YACHAI 01
¿Bibliata yachashpaca ima shinataj causangui?
Achca gentecunaca problemacunata allichingapaj, causaipi ima minishtirishcata charingapaj, familiahuan cushilla causangapaj imata rurana cashcatami yachanata munancuna. Chaimantami huaquincunaca: “¿Imamantataj huañunchij? ¿Imamantataj sufrinchij? ¿Shamuj punllacunapica ima shinashi causashun?” nishpa tapurincuna. Paicunaca Bibliata yachashpami cai tapuicunata intindishcacuna. Bibliapi consejocuna tiyashcatapishmi ricushcacuna. Chai consejocunaca tucuicunatami ayudai tucun.
1. ¿Ima tapuicunatataj Bibliaca cutichin?
Bibliapica cai tapuicunatami cutichin: ¿Causaica ima shinataj tiyai callarirca? ¿Imapajtaj causanchij? ¿Mana culpata charij gentecunaca imamantataj sufrincuna? ¿Huañushpaca imataj tucunchij? ¿Tucuicuna sumajta causasha nijpipish imamantataj macanacuicuna tiyan? ¿Cai Allpa pachahuanca imataj tucunga? Achca gentecunaca Bibliata estudiashpami cai tapuicunata yachashcacuna.
2. ¿Bibliapica imallatataj yachachin?
Bibliapica alli consejocunami tiyan. Por ejemplo, familiahuan alli causangapaj, cushilla trabajangapaj imata rurana cashcatami yachachin. Shinallataj estrés ungüihuan cashpa imata rurana cashcatami yachachin. Bibliapi yachachishcacunata estudiashpami ñucanchij allipaj cashcata cuentata cungui (2 Timoteo 3:16). Shinallataj testigo de Jehovacunahuan Bibliata estudiashpami ashtahuan yachangui.
Cai publicacionca mana Bibliachu can. Ashtahuanpish cai publicacionca canllataj Bibliata estudiachunmi ayudan. Chaimantami cada yachaipi tiyaj versocunata liyichun, chai versocunata imata yachacushcahuan comparachun animanchij.
ASHTAHUAN YACHAI
Biblia yachachishcacuna gentecunata ima shina ayudashcata ricui. Canpish Bibliata liyina munaita charingapaj imata rurana cashcata ricui. Shujtajcuna Bibliamanta intindichichun minishtirishca cashcatapish ricui.
3. Bibliaca ñucanchij causaitami ayudan
Bibliaca achijyachij luz shinami can, alli decisioncunata japichunmi ayudan. Shinallataj Bibliapica shamuj punllacunapi ima tucuna cashcatami huillan.
Salmo 119:105-ta liyipai. Qꞌuipaca cai catij tapuicunatami yachashun:
-
¿Cai salmota quillcaj runaca Bibliamantaca imatataj yuyarca?
-
¿Canca Bibliamantaca imatataj yuyangui?
4. Bibliaca ñucanchij tapuicunatami cutichin
Shuj huarmica achca huatacunatami tapuicunata charirca. Pero Bibliata yachashpami respuestacunata tarirca. VIDEOTA ricui. Qꞌuipaca cai catij tapuicunatami yachashun:
-
¿Videopi ricurij huarmica ima tapuitataj rurarirca?
-
¿Bibliata yachanaca ima shinataj ayudarca?
Bibliapica tapuna alli cashcatami yachachin. Mateo 7:7-ta liyipai. Qꞌuipaca cai catij tapuitami yachashun:
-
¿Maijan tapuicunatataj Biblia cutichichun munanguiman?
5. Canca Bibliata liyishpaca cushicunguimi
Achca gentecunaca Bibliata liyinatami munancuna. Chaipi tiyaj consejocunaca paicunataca achcatami ayudashca. VIDEOTA ricui. Qꞌuipaca cai catij tapuicunatami yachashun:
-
¿Cai videopi ricurij jovencunaca liyinamantaca imatataj yuyarcacuna?
-
¿Cai jovencuna imata liyinata mana munashpapish imamantataj Bibliata liyinata munancuna?
Biblia yachachishcacunaca ñucanchijtami animan, shuj esperanzatapishmi cun. Romanos 15:4-ta liyipai. Qꞌuipaca cai catij tapuitami yachashun:
-
Bibliapica shuj sumaj esperanza tiyashcatami huillan. ¿Chaita yachanata munanguimanchu?
6. Shujtajcuna Bibliata intindichichunmi minishtinchij
Bibliata ñucanchijllataj liyishpapish shujtajcuna intindichichunmi minishtinchij. Hechos 8:26-31-ta liyipai. Qꞌuipaca cai catij tapuitami yachashun:
-
¿Bibliata intindingapajca imatataj rurana canchij? (Hechos 8:30, 31-ta ricui).
Etiopía llajtamanta shuj runami Bibliata intindichichun minishtirca. Cunan punllacunapish achca gentecunami shujtajcuna Bibliata intindichichun minishtin.
HUAQUINCUNACA: “Bibliata estudiashpaca tiempotami pirdinchij” nincunami.
-
¿Canca imatataj yuyangui?
YUYARISHUNCHIJ
Bibliapica ñucanchij causaipajmi alli consejocuna tiyan. Shinallataj importante tapuicunatami cutichin. Shuj sumaj esperanzatapishmi gentecunaman cun.
Yuyaringapaj tapuicuna
-
¿Ima laya consejocunataj Bibliapi tiyan?
-
¿Ima tapuicunatataj Bibliaca cutichin?
-
¿Bibliamantaca imatataj yachanata munangui?
CAICUNATAPISH RICUI
Bibliapi tiyaj consejocunaca cunancamami ayudan.
Shuj runaca uchillamantami shujtajcunahuan parlanacunata manchaj carca. Pero Bibliata yachashpa ima shina sintirishcata ricui.
Familiahuan cushilla causangapaj Bibliapi ima consejocuna tiyashcata yachai.
“Ñucanchij familiahuan sumajta causashunchij” (Rijchari, Núm. 2 2018)
Huaquin gentecunaca cai mundota pi mandacushcataca mana alli yachancunachu. Pero Bibliapica pi mandacushcatami yachachin.
¿Imamantataj Bibliamanta yachana canchij? (Video completo) (3:14)
Puede que también le interese
GENTECUNA RURASHCA TAPUICUNA
¿Testigo de Jehovacunaca ima shinataj Bibliamanta yachachincuna?
Testigo de Jehovacunahuan Bibliamanta gratis estudiacushpaca can charishca Bibliatami utilizai tucungui. Cambaj familiata o cambaj amigocunatapish canta compañachun invitai tucungui.
