapish familiapica problemacunatami charincuna. Mana cashpaca ima ungüicunatapishmi charincuna. Shinallataj paicuna charishca cullquimantapishmi yallitaj sustarincuna. Japón llajtamanta Katsutoshi runaca: “Ñucaca achca cullquita charishpapish mana cushilla carcanichu. Shujtajcunaca ñucataca achcatami envidiajcunaca carca. Shinallataj maltami tratajcuna carca” ninmi. Vietnam llajtamanta Lam shuti shuj huarmica: “Achcacunaca seguro causaita charishun nishpami cullquiyuj canata munancuna. Pero ña cullquiyuj tucushpapish yallitaj sustarishca, ungushcami causancuna. Huaquincunacarin depresión ungüitami charincuna” ninmi.

Achcacunami Franklin laya yuyancuna. Paicunaca alli estudiocunata charina, achca cullquita charina mana cushi causaita cushcatami intindishcacuna. Shujtajcunaca charijyanata mashcanapaj randica, shujtajcunahuan alli canata, shujtajcunata ayudanatami mashcancuna. ¿Alli causaita charingapajca caita ruranachu minishtiringa? Catij yachaipimi caimanta yachashun.