Tito 1:1-16
-
Pablo saludashcamanta (1-4)
-
Titoca Creta islapimi ancianocunata nombrana carca (5-9)
-
Mana cazujcunata sinchita cunanamanta (10-16)
1 Ñucaca Pablomi cani. Diosta sirvij, Jesucristopaj apostolmi cani. Ñucapish Dios agllashcacuna crishca shinallataj, mana llullata alli yachashca shinallatajmi crini. Chai mana llullami Diosta tucui shunguhuan ima shina adoranata ricuchin.
2 Caicunataca huiñai causaita shuyacushcamantami charini. Huiñai causaitaca mana llulla Diosmi ñaupa punllamanta cusha nirca.
3 (Pai agllashca punllapimi alli huillaicunata huillachishpa paipaj shimita yachaj chayachirca. Ñucanchijta Quishpichij Dios mandashcamantami chai alli huillaicunata huillangapaj ñucaca agllashca cani).
4 Cai cartataca Titomanmi quillcani. Canca ñucapajca shuj churi shinami cangui. Ñuca shinallatajmi feta charingui:
Yaya Diospish, ñucanchijta Quishpichij Cristo Jesuspish yallitaj llaquij cashcata canman ricuchichun, sumaj causaitapish canman cuchun.
5 Cantaca mana alli ruraicunata allichichun, ñuca mandashca shinallataj cada llajtapi ancianocunata nombrachunmi Creta islapi saquircani.
6 Shuj ancianoca mana juchachipaj, shujlla huarmipaj cusami cana can. Paipaj huahuacunapish Jesusta catijcuna cachun, maipishcachun purij, mana cazujcunami can nishpa ama juchachishca cachun.
7 Ancianoca Dios churashca mayordomo cashcamantaca imamantapish mana juchachipaj, mana rumi shungu, mana jahualla pꞌiñarij, mana machaj, mana macajmi* cana can. Mana allita rurashpa imata japina munaitapish mana charinachu can.
8 Chaipaj randica cꞌuyaihuan chasquij, allita ruranata cꞌuyaj, alli yuyaiyuj, cashcata ruraj, Diosta tucui shunguhuan sirvij, jarcarijmi cana can.
9 Shuj alli yachachij shinami Diospaj mana llulla shimipi nishcata catina can. Chashnami alli yachaihuan shujtajcunata animanga,* mana chashnachu can nijcunatapish sinchita cunanga.
10 Achca mana cazuj runacuna, rimana cashcallamanta rimaj runacuna, shujtajcunata pandachij runacunami tiyan. Ashtahuantajca circuncisionta rurachinatajmi can nij runacunami tiyan.
11 Cai runacunataca upallachinami can. Paicunaca mana allita rurashpa imata japingaraicullami mana yachachina cashcata yachachishpa tauca familiacunapi tucuicunata pandachicuncuna.
12 Paicunapurallamantataj caj shuj profetaca: “Creta islapi causajcunaca llullajcuna, millai sacha animalcuna shina llaquichijcuna, micuna yuyailla causaj qꞌuillacunami can” nircami.
13 Cai huillashcaca ciertomi can. Chaimanta crishcapi sinchi cachun paicunataca sinchita cunashpa cati.
14 Mana llullamanta caruyaj runacunapaj mandashcacunata, judiocunapaj crinalla parlocunatapish ama uyachun chashna cunashpa cati.
15 Chuya cajcunapajca tucuimi chuya. Ashtahuanpish feta mana charij mapa cajcunapajca ima mana chuya canchu. Paicunapaj yuyaipish, paicunapaj concienciapish mapami can.
16 Tucuicunapaj ñaupajpimi Diostaca rijsinchijmi nincuna. Shinapish paicunapaj ruraicunahuanca Diospaj contra cashcatami ricuchincuna. Paicunaca millananacuna, mana cazujcuna, ima allita rurangapajpish Dios mana chasquishcacunami can.
