Marcos 15:1-47
-
Pilatopaj ñaupajman Jesusta pushashcamanta (1-15)
-
Tucuicunapaj ñaupajpimi Jesusmanta burlarircacuna (16-20)
-
Gólgota nishcapi Jesusta caspipi clavashcamanta (21-32)
-
Jesús huañushcamanta (33-41)
-
Jesusta pambashcamanta (42-47)
15 Tutamanta ña pacarijpimi sacerdotecunata mandajcunapish, autoridadcunapish,* mandashcacunata quillcajcunapish tandanacurcacuna. Paicunami tucui mandaj juezcuna* carca. Chashna tandanacushpaca Jesushuan imata ruranatami yuyarircacuna. Jesuspaj maquicunata huatashca qꞌuipami Pilatopajman pushashpa paitaca entregarcacuna.
2 Chaimi Pilatoca: “¿Canchu judiocunata jatun mandaj cangui?” nishpa Jesusta tapurca. Shina tapujpimi paica: “Ari, canllatajmari chaita nicungui” nirca.
3 Shinapish sacerdotecunata mandajcunaca caita chaita nishpami Jesustaca juchachircacuna.
4 Pilatoca cutinllatajmi Jesusta tapushpaca: “¿Manachu imata ningui? ¿Canmanta imata juchachicujtaca manachu uyangui?” nirca.
5 Chashna nijpipish Jesusca mana imata ashtahuan cutichircachu. Chaimantami Pilatoca mancharishca saquirirca.
6 Pilatoca cada Pascua fiesta punllapimi gentecuna maijanta cacharichun nijpica, shuj prezuta cacharichij carca.
7 Chai punllacunapica Barrabás shuti runapish, shujtaj runacunapishmi carcelpi carca. Paicunaca gobiernopaj contra jatarishpami gentecunata huañuchishcacuna carca.
8 Pilatopajman achca gentecuna shamushpaca pai ima shina ruraj cashca shinallataj shuj prezuta cacharichunmi mañarcacuna.
9 Chashna nijpimi Pilatoca: “¿Judiocunata jatun mandajtachu cacharichun munanguichij?” nirca.
10 Sacerdotecunata mandajcuna envidiallamanta Jesusta paiman entregashcatami Pilatoca cuentata curca.
11 Shinapish sacerdotecunata mandajcunaca Jesuspaj randi Barrabasta cacharichichun mañaichij nishpami chaipi cajcunataca yachachircacuna.
12 Chaipimi Pilatoca cutinllataj chaipi cajcunata ricushpaca: “Cancunaca cai runataca judiocunata mandajmi can ninguichijmi. ¿Paitaca imatataj rurasha?” nirca.
13 Chashna nijpica paicunaca: “¡Paitaca huañuchi!”* nishpami cutin caparircacuna.
14 Chaimi Pilatoca: “¿Imamantataj huañuchichun ninguichijyari? ¿Paica ima mana allitataj rurashcari?” nirca. Shina nijpipish paicunaca: “¡Paitaca huañuchi!”* nishpami ashtahuan sinchita caparircacuna.
15 Pilatoca, gentecunata cushichisha nishpami Barrabasta cacharichirca. Cutin Jesustaca azotichishca qꞌuipami caspipi clavashpa huañuchichun soldadocunaman curca.
16 Chai qꞌuipaca, soldadocunaca Pilatopaj huasi patiomanmi Jesustaca pusharcacuna. Chaipimi tucui soldadocunata tandachircacuna.
17 Paicunaca morado telatami churachircacuna. Shinallataj shuj coronata cashahuan chꞌimbashpami Jesuspaj umapi churachircacuna.
18 Chashna rurashpaca: “¡Alabado,* judiocunata jatun mandaj!” nishpami capari callarircacuna.
19 Chashnallataj carrizo caspihuan umapi garrotishpami chꞌucarcacuna. Shinallataj nij tucushpallami paipaj ñaupajpi cumurishpa cungurircacuna.
20 Paimanta burlarishca qꞌuipami morado telata anchuchishpa paipaj churanata cutin churachircacuna. Chaimantaca caspipi clavangapajmi pusharcacuna.
21 Chaitaca Cirene llajtamanta Simón nishca runami campomanta shamushpa pasacurca. Paitami Jesusta llaquichina caspita* aparichun mandarcacuna. Paica Alejandropaj, Rufopaj yayami carca.
22 Chaimantaca Gólgota nishcamanmi Jesusta pusharcacuna. Gólgota shutica “Uma Tullu” nisha ninmi.
23 Chaipimi paicunaca mirrahuan* chagrushca vinota ubyachishun nircacuna. Shinapish Jesusca mana ubyasha nircachu.
24 Chai qꞌuipaca caspipimi clavarcacuna. Shinallataj cada uno imata apana cashcata ricungapajmi Jesuspaj jahua churanacunataca sorteashpa chaupircacuna.
25 Casi las nueve de la mañana cajpimi caspipi clavarcacuna.
26 Imamanta huañuna cashcata ricuchingapajmi shuj letreropica: “Judiocunata jatun mandajmi” nishpa quillcarcacuna.
27 Shinallataj Jesuspaj ladopica ishqui shuhuacunatami caspipi churarcacuna. Shujtaca alli ladoman, caishujtaca lluqui ladoman.
28 *——
29 Chaita pasaj gentecunapish umata cuyuchishpami Jesustaca mana allita rimashpa cashna nircacuna: “¡Jajai! Canca Diospaj huasita urmachishpa, quimsa punllapi cutin shayachishami nircanguica,
30 llaquichina caspimanta* uriyashpa quishpiriyari” nircacunami.
31 Sacerdotecunata mandajcunapish, mandashcacunata quillcajcunapish, paicunapura tandanacushpaca Jesusmanta chashnallataj burlarishpami cashna ninacurcacuna: “¡Paica shujtajcunataca quishpichircamari. Paillatajca mana quishpiri tucunchu!
32 Israel llajtata jatun mandaj Cristo cashpaca llaquichina caspimanta* cunanllataj uriyachun. Chashna uriyajta ricushpami paipica crishun” nircacunami. Jesuspaj ladopi caj caspicunapi churashca shuhuacunapishmi mana allita nishpa Jesustaca rimarcacuna.
33 Ña casi chaupi punlla tucujpica tucui chai llajtami* amsayarca. Casi las tres de la tardecamami chashna tucurca.
34 Las tres de la tarde shina cajpimi Jesusca sinchita cashna nishpa caparirca: “Éli, Éli, ¿láma sabakhtháni?”. Cai shimicunaca, “ñuca Dioslla, ñuca Dioslla, ¿imamantataj ñucallata saquishcanguiyari?” nisha ninmi.
35 Chashna nijta uyashpami chai cꞌuchullapi cajcunamanta maijancunaca: “¡Uyaichij, Eliastamari cayacun!” nircacuna.
36 Chaipi cajcunamanta shuj runaca callpashpa rishcahuanmi jayaj vinopi esponjata satirca. Qꞌuipaca shuj carrizo caspipi churashpami Jesús ubyachun cꞌuchuyachirca. Chashna rurashpaca: “¡Saquichij! Ricushunchij, Elías shamushpa paita quishpichinchu, imami” nircami.
37 Ashtahuanpish Jesusca sinchita caparishpa huañurcallami.
38 Jesús huañujpica Diospaj huasi ucupi tiyaj racu telaca jahuamanta urimanmi ishquipi lliquirirca.
39 Jesuspaj ñaupajpica 100 soldadocunata mandajmi shayacurca. Paica chaipi imalla tucushcatami ricurca. Chaimantami Jesús ima shina huañujta ricushpaca: “Cai runaca Diospaj Churitajmari cashca” nirca.
40 Chaipica, huaquin huarmicunapishmi carullamanta ricucurcacuna. Paicunapurapica María Magdalena, ashtahuan joven* Santiagopaj, Josespaj mama María, Salomepishmi carca.
41 Jesús Galileapi cajpica paicunami paita ayudashpa, catishpa purijcuna carca. Jesushuan Jerusalenman shamuj achca huarmicunapishmi chaipi carcacuna.
42 Allichirina punlla* qꞌuipaca sábado punllami carca. Allichirina punllaca ñami chishiyarca.
43 Chaipimi Arimatea llajtamanta Joseca manchaita saquishpa, Pilatopajman rishpaca Jesuspaj cuerpota mañarca. Cai runaca mandaj juezcunapurapica* respetashcami carca. Paipish Diospaj Gobiernotami shuyacurca.
44 Shinapish Pilatoca Jesús ña huañushcata o manaraj huañushcatami yachasha nirca. Chaimantami 100 soldadocunata mandajta cayashpa tapurca.
45 Jesús ña huañushcata 100 soldadocunata mandaj huillajpimi, Pilatoca Jesuspaj cuerpota José apachun saquirca.
46 Joseca linohuan rurashca alli telata randishpami, Jesuspaj cuerpota uriyachishpaca chai telahuan pilluchirca. Chai qꞌuipaca rumi quinripi rurashca pambana jutcupimi Jesustaca churarca. Chai huashaca shuj jatun rumitami jutcu punguman singuchirca.
47 Shinapish María Magdalena, Josespaj mama Mariapish, Jesusta churashca jutcuta ricushpami saquirircacuna.
Notacuna
^ Griego rimaipica: “ancianocunapish” ninmi.
^ O “Sanedrín”. “Sanedrín” shimita huasha diccionariopi ricui.
^ O “¡Paitaca caspipi clavashpa huañuchi!”.
^ O “¡Paitaca caspipi clavashpa huañuchi!”.
^ O “Viva”.
^ “Llaquichina caspi” shimita huasha diccionariopi ricui.
^ “Mirra” shimita huasha diccionariopi ricui.
^ Cai versoca ñaupa quillcachishcacunapica mana ricurinchu. Huaquin Bibliacunapi ricurijpipish chai yuyaicunataca Diosca mana quillcachishcachu.
^ “Llaquichina caspi” shimita huasha diccionariopi ricui.
^ “Llaquichina caspi” shimita huasha diccionariopi ricui.
^ Griego rimaipica: “tucui allpami” ninmi.
^ O “ashtahuan uchilla”.
^ “Allichirina punlla” shimita huasha diccionariopi ricui.
^ O “Sanedrinpica”.
